শতাব্দ ষ্টাফ ৰিপ’ৰ্টাৰ লখিমপুৰ, ২৭ জুনঃ অসমৰ ৰঙা সংৰক্ষিত বনাঞ্চলত অৰুণাচলীয়ে নিৰ্মাণ কৰা এক’লেণ্ড অৱশেষত আজি অৰুণাচল প্ৰশাসনে নিজে ভাঙি দিবলৈ বাধ্য হয়৷ বুধবাৰে অসমৰ বিশাল সুৰক্ষা বাহিনীয়ে ৰঙা সংৰক্ষিত বনাঞ্চলত অসমৰ ভূমি বেদখল কৰি অৰুণাচলীয়ে নিৰ্মাণ কৰা এক’লেণ্ডত উচ্ছেদ চলাবলৈ গৈছিল যদিও উচ্ছেদ অভিযান চলাব নোৱাৰি সন্ধিয়া ঘূৰি আহিবলৈ বাধ্য হৈছিল৷ অৱশ্যে দুয়োখন ৰাজ্যৰ উচ্চ পদস্থ বিষয়াৰ আলোচনা মৰ্মে আজি অৰুণাচল প্ৰশাসনে লখিমপুৰ জিলা প্ৰশাসনৰ উপস্থিতিত ২ নং বেলবস্তিত নিৰ্মীয়মান এক’লেণ্ডত উচ্ছেদ অভিযান চলাই ভাঙি দিয়ে৷ বিগত কেবাদিন ধৰি তীব্ৰ চৰ্চাত থকা ৰঙা সংৰক্ষিত বনাঞ্চলৰ ভূমিত অৰুণাচলীয়ে এক’লেণ্ড নিৰ্মাণ কৰাৰ কথা সত্যত পৰিণত কৰি আজি এনেদৰে অৰুণাচল প্ৰশাসনে সেই নিৰ্মাণ কাৰ্য ভাঙি দিবলৈ বাধ্য হয়৷ অসমৰ তথা লখিমপুৰ জিলা প্ৰশাসনৰ ভালেকেইজন বিষয়া ৰামপুৰ বগীবিলৰ সেই অৰুণাচলী বেদখল স্থানত উপস্থিত হোৱাৰ সময়ত অৰুণাচলী লোকৰ পৰা অপদস্থ হৈ আহিছিল৷ লখিমপুৰৰ বন বিভাগৰ অস্তিত্বত নস্যাৎ কৰি অৰুণাচলীয়ে অসমৰ সংৰক্ষিত বনাঞ্চলত অবৈধ ভাৱে নিৰ্মাণ কাৰ্য চলাই অহাক লৈ সীমান্তৱৰ্তী অঞ্চলটোত উত্তেজনাৰ সৃষ্টি হৈ আহিছে৷ যাক লৈ স্থানীয় ৰাইজে তীব্ৰ ক্ষোভ প্ৰকাশ কৰিছে৷ ইফালে অৰুণাচলীয়ে অসমৰ ভূমিত এনেদৰে বেদখল চলাই বিভিন্ন নিৰ্মাণ কাৰ্য চলোৱা সন্দৰ্ভত লখিমপুৰ জিলা প্ৰশাসন আৰু বন বিভাগৰ ভূমিকা মুঠেই সন্তোষজনক নহয়৷ ৰঙা সংৰক্ষিত বনাঞ্চলত অৰুণাচলীয়ে পকী ঘৰ আৰু পথ কেৱল এদিনতে নিৰ্মাণ কৰা নাই৷ তদুপৰি উক্ত স্থানত লখিমপুৰৰ বন বিভাগে স্থাপন কৰা বনানিকৰণ আঁচনিৰ ফেঞ্চিং অৰুণাচলীয়ে উঠাই নিয়াৰ পিছতো কিয় লখিমপুৰ প্ৰশাসনে তথা বন বিভাগে ব্যৱস্থা লোৱা নাই সেয়াও ৰহস্যজনক৷ শেহতীয়াকৈ লখিমপুৰৰ সংবাদ মাধ্যমে ৰঙা সংৰক্ষিত বনাঞ্চলত অৰুণাচলীয়ে একলেণ্ড নিৰ্মাণ কৰাৰ তথ্য ফটোসহ প্ৰকাশ কৰাৰ পিছতহে লখিমপুৰ প্ৰশাসনৰ গা লৰে।
