শতাব্দ ষ্টাফ ৰিপ’ৰ্টাৰ, ১৩ জুলাইঃ চীনা বিজ্ঞানীয়ে উদ্ভাৱন কৰিছে এনে এবিধ ৰবট মাছ, যি সমুদ্ৰ তলীৰ মাইক্ৰ’প্লাষ্টিক শোষণ কৰিব পাৰে। মাইক্ৰ’প্লাষ্টিক শোষণ কৰা এই ৰবট মাছে হয়তো এদিন বিশ্বৰ প্ৰদূষিত মহাসাগৰসমূহ পৰিষ্কাৰ কৰাত সহায় কৰিব। এই দাবী দক্ষিণ-পশ্চিম চীনৰ ছিচুয়ান বিশ্ববিদ্যালয়ৰ চীনা বিজ্ঞানীৰ দল এটাৰ, যি উদ্ভাৱন কৰিছে এই ৰবট মাছ। স্পৰ্শ কৰিবলৈ কোমল আৰু মাত্ৰ ১.৩চে.মি. (০.৫ ইঞ্চি) আকাৰৰ এই ৰবটবোৰে পৰীক্ষাকালত অগভীৰ পানীৰ মাইক্ৰ’প্লাষ্টিক চুহি ল’বলৈ সক্ষম হৈছে। ৰবটটো নিৰ্মাণ কৰা অন্যতম গৱেষক ডাঃ ৱাং ইউয়ানে কয় যে, দলটোৰ লক্ষ্য হৈছে এই ৰবটক গভীৰ পানীত মাইক্ৰ’প্লাষ্টিক সংগ্ৰহ কৰিবলৈ সক্ষম কৰা আৰু বাস্তৱ সময়ত সাগৰীয় প্ৰদূষণ বিশ্লেষণ কৰিবলৈ তথ্য প্ৰদান কৰা। তেওঁ কয়— “আমি এনে এটা লঘু ক্ষুদ্ৰ ৰবট প্ৰস্তুত কৰিলোঁ। ইয়াক বহু ধৰণে ব্যৱহাৰ কৰিব পাৰি, যেনে জৈৱ চিকিৎসা বা বিপজ্জনক অপাৰেচনত, এনে এটা সৰু ৰবট যিটো আপোনাৰ শৰীৰৰ এটা অংশত স্থানীয় কৰি কিছুমান ৰোগ নিৰ্মূল কৰাত সহায় কৰিব পাৰি।” ক’লা ৰবট মাছটোক পোহৰৰ দ্বাৰা বিকিৰিত কৰা হয়, যাৰ ফলত ই ইয়াৰ পাখিবোৰ লৰচৰ কৰি শৰীৰটো লৰচৰ কৰাত সহায় কৰে। আন মাছ বা জাহাজত খুন্দা মৰাৰ পৰা হাত সাৰিবলৈ বিজ্ঞানীসকলে পোহৰ ব্যৱহাৰ কৰি নিয়ন্ত্ৰণ কৰিব পাৰে। যদি ভুলবশতঃ আন মাছে খায় তেন্তে ইয়াক পলিয়ুৰেথেনৰ পৰা তৈয়াৰ কৰা বাবে কোনো ক্ষতি নোহোৱাকৈ হজম কৰিব পাৰে, যিটো জৈৱ-সঙ্গতিপূৰ্ণ বুলি ডাঃ ৱাঙে কয়। এই ৰবট মাছ প্ৰতি ছেকেণ্ডত ২.৭৬ শৰীৰৰ দৈৰ্ঘ্যলৈকে সাঁতুৰিব পাৰে, যিটো বেগ বেছিভাগ কৃত্ৰিম কোমল ৰবটতকৈ অধিক।
