শতাব্দ ষ্টাফ ৰিপ’ৰ্টাৰ, ১৬ ছেপ্টেম্বৰ : শেহতীয়াকৈ চলোৱা এক অধ্যয়নত প্ৰকাশ পাইছে যে যোৱা ৩০ বছৰত ১১ লাখৰো অধিক সাগৰীয় কাছ অবৈধভাৱে হত্যা কৰা হৈছে। এৰিজোনা ষ্টেট ইউনিভাৰ্চিটিৰ বিজ্ঞানীসকলৰ মতে, যোৱা দহ বছৰত ৬৫খন দেশত বছৰি কমেও ৪৪ হাজাৰ কাছ অবৈধভাৱে হত্যা কৰি ৰপ্তানি কৰা হৈছে, যদিও ইয়াক সুৰক্ষাৰ বাবে ৰচনা কৰা আইন প্ৰণয়ন কৰা হৈছে। ৰাষ্ট্ৰসংঘই জনোৱা মতে, সৰবৰাহ আৰু চিকাৰকে ধৰি বিশ্বৰ অবৈধ বন্যপ্ৰাণী বজাৰখনৰ মূল্য বছৰি ২৩ বিলিয়ন ডলাৰ হ’ব। অধ্যয়নটোৰ প্ৰধান লেখক জেছি চেংকোৱে কয় যে কাছবোৰ মাংস আৰু খোলাৰ বাবে হত্যা কৰা হৈছিল আৰু ইয়াৰ অংশবোৰ ব্যৱহাৰ কৰি গহনা, শিল্পকৰ্ম আৰু পৰম্পৰাগত ঔষধ তৈয়াৰ কৰা হৈছে। চেংকোৱে এই প্ৰজাতিটোক সংকটজনকভাৱে বিপন্ন বুলি শ্ৰেণীভুক্ত কৰিছে। গৱেষকসকলে সংৰক্ষণ সংস্থাসমূহৰ পৰা ২০৯টাতকৈও অধিক বিভিন্ন পৰ্যালোচিত প্ৰবন্ধ, প্ৰতিবেদন আৰু জৰীপ পৰীক্ষা কৰি অবৈধ কাছ চিকাৰৰ পৰিসৰ নিৰ্ণয় কৰে। গ্ল’বেল চেঞ্জ বায়’লজি নামৰ আলোচনীত প্ৰকাশ কৰা হৈছে এই গৱেষণাপত্ৰ। প্ৰতিবেদন অনুসৰি ১৯৯০ চনৰ পৰা ২০১০ চনৰ ভিতৰত ৪৩ হাজাৰতকৈ অধিক কাছ চোৰাংভাৱে সৰবৰাহ হৈছিল যদিও চেংকোৱে এই তথ্য কম বুলি বিশ্বাস কৰে। অধ্যয়নটোত দাবী কৰা হৈছে যে দক্ষিণ-পূব এছিয়া আৰু মাদাগাস্কাৰ অবৈধ চিকাৰৰ বাবে প্ৰধান স্থান। ভিয়েটনামত অবৈধ সাগৰীয় কাছৰ ব্যৱসায়ৰ অধিকাংশই আছে আৰু অবৈধ কাছৰ সামগ্ৰীৰ দুখন সাধাৰণ বজাৰ হৈছে চীন আৰু জাপান। চেংকোৱে কয় যে যেতিয়ালৈকে উচ্চ আয়ৰ ৰাষ্ট্ৰসমূহে কাছক বিলাসী সামগ্ৰী হিচাপে বিচাৰি থাকিব, তেতিয়ালৈকে উন্নয়নশীল ৰাষ্ট্ৰসমূহে ইয়াক যোগান ধৰি থাকিব। বিগত ১০ বছৰত অবৈধ সাগৰীয় কাছৰ শোষণ ২৮ শতাংশ হ্ৰাস পোৱা বুলি প্ৰতিবেদনত অনুমান কৰা হৈছে। ই হৈছে প্ৰতিবেদনখনৰ অন্যতম উৎসাহজনক তথ্য। চেংকোৱে কয় যে এই তথ্যৰ সহায়ত কোনবোৰ কাছ আৰু ক’ত চিকাৰ কৰা হৈছে সেই কথা জানিব পাৰি। ইয়াৰ দ্বাৰা ভৱিষ্যতে সাগৰীয় কাছৰ সংখ্যা সুৰক্ষিত কৰাৰ বাবে পৰিৱেশবিদ আৰু সাংসদসকলে কি পদক্ষেপ ল’ব লাগে সেই বিষয়ে বুজিবলৈ পথ প্ৰশস্ত কৰিব পাৰে।
