শতাব্দ ষ্টাফ ৰিপ’ৰ্টাৰ, ৮ ছেপ্টেম্বৰ : জলবায়ু পৰিৱৰ্তনৰ ফলত সঘনাই চৰম গ্ৰীষ্ম প্ৰবাহ আৰু বন্য অগ্নিকাণ্ডৰ সৃষ্টি হৈছে। ফলত সমগ্ৰ বিশ্বতে বায়ুৰ গুণাগুণ দিনক দিনে বেয়া হৈ যাব ধৰিছে। ইয়াৰ ফলত মানুহৰ স্বাস্থ্য আৰু পৰিৱেশৰ বহু ক্ষতি হ’ব। এই সতৰ্কবাণী ৭ ছেপ্টেম্বৰত জাৰি কৰিছে ৰাষ্ট্ৰসংঘই। ৰাষ্ট্ৰসংঘৰ বিশ্ব বতৰ বিজ্ঞান সংস্থাই এক প্ৰতিবেদন প্ৰকাশ কৰিছে। তাত তেওঁলোকে সকীয়াই দিছে যে আগন্তুক শতিকাত প্ৰদূষণ আৰু জলবায়ু পৰিৱৰ্তনে কোটি কোটি লোকৰ ক্ষতি কৰিব। এই আগতীয়া দুৰ্যোগৰ পৰা বিশ্বক ৰক্ষা কৰিবলৈ আগতীয়াকৈ ব্যৱস্থা গ্ৰহণৰ আহ্বান জনাইছে ৰাষ্ট্ৰসংঘই। বিশ্ব বতৰ বিজ্ঞান সংস্থাই ২০২১ চনত সমগ্ৰ চাইবেৰিয়া আৰু উত্তৰ আমেৰিকাত হোৱা বন্য অগ্নিকাণ্ডৰ প্ৰভাৱৰ বিষয়ে তেওঁলোকৰ বায়ু গুণগত মান আৰু জলবায়ু বুলেটিনত অধ্যয়ন কৰিছে। প্ৰতিবেদনত দেখা গৈছে যে বন্য অগ্নিকাণ্ডৰ ফলত হোৱা স্বাস্থ্যজনিত বিপদ বহু পৰিমাণে বৃদ্ধি পাইছে। পূব চাইবেৰিয়াৰ বায়ু প্ৰদূষণো শেহতীয়াকৈ দেখা নোপোৱা মাত্ৰাত উপনীত হৈছে। ২.৫ মাইক্ৰ’মিটাৰতকৈ কম ব্যাসৰ সৰু সৰু কণাবোৰক বিশেষভাৱে ক্ষতিকাৰক বুলি ধৰা হয়। এই কণাবোৰ হাওঁফাওঁ বা শ্বাস-প্ৰশ্বাসতন্ত্ৰত প্ৰৱেশ কৰে। বিশ্ব বতৰ বিজ্ঞান সংস্থাৰ মুৰব্বী পাটাৰী তালাছে কয় যে বিশ্ব উষ্ণতাৰ লগে লগে বন্য অগ্নিকাণ্ড আৰু ইয়াৰ লগত জড়িত বায়ু প্ৰদূষণ বৃদ্ধি পোৱাৰ সম্ভাৱনা আছে। সামগ্ৰিকভাৱে মানৱ স্বাস্থ্যৰ ওপৰত ইয়াৰ নেতিবাচক প্ৰভাৱ পৰিব। ইয়াৰ উপৰি ই পৰিৱেশ তন্ত্ৰতো ব্যাপক প্ৰভাৱ পেলাব। বায়ুমণ্ডলৰ পৰা পৃথিৱীৰ পৃষ্ঠলৈ প্ৰদূষণ বিয়পি পৰিব। যোৱা দুটা দশকত বন্য অগ্নিকাণ্ডৰ ফলত ক্ষতিগ্ৰস্ত হোৱা অঞ্চল ক্ৰমান্বয়ে হ্ৰাস পাইছে। কাৰণ ঘাঁহনি আৰু ছাভানা অঞ্চলত জুই হ্ৰাস পাইছে। ৰাষ্ট্ৰসংঘৰ তথ্য অনুসৰি উত্তৰ আমেৰিকা, আমাজন আৰু অষ্ট্ৰেলিয়াৰ অঞ্চলত বন্য অগ্নিকাণ্ড বৃদ্ধি পাইছে। বন্য অগ্নিকাণ্ডৰ উপৰি জলবায়ুৰ উষ্ণতা বৃদ্ধিয়ে প্ৰদূষণ বৃদ্ধি কৰিব পাৰে। উষ্ণ জলবায়ুৱে বায়ুৰ গুণাগুণ বেয়া কৰিব পাৰে। পাটাৰী তালাছে কয় যে, ইউৰোপ আৰু চীনত চলিত বৰ্ষত ব্যাপক প্ৰাদুৰ্ভাৱ দেখা গৈছে। ইয়াৰ লগত যোগ হৈছে উচ্চ বায়ুমণ্ডলীয় অৱস্থা, তীব্ৰ সৌৰ তাপ আৰু লেহেমীয়া বতাহৰ গতিবেগ। ইয়াৰ ফলত প্ৰদূষণৰ পৰিমাণ অধিক হয়। তালাছে লগতে কয়— “আমি আশংকা কৰিছোঁ যে বন্য অগ্নিকাণ্ডৰ পৰিসৰ, তীব্ৰতা আৰু সময়সীমা বৃদ্ধি পাব।” ইয়াৰ ফলত বায়ুৰ গুণাগুণ বেয়া হ’ব পাৰে। তেওঁ এই পৰিস্থিতিৰ এটা নামো দিছে— ‘ক্লাইমেট পেনাল্টি’। যাক আমি প্ৰকৃতিৰ প্ৰতিশোধ বুলিও ক’ব পাৰোঁ।
