শতাব্দ ষ্টাফ ৰিপ’ৰ্টাৰ, ৩০ জুনঃ সমগ্ৰ উত্তৰ-পূৰ্বাঞ্চলৰ ইলাচি কৃষকসকলে মছলাৰ উৎপাদনত উল্লেখনীয় অগ্ৰগতি লাভ কৰাৰ লগতে ৰপ্তানিৰ ক্ষেত্ৰত উল্লেখযোগ্য অৰিহণা যোগাইছে। এই প্ৰচেষ্টাৰ স্বীকৃতি স্বৰূপে আজি ৩০ জুনত উত্তৰ-পূৰ্বাঞ্চলৰ ৮ জন খেতিয়কক ২০১৯-২০ আৰু ২০২০-২১ বৰ্ষৰ বাবে ‘বৃহৎ ইলাচি উৎপাদনশীলতা বঁটা’ প্ৰদান কৰা হয়। অসমৰ মুখ্যমন্ত্ৰী হিমন্ত বিশ্ব শৰ্মা আৰু অৰুণাচল প্ৰদেশৰ মন্ত্ৰী এৰ টাগে টাকিয়ে কৃষকসকলক এই বঁটা প্ৰদান কৰে। ভাৰতীয় মছলা ব’ৰ্ডে আজি গুৱাহাটীত আয়োজন কৰা International Buyer Seller Meet & Spices Conclave for Northeastern Regionত এই বঁটা প্ৰদান কৰা হয়। অনুষ্ঠানত কৃষি বিভাগৰ চি এণ্ড এছ – ড° ওমপ্ৰকাশ, ভাৰতীয় মছলা ব’ৰ্ডৰ সঞ্চালক এ বি ৰেমাশ্ৰী আৰু সম্পাদক ডি সাথিয়ান, পদ্মশ্ৰী বঁটাপ্ৰাপক ট্ৰিনিটি ছাইও আৰু নানাদ্ৰো বি মাৰক উপস্থিত আছিল। খবৰ অনুসৰি, বঁটাপ্ৰাপকসকলৰ ভিতৰত আছে ছিকিমৰ সোণম ৰেংগী শ্বেৰ্পা, নাগালেণ্ডৰ জুনহেবোটো জিলাৰ তোচিলি সোমা, অৰুণাচল প্ৰদেশৰ কুৰুংকুমে জিলাৰ খ্যোদা আপিক, নাগালেণ্ডৰ ফেক জিলাৰ আভোনুও ভেৰো, অৰুণাচল প্ৰদেশৰ নামনি সোৱণশিৰি জিলাৰ যোৰাম তামিন, অৰুণাচল প্ৰদেশৰ নামনি দিবাং ভেলী জিলাৰ আচাতী দেলে, কুৰুংকুমেৰ নুৰেং য়ামে আৰু নামনি সোৱণশিৰি জিলাৰ নীলাম জীল। উল্লেখ্য যে, মছলাৰ ‘বাই-ডিফল্ট জৈৱিক’ টেগক ‘প্ৰমাণিত জৈৱিক’ বা ‘ডিজাইন অনুসৰি জৈৱিক’লৈ ৰূপান্তৰিত কৰিবলৈ isostandards য়ে তালিকাভুক্ত কৰা ১০৯ বিধৰ ভিতৰত ভাৰতত ৭৫বিধ মছলা উৎপাদিত হৈছে আৰু বিশ্বৰ সৰ্ববৃহৎ উৎপাদক, গ্ৰাহক, ৰপ্তানিকাৰক হিচাপে আত্মপ্ৰকাশ কৰিছে।জৈৱিক মছলাৰ মানৰ বাবে উত্তৰ-পূবে বিশেষ মনোযোগ লাভ কৰিছে। অসমে বছৰি প্ৰায় ৩.১ লাখ মেট্ৰিক টন মছলা উৎপাদন কৰে। উল্লেখ্য যে ভাৰতীয় মছলা ব’ৰ্ডে মছলা উদ্যোগৰ ক্ৰেতা আৰু বিক্ৰেতাসকলক এক উমৈহতীয়া মঞ্চ প্ৰদান কৰাৰ বাবে ক্ৰেতা বিক্ৰেতা মিটছ (বিএছএম) আয়োজন কৰি আহিছে, যাৰ ফলত প্ৰত্যক্ষ পাৰস্পৰিক ক্ৰিয়া-কলাপ নিশ্চিত কৰা হৈছে আৰু শক্তিশালী ব্যৱসায়িক সংযোগ গঢ়ি তোলা হৈছে।
