শতাব্দ প্ৰতিনিধি তেজপুৰ, ২৮ ছেপ্টেম্বৰঃ অৰুণাচল প্ৰদেশৰ তথা ভাৰত চীন আন্তৰাষ্ট্ৰীয় সীমান্তত দেশৰ প্ৰতিৰক্ষা শিবিৰ সমূহ পৰিদৰ্শন কৰাৰ উদ্দেশ্যে দুদিনীয়া ভ্ৰমণ সূচীৰে আজি ৰাজ্যত পদাৰ্পণ কৰিছে দেশৰ প্ৰতিৰক্ষা মন্ত্ৰী ৰাজনাথ সিং৷ প্ৰতিৰক্ষা বিভাগৰ মুখপাত্ৰই প্ৰকাশ কৰা অনুসৰি,প্ৰতিৰক্ষা মন্ত্ৰী সিঙৰ স’তে দেশৰ স্থল সেনাৰ সেনাধ্যক্ষ, জেনেৰেল মনোজ পাণ্ডে আৰু ইষ্টাৰ্ণ কমাণ্ডৰ লেফটেনেণ্ট জেনেৰেল আৰ পি কলিতা আৰু অন্যান্য জ্যেষ্ঠ বিষয়াসকল উপস্থিত থাকে।প্ৰতিৰক্ষা মন্ত্ৰীগৰাকীক ভাৰত-চীন সীমান্তৰ আন্তঃগাঁথনি উন্নয়নৰ লগতে সামৰ্থ বিকাশ আৰু কাৰ্যকৰী প্ৰস্তুতিৰ বিষয়ে অৱগত কৰা হয়। প্ৰতিৰক্ষা মন্ত্ৰীয়ে দেশৰ পূব প্ৰান্তৰত দেশৰ সেনাৰ আন্তঃগাথঁনিৰ কাৰ্যকৰী প্ৰস্তুতিৰ বিষয়ে পৰ্যালোচনা কৰে। এই ভ্ৰমণৰ সময়ত প্ৰতিৰক্ষা মন্ত্ৰীক সীমান্তৰ সন্মুখত নিয়োজিত সুৰক্ষা বাহিনীৰ কাৰ্যক্ষমতা বৃদ্ধিৰ বাবে অত্যাধুনিক সামৰিক সঁজুলি আৰু প্ৰযুক্তিৰ ব্যৱহাৰৰ বিষয়েও অৱগত কৰা হয়।প্ৰতিৰক্ষা মন্ত্ৰী সিঙে কাইলৈ সীমান্তৰ সন্মুখৰ শিৱিৰ সমূহ ভ্ৰমণ কৰি অভিযানিক প্ৰস্তুতি সন্দৰ্ভত বুজ লব আৰু ইয়াত নিয়োজিত সেনাৰ স’তে মত বিনিময় কৰিব। তেওঁ অৰুণাচল প্ৰদেশৰ স্থানীয় ইদু মিচিমি জনগোষ্ঠীৰ বাৰ্ষিক ট্ৰেকিং আথু পপু সন্দৰ্ভত দ্বিতীয় ধৰ্মীয় অভিযানৰ সদস্যসকলৰ স’তেও মত বিনিময় কৰিব ।উল্লেখযোগ্য যে এই অনুষ্ঠান বাহিৰা প্ৰাপ্তিৰ অংশ হিচাপে ২০২১ ৰ পৰা সেনাই সহায় কৰি আহিছে আৰু স্থানীয় লোকসকলক সমৰ্থন আৰু পৰ্যটনৰ বিকাশৰ প্ৰচেষ্টা অব্যাহত ৰাখিছে৷তেওঁ প্ৰত্যাহ্বানমূলক পৰিস্থিতিত কাম আগবঢ়োৱা অতিৰিক্ত বাহিনীয়ে আগবঢ়োৱা বিশেষ সেৱা আৰু মহিলা শক্তিৰ সেৱাক যথেষ্ট প্ৰশংসা কৰে।
