লখিমপুৰ বাণিজ্য মহাবিদ্যালয়ত বিশ্ব জল দিৱস পালন

উত্তৰ লখিমপুৰঃ ২২ মাৰ্চঃ লখিমপুৰ বাণিজ্য মহাবিদ্যালয়ত আজি শেষ টোপাললৈকে পানী ৰাহি কৰাৰ আহ্বানৰে বিশ্ব জল দিৱস পালন কৰা হয়। সেই উপলক্ষে মহাবিদ্যালয়খনৰ ইকো ক্লাবৰ উদ্যোগত অনুষ্ঠিত এখন সভা উদ্বোধন কৰে অধ্যক্ষ ড০ লোহিত হাজৰিকাই। উদ্বোধনী ভাষণত অধ্যক্ষ ড০ হাজৰিকাই দিৱসটোৰ তাৎপৰ্যৰ বিষয়ে উল্লেখ কৰি কয় যে এই বৰ্ষৰ জল দিৱসৰ বিষয় পানী আৰু অনাময় সংকট সমাধানৰ বাবে পৰিৱৰ্তন ত্বৰান্বিত কৰা বিষয়বস্তুৰ সৈতে বিশদভাৱে কয়। তেওঁ কয় যে পৃথিৱীত পানীৰ মজুত দ্ৰুতগতিত কমি আহিছে আৰু এই সংকটে ইতিমধ্যে ভাৰতৰ নগৰ অঞ্চলকে ধৰি বিশ্বৰ বহু ঠাইত প্ৰভাৱিত কৰিছে। তেওঁ ছাত্ৰ-ছাত্ৰীসকলক অনুকূল ব্যৱহাৰৰ সৈতে পানী সংৰক্ষণৰ ক্ষেত্ৰত যথেষ্ট সচেতন হ’বলৈ আৰু সমাজে সন্মুখীন হোৱা অনাময় সমস্যাসমূহ সলনি কৰাৰ দিশত কাম কৰিবলৈ আহ্বান জনায়। জল সংৰক্ষণৰ ওপৰত স্কুলীয়া ছাত্ৰ-ছাত্ৰীয়ে লোৱা ভূমিকাৰ বিষয়ৰ “তপক তপক” নামৰ এখন চুটি ছবি সেই কাৰ্যসূচীত মহাবিদ্যালয়খনৰ ইকো ক্লাবে প্ৰদৰ্শন কৰে। সেই উপলক্ষে ছাত্ৰ-ছাত্ৰীসকলৰ বাবে পানীৰ বিভিন্ন বিষয়ত কুইজ প্ৰতিযোগিতাৰো আয়োজন কৰা হয়। কুইজ প্ৰতিযোগিতাখন পৰিচালনা কৰে অধ্যাপক পংকজ লোচন দাস আৰু অধ্যাপক দীপ জান গোহাঁয়ে। অনুষ্ঠানত উপাধ্যক্ষ গোপাল কুমাৰ চেত্ৰী, অধ্যাপক ড° অৰূপা দত্ত, ড° ৰূপজ্যোতি ভট্টাচাৰ্জী, ড° হৰিণী পাটোৱাৰী দাস, কুলদীপ নাৰায়ণ দত্ত আৰু প্ৰসন্ত বৰাও উপস্থিত থাকে। লখিমপুৰ বাণিজ্য মহাবিদ্যালয়ৰ ইকো ক্লাবৰ সমন্বয়ক তৰুণ কুমাৰীৰ শলাগৰ শৰাইৰে অনুষ্ঠানৰ সামৰণি পৰে।