উৎকট গৰমৰ ফলত তেজপুৰৰ বিদ্যালয়ত ১১গৰাকী শিশু অসুস্থ

শতাব্দ ষ্টাফ ৰিপ’ৰ্টাৰ, তেজপুৰ,২ জুনঃ উৎকট গৰম সহ্য কৰিব নোৱাৰি আজি তেজপুৰৰ শোণিতপুৰ জাতীয় বিদ্যালয়ৰ ১১ গৰাকী শিক্ষাৰ্থী শ্ৰেণীতে অসুস্থ হৈ পৰে৷ প্ৰথমে বিদ্যালয়খনৰ অষ্টম শ্ৰেণীৰ দুগৰাকী ছাত্ৰী মূৰৰ ঘূৰণি আৰম্ভ হয় আৰু ক্ৰমাৎ উশাহ লোৱাত অসুবিধা অনুভৱ কৰে। লগে লগে বিদ্যালয় কৰ্তৃপক্ষই নিকটৱৰ্তী গেইট সুখদা হাস্পতাললৈ নিয়ে৷ কিন্তু ইয়াৰ পাছতে বিদ্যালয়খনৰ তৃতীয় শ্ৰেণীৰ আন তিনিগৰাকী ছাত্ৰী অসুস্থ হয়। তেনেদৰে অষ্টম শ্ৰেণীৰ মুঠ ছজন ছাত্ৰ-ছাত্ৰী, ষষ্ঠ শ্ৰেণীৰ দুজন ছাত্ৰ অসুস্থ হয়। ইয়াৰে নজন শিক্ষাৰ্থীক গেইট সুখদা হাস্পতালত চিকিৎসা প্ৰদান কৰাৰ বিপৰীতে আন দুজন ছাত্ৰক ব্যপ্তিষ্ট মিছন হাস্পতালত চিকিৎসা প্ৰদান কৰি অভিভাৱক সকলক চমজাই দিয়ে । চিকিৎসকে অত্যন্ত গৰম সহ্য কৰিব নোৱাৰাৰ বাবেই এনে হোৱা বুলি কয়। আজিৰ দিনটোত তেজপুৰত ৩৭ ডিগ্ৰী চেলচিয়াচ উত্তাপৰ বাবে বিদ্যালয়ৰ ছাত্ৰছাত্ৰীসকল যথেষ্ট সমস্যাৰ সন্মুখীন হয়৷ ইফালে তেজপুৰ চহৰৰ মাজমজিয়াত থকা তেজপুৰ চৰকাৰী বালক বেংগলী বিদ্যালয়তো আজি দহ জন শিক্ষাৰ্থী অসুস্থ হয়। বিগত দুদিনত বহু সংখ্যক শিক্ষাৰ্থী অসুস্থ হৈ পৰে গৰমৰ বাবে। উল্লেখ্য যে – গৰম বৃদ্ধি পোৱাৰ বাবে ইতিমধ্যে কেইখনমান বেচৰকাৰী বিদ্যালয়ে অৰ্ধ ছুটী দিয়াৰ ব্যৱস্থা কৰাৰ বিপৰীতে বহুসংখ্যক চৰকাৰী – বেচৰকাৰী বিদ্যালয়ত তেনে ব্যৱস্থা গ্ৰহণ নকৰাৰ ফলত আৰু সঘনাই বিদ্যুৎ কৰ্তনৰ বাবে ফেন আদি চলাব নোৱাৰা অৱস্থাত অসহ্য গৰমতো পাঠদান অব্যাহত ৰাখিছে।