আকাশলৈ উভতিব ‘ম্ৰিয়া’

শতাব্দ ষ্টাফ ৰিপ’ৰ্টাৰ, ২৯ নৱেম্বৰ : ধ্বংস হৈ গ’ল; কিন্তু ধ্বংসাৱশেষৰ পৰা ফিনিক্সৰ দৰে জী উঠিবলৈ গৈ আছে। নাম এণ্টন’ভ-২২৫। ৰাছিয়াৰ আক্ৰমণত ধ্বংস হৈছিল। এই বিমানখন ‘ম্ৰিয়া’ নামেৰে জনাজাত। ইউক্ৰেইনৰ mrya শব্দৰ অৰ্থ— সপোন। আনুষ্ঠানিকভাৱে ই আছিল বিশ্বৰ সৰ্ববৃহৎ মালবাহী বিমান। ইয়াৰ ক্ষমতা বয়িং ৭৪৭তকৈ প্ৰায় দুগুণ। ইয়াৰ ডেউকাৰ দৈৰ্ঘ্য ২৭৫ ফুট পৰ্যন্ত বিস্তৃত হ’ব পাৰে। বৰ্তমানলৈকে ই আটাইতকৈ গধুৰ আৰু বৃহৎ বিমান।

২৭ ফেব্ৰুৱাৰীত ইউক্ৰেইনৰ বৈদেশিক মন্ত্ৰী ড্মাইট্ৰ’ কুলেবাই টুইট কৰি ৰাছিয়াৰ আক্ৰমণত বিমানখন ধ্বংস হোৱা বুলি উল্লেখ কৰিছিল। তেওঁ সেইদিনা লিখিছিল— ৰাছিয়াই হয়তো ‘ম্ৰিয়া’ক ধ্বংস কৰিলে… কিন্তু তেওঁলোকে আমাৰ শক্তিশালী, স্বাধীন আৰু গণতান্ত্ৰিক ইউৰোপীয় ৰাষ্ট্ৰৰ সপোন কেতিয়াও ধ্বংস কৰিব নোৱাৰে! এণ্টন’ভ কোম্পানীয়ে কয় যে আক্ৰমণৰ পিছত বিমানখনৰ কি হ’ল সেয়া সঠিকভাৱে বুজি পোৱা নাই। অৱশ্যে সাংবাদিক ভাস্কো কোট’ভিউৱে কয় যে তেওঁ এপ্ৰিল মাহত এই বিমানখন দেখিছিল। প্ৰত্যক্ষ গুলীত বিমানখনৰ সন্মুখভাগ সম্পূৰ্ণৰূপে ধ্বংস হয়। ভাস্কোৱে কয় যে বিমানখনৰ ডেউকা আৰু কেইবাটাও ইঞ্জিন বেয়াকৈ ক্ষতিগ্ৰস্ত হৈছে। যদিও আক্ৰমণত বিমানখনৰ পিছফালৰ অংশত কোনো ডাঙৰ ক্ষতি হোৱা নাছিল, তথাপি গুলী বা গোলা বিস্ফোৰণৰ ফলত কিছু ফুটা হৈছিল। এণ্টন’ভ কোম্পানীয়ে এক বিবৃতিত কয় যে প্ৰদৰ্শনী মুকলিৰ সময়ত ইউক্ৰেইনৰ ৰাষ্ট্ৰদূত অলেক্সি মেকিয়েভে কয় যে তেওঁ এএনৰ প্ৰায় সকলো বিমান উৰুৱাইছে। ইয়াৰ পিছতো ম্ৰিয়া তেওঁৰ বাবে সপোন। আমি আশা কৰোঁ এই বিমানখন সঠিকভাৱে মেৰামতি কৰা হ’ব আৰু আমি এই শক্তিশালী চৰাইটোক পুনৰ আকাশত দেখা পাম বুলিও তেওঁ কয়।

১৯৮০ চনত ছোভিয়েট মহাকাশ যান পৰিবহণৰ বাবে ম্ৰিয়াক বিকশিত কৰা হৈছিল। ১৯৮৮ চনৰ পৰাই ইয়াৰ উৰণ আৰম্ভ হয়। তাৰ পিছত ম্ৰিয়াই কিমান ৰেকৰ্ড গঢ়িছে তাৰ কোনো ধাৰণা নাই। নিজা বৈশিষ্ট্যত ম্ৰিয়া অনন্য।