তিনিচুকীয়া পলিটেকনিকৰ পৰা লক্ষাধিক টকাৰ সামগ্রী চুৰি : ধৃত ২ কিশোৰ

শতাব্দ প্ৰতিনিধি, তিনিচুকীয়া, ২ নৱেম্বৰ : তিনিচুকীয়া চহৰৰ উপকণ্ঠৰ শুকানপখুৰী এলেকাত নতুনকৈ স্থাপিত পলিটেকনিক শিক্ষানুষ্ঠানৰ পৰা লক্ষাধিক টকাৰ সামগ্রী চুৰি সন্দৰ্ভত মাকুম আৰক্ষীয়ে দুই কিশোৰক আটক কৰিছে ৷ জানিব পৰা মতে ৩০ অক্টোবৰৰ নিশা পলিটেকনিক শিক্ষানুষ্ঠানখনৰ পৰা ছাত্ৰ-ছাত্ৰীৰ প্ৰশিক্ষণত ব্যৱহৃত লক্ষাধিক টকাৰ সামগ্ৰী চুৰি হৈছিল ৷ এই সন্দৰ্ভত পলিটেকনিকখনৰ অধ্যক্ষৰ অভিযোগৰ ভিত্তিত মাকুম আৰক্ষীয়ে এক অভিযান চলাই শুকানপুখুৰীৰ জংঘল লাইনৰ পৰা চুৰি কাৰ্য্যৰ লগত জড়িত থকাৰ অভিযোগত দুই কিশোৰক আটক কৰে ৷ আটকাধীন কিশোৰদ্বয়ক মাকুম আৰক্ষীয়ে তিনিচুকীয়াস্থিত শিশু ন্যায় পৰিষদলৈ প্ৰেৰণ কৰা বুলি প্ৰকাশ ৷ তাৎপৰ্য্যপূৰ্ণ যে শৈক্ষিক প্ৰতিষ্ঠানখনত তিনিজনকৈ গৃহৰক্ষী জোৱান নিয়োজিত হৈ থকাৰ পাছতো কিদৰে এই চুৰি কাৰ্য্য সংঘটিত হবলৈ পালে তাকে লৈ প্ৰশ্ন উত্থাপিত হৈছে ৷ আনহাতে শিক্ষানুষ্ঠানখনৰ চাৰিসীমাত পকী দেৱাল নিৰ্মাণকে ধৰি অন্যান্য আন্তঃগাঁথনিৰ কামসমূহ কাৰ্য্যকৰি কৰিবলৈ পলিটেকনিক কৰ্তৃপক্ষই ৰাজ্য চৰকাৰক আহ্বান জনাইছে