ডিব্ৰুগড় বিশ্ববিদ্যালয়ৰ উপাচাৰ্যৰ দ্বাৰা লখিমপুৰ বাণিজ্য মহাবিদ্যালয়ৰ বাৰ্তালোচনী উন্মোচন

উত্তৰ লখিমপুৰ, ৩০ এপ্ৰিলঃ ডিব্ৰুগড় বিশ্ববিদ্যালয়ৰ উপাচাৰ্য ড° লীলা কান্ত নাথে আজি লখিমপুৰ বাণিজ্য মহাবিদ্যালয়ৰ ত্ৰিমাসিক বাৰ্তালোচনী এল্ কম নিউজৰ বৰ্তমানৰ সংখ্যা আৰু সংকলিত সংখ্যা উন্মোচন কৰে। সেই উদ্দেশ্যে মহাবিদ্যালয়ৰ আলোচনা গৃহত এটি গাম্ভীৰ্যপূৰ্ণ অনুষ্ঠানত উপাচাৰ্য ড° নাথে মহাবিদ্যালয়ৰ অধ্যক্ষ তথা শিক্ষক-কৰ্মচাৰী, ছাত্ৰ-ছাত্ৰী আৰু নিমন্ত্ৰিত অতিথিৰ উপস্থিতিত বাৰ্তালোচনীখনি উন্মোচন কৰে। মহাবিদ্যালয়ৰ পৰিচালনা সমিটিৰ সভাপতি ড° মুহিধৰ পূজাৰীয়ে উদ্বোধন কৰা সভাখনৰ উদ্দেশ্য ব্যাখ্যা কৰে বাৰ্তালোচনী কোষৰ সমন্বয়ৰক্ষী আৰু সম্পাদক ড° হৰিণী পাটোৱাৰী দাসে। সভাত লখিমপুৰ বালিকা মহাবিদ্যালয়ৰ অধ্যক্ষ ড° সুৰজিৎ ভূঞা আৰু পানীগাঁও ঔম প্ৰকাশ দিনোদিয়া মহাবিদ্যালয়ৰ অধ্যক্ষ ড° সুৰেশ দত্তই বিশিষ্ট অতিথি হিচাপে অংশগ্ৰহণ কৰে।বাৰ্তালোচনী উন্মোচন কৰি দিয়া ভাষণত উপাচাৰ্য ড° নাথে ইতিমধ্যে পঞ্চাছ বছৰ অতিক্ৰম কৰা লখিমপুৰ বাণিজ্য মহাবিদ্যালয়ত স্নাতকোত্তৰ শ্ৰেণী আৰম্ভ কৰাৰ পৰামৰ্শ দিয়ে। তেখেতে মহাবিদ্যালয়ৰ শিক্ষকসকলক গৱেষণা আৰু সেৱাৰ মনোভাবেৰে মহাবিদ্যালয়লৈ অৰিহণা যোগাবলৈ আহ্বান জনায়।একেটা অনুষ্ঠানতে ত্ৰি-মাসিক বাৰ্তালোচনী এল্ কম নিউজৰ ইণ্টাৰনেট সংস্কৰণ মুকলি কৰে অধ্যক্ষ ড° লোহিত হাজৰিকাই। সভাত লখিমপুৰ বাণিজ্য মহাবিদ্যালয়ৰ পৰিচালনা সমিতিৰ সভাপতি ড° মুহিধৰ পূজাৰী আৰু পানীগাওঁ ওম প্ৰকাশ দিনোদিয়া মহাবিদ্যালয়ৰ অধ্যক্ষ ড° সুৰেশ দত্তই ভাষণ ৰাখে। সভাত উপাচাৰ্য ড° লীলা কান্ত নাথৰ সৈতে এটা মুখামুখি অনুষ্ঠনৰো আয়োজন কৰা হয়। সভাৰ অন্তত শলাগৰ শৰাই আগবঢ়াই অধ্যাপক অচ্যুত কুমাৰ গগৈয়ে।