শতাব্দ ষ্টাফ ৰিপ’ৰ্টাৰ, ৩০ নৱেম্বৰ : ১ ডিচেম্বৰৰ পৰা আৰম্ভ হ’ব খুচুৰা ডিজিটেল মুদ্ৰাৰ প্ৰথমটো পাইলট প্ৰজেক্ট। ভাৰতীয় ৰিজাৰ্ভ বেংকে মঙলবাৰে (২৯ নৱেম্বৰ) এই ঘোষণা কৰে। এই পাইলট প্ৰজেক্ট নিৰ্বাচিত স্থান আৰু নিৰ্বাচিত গ্ৰাহক আৰু ব্যৱসায়ীৰ এটা গোটত সীমাবদ্ধ থাকিব বুলি আৰ বি আয়ে জানিবলৈ দিছে। এই পৰ্যায়ত ৮টা বেংকে অংশগ্ৰহণ কৰিব যদিও প্ৰথম পৰ্যায়ত চাৰিটা বেংকেহে অংশগ্ৰহণ কৰিব। এই বেংকসমূহ হ’ল— ভাৰতীয় ষ্টেট বেংক, আইচিআইচিআই বেংক, য়েছ বেংক আৰু আইডিএফচি ফাৰ্ষ্ট বেংক। ইয়াৰ উপৰি বেংক অৱ বৰোদা, ইউনিয়ন বেংক অৱ ইণ্ডিয়া, এইচ ডি এফ চি বেংক আৰু কোটক মহিন্দ্ৰা বেংকে পিছত এই পাইলট প্ৰজেক্টত যোগদান কৰিব। আৰ বি আইৰ বিবৃতিত কোৱা হৈছে— ‘‘প্ৰথমে এই পাইলট প্ৰজেক্ট চাৰিখন চহৰ— মুম্বাই, নতুন দিল্লী, বেংগালুৰু আৰু ভুৱনেশ্বৰত ব্যৱহাৰ কৰা হ’ব। পৰৱৰ্তী সময়ত আহমেদাবাদ, গেংটক, গুৱাহাটী, হায়দৰাবাদ, ইন্দোৰ, কোচি, লক্ষ্ণৌ, পাটনা আৰু চিমলাৰ খুচুৰা বজাৰত ডিজিটেল মুদ্ৰাৰ সেৱা উপলব্ধ হ’ব। এই পাইলট প্ৰজেক্টৰ পৰিসৰ ক্ৰমান্বয়ে বৃদ্ধি কৰা হ’ব। প্ৰয়োজন অনুসৰি অধিক বেংক, ব্যৱহাৰকাৰী আৰু স্থান অন্তৰ্ভুক্ত কৰা হ’ব পাৰে।” আৰ বি আয়ে লগতে কয় যে পাইলট প্ৰকল্পটোৰ লক্ষ্য হৈছে ডিজিটেল টকাৰ সৃষ্টি, বিতৰণ আৰু খুচুৰা ব্যৱহাৰৰ সমগ্ৰ প্ৰক্ৰিয়াটো বাস্তৱ সময়ত পৰীক্ষা কৰা। এই পাইলট প্ৰকল্পৰ পৰা শিকি অহাসমূহ পৰৱৰ্তী পাইলট প্ৰকল্পসমূহত টোকেন আৰু আৰ্কিটেকচাৰৰ বিভিন্ন বৈশিষ্ট্য আৰু প্ৰয়োগ পৰীক্ষা কৰিবলৈ ব্যৱহাৰ কৰা হ’ব। বৰ্তমান কাগজৰ মুদ্ৰা আৰু মুদ্ৰা যি হাৰত জাৰি কৰা হয়, সেই হাৰত ডিজিটেল মুদ্ৰাৰ বজাৰ কৰা হ’ব। বেংকৰ জৰিয়তে বিতৰণ কৰা হ’ব। বেংকে প্ৰদান কৰা ডিজিটেল ৱালেট আৰু মোবাইল ফোন বা অন্যান্য স্মাৰ্ট ডিভাইচত সংৰক্ষণ কৰা ডিজিটেল মুদ্ৰাৰ জৰিয়তে ব্যৱহাৰকাৰীয়ে সহজেই বিত্তীয় লেনদেন কৰিব পাৰে। আৰ বি আইৰ মতে ডিজিটেল মুদ্ৰা আৰু নগদ ধনৰ মাজত বিশেষ পাৰ্থক্য নাথাকিব। ‘ব্যক্তিৰ পৰা ব্যক্তিলৈ’ আৰু ‘ব্যক্তিৰ পৰা ব্যৱসায়ীলৈ’ এই মুদ্ৰা ব্যৱহাৰ কৰি দুবিধ আৰ্থিক লেনদেন কৰিব পাৰি। ব্যৱসায়িক স্থানত QR ক’ড ব্যৱহাৰ কৰিও ব্যৱসায়ীক ধন দিব পাৰিব।
