অসম সাহিত্য সভাৰ নাৰায়ণপুৰ অধিৱেশনৰ প্ৰস্তুতি তুংগত

 শতাব্দ ষ্টাফ ৰিপৰ্টাৰ লখিমপুৰ, ২৪ জানুৱাৰীঃ অসম সাহিত্য সভাৰ ষষ্ঠ সপ্ততিতম পূৰ্ণাংগ নাৰায়ণপুৰ অধিৱেশনখনলৈ মাজত মাথোঁ আৰু ৬টা দিন বাকী আছে৷ ইতিমধ্যে সাহিত্য সভাৰ নাৰায়ণপুৰ অধিৱেশনৰ সকলো প্ৰস্তুতি তুংগত উঠিছে৷ লখিমপুৰ জিলাৰ ঐতিহ্যমণ্ডিত মহাপুৰুষ শ্ৰীশ্ৰী মাধৱদেৱৰ লগতে বাৰ বৈষ্ণৱৰ জন্মস্থান নাৰায়ণপুৰৰ বৰখামটি পথাৰত তথা মণিকাঞ্চন ক্ষেত্ৰত এইবাৰ ৭৭৬ বিঘা মাটিত অহা ৩১ জানুৱাৰীৰ পৰা ৪ ফেব্ৰুৱাৰীলৈ এই অধিৱেশন অনুষ্ঠিত হ’ব৷ অসমৰ সৰ্ববৃহৎ জাতীয় অনুষ্ঠান অসম সাহিত্য সভাৰ নাৰায়ণপুৰ অধিৱেশনক লৈ সকলো এতিয়া ব্যস্ত হৈ পৰাৰ লগতে সমগ্ৰ নাৰায়াণপুৰত এক উৎসৱমুখৰ পৰিৱেশৰ সৃষ্টি হৈছে৷ প্ৰায় ৬ কোটি ৪০ লাখ টকাৰ ব্যয় সাপেক্ষে অনুষ্ঠিত কৰিবলৈ লোৱা এই অধিৱেশন উপলক্ষে ইতিমধ্যে নিৰ্মাণ কৰা বিভিন্ন কাৰ্যালয়, শিবিৰ আদি প্ৰায় সম্পূৰ্ণ হৈ উঠিছে৷ সমান্তৰাল ভাৱে স্মৃতিগ্ৰন্থৰ কামো আগবঢ়াই নিছে উপসমিতিখনে৷ ইতিমধ্যে মণিকাঞ্চন ক্ষেত্ৰত সাহিত্যসভাৰ মুখ্য কাৰ্যালয় নিৰ্মাণ কাৰ্য প্ৰায় সম্পূৰ্ণ হৈ উঠিছে৷ একেদৰে অধিৱেশনলৈ অহা যোৱা কৰাৰ বাবে নিৰ্মাণ কৰা পথসমূহ প্ৰায় সম্পূৰ্ণ হোৱাৰ পথত আগবাঢ়িছে৷ সেইদৰে মণিকাঞ্চন ক্ষেত্ৰত সাজু হৈ উঠিছে বৃহৎ সাংস্কৃতিক মঞ্চ, ভোজনালয়ৰ লগতে ৰান্ধনি গৃহ সমূহ৷ মূল মণ্ডপৰ লগতে প্ৰদৰ্শনী, গ্ৰন্থমেলা আদিৰ কামকাজ পূৰ্ণগতিত অব্যাহত আছে৷ ইফালে সাহিত্যসভাৰ অধিৱেশন উপলক্ষে বিত্ত সমিতিলৈ বিভিন্ন স্থানৰ পৰা বৰঙণি অহাৰ লগতে সমান্তৰাল ভাৱে খাদ্য সমিতিয়েও থলুৱা খাদ্যৰে অতিথিসকলক আপ্যায়নৰ বাবে সাজু হৈছে৷ উল্লেখনীয় যে সুদীৰ্ঘ কালৰ পিছত নাৰায়ণপুৰত এই অধিৱেশন অনুষ্ঠিত কৰাক লৈ সকলোশ্ৰেণীৰ লোকে হাত উজান দিছে৷ অধিৱেশনস্থলীত তেনেদৰে পোহৰ, পানী যোগান, তোৰণ আদিৰ কামো উপ-সমিতিসমূহে যুদ্ধকালীন প্ৰস্তুতিৰে চলাই নিয়া পৰিলক্ষিত হৈছে৷