শতাব্দ ষ্টাফ ৰিপ’ৰ্টাৰ, ২৪ জুলাই : বিশ্ব স্বাস্থ্য সংস্থাই মাংকী পক্সৰ প্ৰাদুৰ্ভাৱক বিশ্ব স্বাস্থ্যৰ জৰুৰীকালীন অৱস্থা হিচাপে ঘোষণা কৰিছে। এই সংক্ৰামক ৰোগ ৭০ খনতকৈও অধিক দেশত দ্ৰুতগতিত বিয়পি পৰিছে। বিশ্ব স্বাস্থ্য সংস্থাই এই পৰিস্থিতি বিপজ্জনক বুলি ঘোষণা কৰিছে। উল্লেখ্য যে মধ্য আৰু পশ্চিম আফ্ৰিকাৰ কেইবাটাও অঞ্চলত দশক দশক ধৰি মাংকী পক্স অব্যাহত আছিল যদিও ইয়াৰ আগতে এই ৰোগ আফ্ৰিকা মহাদেশৰ বাহিৰত ইমান ভয়ংকৰ হাৰত বিয়পি পৰা নাছিল। ইউৰোপ, উত্তৰ আমেৰিকা আদি অঞ্চলত এই ৰোগে মহামাৰীৰ পৰ্যায়ত উপনীত হৈছে। এই প্ৰাদুৰ্ভাৱক ‘গ্ল’বেল ইমাৰ্জেন্সি’ ঘোষণা কৰাৰ অৰ্থ হ’ল ই অধিক দেশলৈ বিয়পি পৰাৰ আশংকা এতিয়াও আছে আৰু এই ৰোগৰ বিৰুদ্ধে যুঁজিবলৈ বিশ্বই একেলগে কাম কৰাৰ প্ৰয়োজন আছে। উল্লেখযোগ্য যে বিশ্ব স্বাস্থ্য সংস্থাই পূৰ্বে ক’ৰণা মহামাৰী, ২০১৪ চনত আফ্ৰিকাত ইব’লাৰ প্ৰাদুৰ্ভাৱ, ২০১৬ চনত লেটিন আমেৰিকাত জিকা ভাইৰাছ আৰু পলিঅ’ৰ বিৰুদ্ধে চলি থকা যুঁজখন জৰুৰীকালীন অৱস্থা হিচাপে ঘোষণা কৰিছিল। এই ঘোষণাৰ উদ্দেশ্য হৈছে এই সমস্যাৰ প্ৰতি অধিক দৃষ্টি আকৰ্ষণ কৰা। ২৩ জুলাইত বিশ্ব স্বাস্থ্য সংস্থাৰ সভাপতি টেড্ৰ’ছ আধানম ঘেব্ৰেইছাছে এই বিষয়ত ভাৰ্চুৱেল সংবাদমেল অনুষ্ঠিত কৰে। উল্লেখ্য যে এতিয়ালৈকে ৭২ খন দেশৰ ১৫ হাজাৰ ৮০০ লোক এই অতি সংক্ৰামক ৰোগত আক্ৰান্ত হৈছে। আমেৰিকাৰ চেণ্টাৰ ফৰ ডিজিজ কণ্ট্ৰ’ল এণ্ড প্ৰিভেনচনে ২০ জুলাইত এক প্ৰতিবেদনত এই তথ্য প্ৰকাশ কৰিছিল। চলিত বৰ্ষৰ মে’ মাহৰ পৰা পশ্চিম আৰু মধ্য আফ্ৰিকাৰ বাহিৰত মাংকী পক্স সংক্ৰমণ হোৱাৰ বাতৰি পোৱা গৈছে। জীৱ-জন্তুৰ পৰা মানুহলৈ সংক্ৰমিত হোৱা এক অতি সংক্ৰামক ৰোগ হৈছে মাংকী পক্স। চিকেন পক্সৰ ভাইৰাছজনিত সংক্ৰমণৰ লগত ইয়াৰ বহু সাদৃশ্য আছে যদিও কিছুমান দেশত মাংকী পক্সক স্থানীয় বুলি ঘোষণা কৰা হৈছে। তথাপি শেহতীয়াকৈ এই ৰোগৰ প্ৰাদুৰ্ভাৱ বৃদ্ধি পাইছে। অৱশ্যে এই ৰোগৰ লক্ষণবোৰ বৰ বেছি গুৰুতৰ বা ভয়ংকৰ নহয়। বিশেষকৈ প্ৰাপ্তবয়স্কৰ ক্ষেত্ৰত একেবাৰেই চিন্তাৰ বিষয় নহয়।কিন্তু কিছুমান ক্ষেত্ৰত শিশুৰ বাবে ই ভয়ংকৰ হ’ব পাৰে। শিশুৰ লক্ষণসমূহ হ’ল অসুস্থতা, জ্বৰ, ফুলা গ্ৰন্থি, ঠাণ্ডা আৰু জ্বৰ। শিশুৰ ক্ষেত্ৰত যদি এইবোৰ লক্ষণ দেখা দিয়ে তেন্তে সাৱধান হওক।
