বিশ্বকাপৰ ছেমিত আজি মেছি আৰু মড্ৰিচৰ যুঁজ

শতাব্দ ষ্টাফ ৰিপ’ৰ্টাৰ, ১৩ ডিচেম্বৰ : আজি নিশা (মঙলবাৰ) কাটাৰত অনুষ্ঠিতব্য বিশ্বকাপৰ প্ৰথমখন ছেমি ফাইনেলত আৰ্জেণ্টিনা আৰু ক্ৰ’ৱেচিয়া মুখামুখি হ’ব। পূৰ্বে বিশ্বকাপত যেতিয়া ক্ৰ’ৱেচিয়া ফাইনেলত প্ৰৱেশ কৰিছিল, তেতিয়া বহুতৰে মতে সেয়া আছিল অপ্ৰত্যাশিত আৰু অনন্য। এতিয়া ক্ৰ’ৱেচিয়া পুনৰ ফাইনেলৰ পথত। আনহাতে, আৰম্ভণিতে ছৌদি আৰৱৰ বিৰুদ্ধে অভাৱনীয় পৰাজয়ৰ পিছত এতিয়ালৈকে আৰ্জেণ্টিনা সতেজ আৰু শক্তিশালী।

প্ৰতিযোগিতাখনৰ পূৰ্বে আৰ্জেণ্টিনাক বিশ্বকাপ জয়ৰ বাবে ফেভাৰিট হিচাপে গণ্য কৰা হৈছিল। লিয়নেল মেছিয়ে সেই কথা প্ৰমাণ কৰিছে। ছেমি ফাইনেলৰ পূৰ্বে মেছি আৰু মড্ৰিচৰ বিষয়ে আলোচনা। লিয়নেল মেছি আৰু লুকা মড্ৰিচ— দুয়োজনেই এল এম টেনছ, ১০ নম্বৰৰ জাৰ্চি পিন্ধা, দুয়োজনেই বেলন ডি অৰ বিজয়ী, দুয়োজনেই ইয়াৰ পূৰ্বে বিশ্বকাপৰ ফাইনেলত পৰাস্ত হৈছিল, দুয়োজনেই মূল ফুটবলাৰ আৰু নিজ নিজ দলৰ অধিনায়ক। দুয়োজনে আকৌ এবাৰ বিশ্বকাপৰ ফাইনেল খেলাৰ সুযোগ লাভ কৰিছে আৰু এইবাৰ খিতাপ দখল কৰাৰ সোণালী সুযোগ লাভ কৰিছে।

আৰ্জেণ্টিনাৰ লিয়নেল মেছি, ক্ৰ’ৱেচিয়াৰ লুকা মড্ৰিচ দুগৰাকী ছুপাৰষ্টাৰ যিয়ে নিজৰ নিজৰ দললৈ পৰিৱৰ্তন আনিছে। এতিয়া সন্মুখৰ পৰা আগবাঢ়ি আছে মেছি। স্ক’ৰিং আৰু স্ক’ৰিং। বিৰোধী ফুটবলাৰ, প্ৰশিক্ষকক সুযোগ পালে হাত দেখুৱাইছে। ৰেফাৰীৰ লগত তৰ্ক।

মড্ৰিচ অলপ তললৈ নামি খেলি আছে। তেওঁ খেলত ক্ৰ’ৱেচিয়াৰ ইঞ্জিন হিচাপে কাম কৰি আছে। ব্ৰাজিলৰ বিৰুদ্ধে কোৱাৰ্টাৰ ফাইনেলত মড্ৰিচে প্ৰায়ে ৰক্ষণাত্মকভাৱে খেলিছিল। মড্ৰিচৰ লং পাছে ক্ৰ’ৱেচিয়াৰ হৈ সমতা স্থাপন কৰা গ’লটোত অৰিহণা যোগাইছিল। মেছিৰ বয়স ৩৫, মড্ৰিচৰ বয়স ৩৭। কাটাৰত অনুষ্ঠিত এই বিশ্বকাপত তেওঁলোকে কেৰিয়াৰৰ শেষৰখন বিশ্বকাপ খেলিছে বোধহয়। আৰ্জেণ্টিনাৰ ডিফেণ্ডাৰ নিকোলাছ টাগ্লিয়াফিকোৱে দলটোত মেছিৰ উপস্থিতি এটা সুবিধা বুলি ভাবে।

এই বিশ্বকাপৰ ছেমি ফাইনেলত প্ৰৱেশ কৰিবলৈ আৰ্জেণ্টিনাই মুঠ ৯টা গ’ল দিছে। তাৰ ভিতৰত ৬টা গ’লত প্ৰত্যক্ষভাৱে অৰিহণা যোগাইছে লিয়নেল মেছিয়ে। চাৰিটা নিজে কৰা, দুটা কৰাইছে। ইয়াৰ ভিতৰত নেদাৰলেণ্ডৰ বিৰুদ্ধে মলিনাৰ সৈতে মেছিয়ে যি গ’ল দিছিল সেয়া আছিল বিশ্বকাপৰ অন্যতম শ্ৰেষ্ঠ এছিষ্ট। টাগ্লিয়াফিকোৰ মতে মেছি দলৰ নেতা আৰু তেওঁ গোটেই দলটোৰ বাবে প্ৰেৰণা।

এইবাৰৰ বিশ্বকাপ মেছিৰ বাবে পঞ্চমটো বিশ্বকাপ। এইবাৰ মেছিয়ে নিজৰ দেশৰ ফুটবল ইতিহাসত নায়ক হ’ব বিচাৰিব। ১৯৮৬ চনত ডিয়েগ’ মাৰাড’নাই বিশ্বকাপ জয় কৰাৰ পিছত আৰ্জেণ্টিনা পুনৰ জয়ী হোৱা নাই। এইটোৱেই হয়তো মেছিৰ বাবে শেষ সুযোগ। আৰ্জেণ্টিনাৰ হৈ বিশ্বকাপত সৰ্বাধিক গ’লৰ তালিকাত ১০টা গ’লৰ সৈতে গেব্ৰিয়েল বাটিষ্টাৰ সৈতে যৌথভাৱে শীৰ্ষস্থান দখল কৰিছে মেছিয়ে। মেছি আৰ্জেণ্টিনাৰ বাবে অতিৰিক্ত পাওনা আহিছে যে বিশ্বকাপত এটা ডাঙৰ দলৰ সৈতে খেলিছে, যিটো দলে বিশ্বকাপ জয়ৰ সপোন দেখিছে। মিডফিল্ডত ৰড্ৰিগো ডি পল, দুফালে মলিনা আৰু আকুনা, ডিফেন্সত লিজাণ্ড্ৰ’ মাৰ্টিনেজ আৰু পোষ্টত এমিলিয়ানো মাৰ্টিনেজ।

যদিও লুকা মড্ৰিচৰ দলটোৱে বিশ্বকাপ জয় কৰিব নোৱাৰে, তথাপি দেশখনে এই প্ৰজন্মৰ ফুটবলাৰক বহুদিনলৈ মনত ৰাখিব। একেৰাহে দুটা বিশ্বকাপত ফাইনেললৈ যোৱাৰ পথত ক্ৰ’ৱেচিয়া। চাৰি মিলিয়নৰ অলপ কম লোকৰ বাসস্থান ক্ৰ’ৱেচিয়া হৈছে ব্ৰাজিল আৰু আৰ্জেণ্টিনাৰ বিৰুদ্ধে একেটা বিশ্বকাপত জয় লাভ কৰা মাত্ৰ দ্বিতীয়খন দেশ। ইয়াৰ পূৰ্বে দলটোৱে ২০১৪ চনত জাৰ্মানী, ব্ৰাজিল আৰু আৰ্জেণ্টিনাৰ বিৰুদ্ধে জয়লাভ কৰিছিল। প্ৰশিক্ষক ঝ্লাটকো ডালিচে অনুভৱ কৰিছে যে ২০১৮ চনৰ ছেমি ফাইনেলত ইংলেণ্ডৰ বিৰুদ্ধে জয়লাভ আৰু ব্ৰাজিলৰ বিৰুদ্ধে জয়লাভতকৈয়ো বিশেষ আছিল। কিন্তু আৰ্জেণ্টিনাৰ বিৰুদ্ধে জয়লাভ হ’লে সৰ্বোত্তম হ’ব বুলি কয় ক্ৰ’ৱেচিয়াৰ প্ৰশিক্ষকগৰাকীয়ে। তেওঁ কয়— “আমি এতিয়া বিশ্বৰ শীৰ্ষ চাৰিটা দলৰ ভিতৰত অন্যতম। আমি ইয়াত একেৰাহে দুটা বিশ্বকাপৰ বাবে আহিছোঁ, ক্ৰ’ৱেচিয়াৰ বাবে ই এক ডাঙৰ কৃতিত্ব।’’ এইগৰাকী প্ৰশিক্ষকৰ মতে লিয়নেল মেছিৰ দলটোৰ ওপৰত অধিক হেঁচা পৰিব।

প্ৰতিযোগিতাখনত দুখন হালধীয়া কাৰ্ড পোৱাৰ বাবে আৰ্জেণ্টিনাৰ আকুনা আৰু গনজালো মণ্টিলে ছেমি ফাইনেলত খেলিব নোৱাৰিব। আঘাতৰ পৰা ঘূৰি আহিছে এঞ্জেল ডি মাৰিয়া। ক্ৰ’ৱেচিয়াৰ কোনো আঘাত বা নিলম্বন নাই। এইখন ফিফা বিশ্বকাপৰ তৃতীয়খন খেল হ’ব আৰ্জেণ্টিনা আৰু ক্ৰ’ৱেচিয়াৰ মাজত। ইয়াৰ পূৰ্বে ১৯৯৮ চনত আৰ্জেণ্টিনাই এটা গ’লত জয়লাভ কৰিছিল, ২০১৮ চনত ক্ৰ’ৱেচিয়াই ৩-০ গ’লত জয়লাভ কৰিছিল। কিন্তু আৰ্জেণ্টিনাৰ অনুৰাগীৰ বাবে সুখৰ কথাটো হ’ব পাৰে এই পৰিসংখ্যা বা ইতিহাস যে, আৰ্জেণ্টিনা কেতিয়াও বিশ্বকাপৰ ছেমি ফাইনেলত পৰাস্ত হোৱা নাই।