শতাব্দ ষ্টাফ ৰিপ’ৰ্টাৰ, ১ জুলাইঃ মানৱ জাতিৰ উন্নতিৰ স্বাৰ্থত কৰা গৱেষণাৰ বাবে ভাৰতীয় মূলৰ দুজন লোকে আন্তঃৰাষ্ট্ৰীয় ক্ষেত্ৰখনত স্বীকৃতি লাভ কৰিছে। অধ্যাপক অজয় আগৰৱালা আৰু অধ্যাপক পৰমিন্দৰ ৰাইনাই লাভ কৰে কানাডাৰ ৰাষ্ট্ৰীয় বঁটা ‘দ্য অৰ্ডাৰ অৱ কানাডা’। সেই দেশৰ গৱৰ্ণৰ জেনেৰেলৰ কাৰ্যালয়ৰ পৰা অধ্যাপক দুজনক এই বঁটা প্ৰদান কৰা হৈছে। ১৯৮৬ চনৰ পৰা কানাডাত এই সন্মান প্ৰদান কৰা হৈ আহিছে। এই বঁটা আৰম্ভ কৰিছিল কানাডাৰ দ্বিতীয় ৰাণী এলিজাবেথে। কানাডাত চলিত বৰ্ষত ‘দ্য অৰ্ডাৰ অৱ কানাডা’ৰে সন্মানিত হোৱাসকলৰ এখন তালিকা গৱৰ্ণৰ জেনেৰেল মেৰী চাইমনৰ কাৰ্যালয়ৰ পৰা মুকলি কৰা হৈছে। মুঠ ৭৫জনীয়া নামৰ এখন তালিকা প্ৰকাশ কৰা হৈছে। ইয়াৰ ভিতৰত আছে অজয় আৰু পৰমিন্দৰ। তেওঁলোকক কিয় এই সন্মান দিয়া হৈছে সেই কথাও তালিকাত উল্লেখ আছে। আনুষ্ঠানিক বিবৃতিত কোৱা হৈছে যে, অজয়ক এজন শিক্ষাবিদ-উদ্যোগী হিচাপে দূৰদৰ্শী নেতৃত্বৰ বাবে আৰু শৈক্ষিকসকলৰ গুৰু হিচাপে কাম কৰাৰ বাবে তেওঁক দ্য অৰ্ডাৰ অৱ কানাডাৰ সন্মানিত কৰা হৈছে। আনহাতে কানাডাত জনস্বাস্থ্য, বিশেষকৈ বৃদ্ধসকলৰ স্বাস্থ্য উন্নত কৰাৰ বাবে প্ৰকল্প ৰূপায়ণৰ বাবে পৰমিন্দৰৰ নাম বাছনি কৰা হৈছে। উল্লেখ্য যে, পৰমিন্দৰ অন্টাৰিঅ’ৰ হেমিল্টনৰ মেকমাষ্টাৰ বিশ্ববিদ্যালয়ৰ ক্লিনিকেল এপিডেমিঅ’লজি আৰু বায়’ষ্টেটিষ্টিকছ বিভাগৰ অধ্যাপক।
