তিনিচুকীয়াত পথ দুৰ্ঘটনাত নিহত ১ আহত ৩

শতাব্দ ষ্টাফ ৰিপৰ্টাৰ, তিনিচুকীয়া, ১৬ জানুৱাৰী : ভোগালীৰ আনন্দৰ মাজতে তিনিচুকীয়া চহৰৰ উপকণ্ঠৰ গুইজানত আজি বিয়লি সংঘটিত এক ভয়ংকৰ পথ দুৰ্ঘটনাত এজন ব্যক্তিৰ শোকাৱহ মৃত্যু হোৱাৰ লগতে ৩ জন গুৰুতৰভাৱে আহত হয় ৷ স্থানীয় সূত্ৰে জানিব পৰা মতে এ এছ ০৬ জেদ ৬২০০ নম্বৰৰ এখন তীব্ৰবেগী ছুইফ্‌ট গাড়ীয়ে বিপৰীত দিশৰ পৰা অহা এখন যাত্ৰীবাহী অ’টত প্ৰচণ্ড খুন্দা মৰাৰ ফলত অ’ট চালকজন ঘটনাস্থলীতে মৃত্যুমুখত পৰাৰ লগতে আন ৩ জন গুৰুতৰভাৱে আহত হয় ৷ দুৰ্ঘটনাৰ পাছতে ঘটনাক কেন্দ্ৰ কৰি এক উত্তপ্ত পৰিস্থিতিৰ সৃষ্টি হয় ৷ উত্তেজিত ৰাইজে গুইজান-তিনিচুকীয়া পথ অৱৰোধ কৰি আৰক্ষীৰ সন্মুখতে ছুইফ্‌ট গাড়ীখন জ্বলাই দিয়ে ৷ অৱশ্যে পৰিস্থিতিৰ অধিক অৱনতি ঘটাৰ পূৰ্বেই আৰক্ষীয়ে নিয়ন্ত্ৰণলৈ আনিবলৈ সক্ষম হয়৷ দুৰ্ঘটনাত আহতসকলক তৎকালে চিকিৎসালয়লৈ প্ৰেৰণ কৰা হয় ৷ আনহাতে দুৰ্ঘটনা সংঘটিত কৰা ছুইফ্‌ট বাহনখনৰ আৰোহীকেইজনক আৰক্ষীয়ে ৰাইজৰ ৰোষৰ বলি হোৱাৰ পূৰ্বে ঘটনাস্থলীৰ পৰা আঁতৰাই নিয়ে ৷ অৱশ্যে অঞ্চলটোত এতিয়াও চেপা উত্তেজনাই বিৰাজ কৰি আছে