পানীন্দ্ৰনাথ গগৈ ৰচনাৱলী উন্মোচ
শতাব্দ ষ্টাফ ৰিপৰ্টাৰ, ৮ নৱেম্বৰঃ ‘ঊনবিংশ শতিকাৰ সংকটকালত অসমীয়া ভাষা-সাহিত্যৰ হৈ যুঁজ দিয়া অন্যতম যোদ্ধা আছিল পানীন্দ্ৰনাথ গগৈ৷ যাৰ অৱদান অবিহনে অসমীয়াৰ ভাষিক জাতীয়তাৰ প্ৰতিষ্ঠা অত্যন্ত জটিল হ’লহেঁতেন৷’– এই মন্তব্য বিশিষ্ট সাহিত্যিক তথা অসম সাহিত্য সভাৰ প্ৰাক্তন উপ-সভাপতি ড॰ হেমন্ত কুমাৰ বৰুৱাৰ৷ আজি লখিমপুৰত পানীন্দ্ৰনাথ গগৈ ৰচনাৱলী উন্মোচন কৰি তেওঁ এইদৰে কয়৷ তেওঁ লগতে কয় যে, পানীন্দ্ৰনাথ গগৈৰ বিষয়ে যিদৰে চৰ্চা হ’ব লাগে তেনেদৰে হোৱা নাই৷ নতুন প্ৰজন্মক তেওঁৰ অৱদানৰ বিষয়ে জনোৱাটো জ্যেষ্ঠসকলৰ কৰ্তব্য৷ গগৈৰ ৰচনাৱলীৰ প্ৰকাশে এইক্ষেত্ৰত অৰিহনা যোগাব বুলি তেওঁ আশা প্ৰকাশ কৰে৷ আজি লখিমপুৰৰ আজাদত অনুষ্ঠিত হোৱা এখন গাম্ভীৰ্যপূৰ্ণ সভাত ‘পানীন্দ্ৰনাথ গগৈ ৰচনাৱলী’ উন্মোচন কৰা হয়৷ সভাখনত সভাপতিত্ব কৰে নৰ্থ লখিমপুৰ কলেজৰ অধ্যক্ষ ড॰ বিমান চন্দ্ৰ চেতিয়াই৷ ‘পানীন্দ্ৰনাথ গগৈ ৰচনাৱলী’ সম্পাদনা কৰিছে দায়ৱদ্ধ লেখক তথা অধ্যাপক ড॰ অৰবিন্দ ৰাজখোৱাই৷ গগৈ প্ৰণীত পাঠ্যপুথিসমূহৰ উপৰিও ‘জোনাকী’ আৰু ‘বিজুলী’ আলোচনীত প্ৰকাশিত গগৈৰ প্ৰবন্ধ আৰু কবিতাসমূহো এই ৰচনাৱলীত সন্নিৱিষ্ট হৈছে৷ লগতে গগৈৰ জীৱন আৰু কৃতিৰ বিষয়ে পূৰ্বে পদ্মনাথ গোহাঞিবৰুৱা, ভ্ৰমৰ শইকীয়া, নন্দ তালুকদাৰ, চিৰাজুল হক বৰুৱা, ফণীধৰ বৰগোহাঞি আদি ব্যক্তিয়ে লিখা কেইটামান গুৰুত্বপূৰ্ণ প্ৰবন্ধও ইয়াত প্ৰকাশ কৰা হৈছে৷ প্ৰায় ৩৫ পৃষ্ঠাৰ এখন বিদ্যায়তনিক পাতনিৰে ড॰ ৰাজখোৱাই ৰচনাৱলীখনক সমৃদ্ধ কৰিছে৷ নিজৰ ভাষণত ড॰ ৰাজখোৱাই কয় যে– ‘পানীন্দ্ৰনাথ গগৈ আমাৰ জাতিটোৰ বাবে প্ৰাতঃস্মৰণীয় ব্যক্তি৷ বৰ্তমানে অসমীয়া ভাষা-সাহিত্যৰ প্ৰতি যিবোৰ ভাবুকি জন্ম হৈছে সেয়া প্ৰতিহত কৰিবলৈ হ’লে গগৈৰ দৰে ব্যক্তিৰ কামৰপৰা প্ৰেৰণা আৰু কৌশল আহৰণ কৰাটো বৰ জৰুৰী৷ তেনে প্ৰেক্ষাপটতে বহল পাঠক সমাজৰ বাবে ৰচনাৱলীখন প্ৰকাশ কৰা হৈছে৷’ আজিৰ সভাখনত উপস্থিত থাকি গগৈৰ কৃতি সম্পৰ্কে মন্তব্য আগবঢ়ায় মাজুলীৰ ৰঙাচাহী মহাবিদ্যালয়ৰ সহকাৰী অধ্যাপক ৰাজীৱ হাজৰিকাই৷ উল্লেখযোগ্য যে তেওঁ পানীন্দ্ৰনাথ গগৈ কৰ্ম আৰু কৃতি সম্পৰ্কে গৱেষণা কৰি আছে৷ নৰ্থ লখিমপুৰ কলেজৰ ভূগোল বিভাগৰ মুৰব্বী ড॰ স্বপ্নালী গগৈ, অসমীয়া বিভাগৰ ড॰ ধীৰাজ পাটৰ, মুন্মী দত্ত, সাহিত্যানুৰাগী বগীতৰা বৰুৱাকে ধৰি ভালেসংখ্যক গৱেষকে মুকলি আলোচনাত ভাগ লয়৷ ‘পানীন্দ্ৰনাথ গগৈ ৰচনাৱলী’ প্ৰকাশ কৰিছে অসমৰ সম্ভ্ৰান্ত প্ৰকাশন প্ৰতিষ্ঠান বনলতাই৷ বনলতাৰ তৰফৰপৰা জনায় যে বৰ্তমান এই ৰচনাৱলী গুৱাহাটী, ডিব্ৰুগড়কে ধৰি সকলো নগৰৰ গ্ৰন্থ বিপণিত পোৱা যাব আৰু লগতে এমাজনৰ পৰা ‘অনলাইন’ কিনিবও পৰা যাব।
