এবছৰত অসম বিধানসভাত ৫৮ খন বিধেয়ক গৃহীত

পঞ্চদশ অসম বিধান সভাৰ প্ৰথম বৰ্ষ উপলক্ষ্যে অধ্যক্ষ বিশ্বজিত দৈমাৰীৰ সংবাদমেল সম্বোধন। অসম বিধান সভা সাধাৰণ লোকৰ দৰ্শনৰ বাবে মুকলি কৰাৰ ব্যৱস্থা কৰা হৈছে আৰু গল্ফ কাৰ্টৰ যোগেদি ৰাইজে বিধানসভা চৌহদ দৰ্শন কৰিব পাৰিব। অতিথি আপ্যায়নৰ প্ৰসংগত অসম বিধানসভাক বিবাহ ভৱনৰ লগত তুলনা অধ্যক্ষৰ।

শতাব্দ প্ৰতিনিধি, গুৱাহাটী,২১ মে’ : অসম বিধানসভাৰ নতুন ভৱন ছমাহৰ ভিতৰত সম্পূৰ্ণ হ’ব। এই কথা সদৰী কৰিছে অসম বিধান সভাৰ অধ্যক্ষ বিশ্বজিত দৈম‍াৰীয়ে। পঞ্চদশ অসম বিধান সভাৰ প্ৰথম বৰ্ষ উপলক্ষ্যে শনিবাৰে অধ্যক্ষ বিশ্বজিত দৈমাৰীয়ে এখন সংবাদমেল সম্বোধন কৰে। বিধান সভাৰ চেণ্ট্ৰেল হলত আয়োজন কৰা সংবাদমেলত অধ্যক্ষগৰাকীয়ে এবছৰীয়া কাৰ্যকালৰ খতিয়ান দাঙি ধৰে। তেওঁ কয় যে বিগত এটা বছৰত অসম বিধান সভাত ৫৮ খন বিধেয়ক গৃহীত কৰাটো উল্লেখযোগ্য বিষয়। তেওঁ লগতে কয় যে অসম বিধান সভাৰ কাম কাজ বহু পৰিমাণে ডিজিটেলাইজ কৰা হৈছে। অসমীয়া, বড়ো আৰু ইংৰাজী ভাষাত সদনৰ কাৰ্য পৰিচালনাৰ সমান্তৰালভাৱে অনুবাদৰ ব্যৱস্থা কৰা হৈছে। অসম বিধান সভাত ডিজিটেল ফায়াৰ এলাৰ্মৰো ব্যৱস্থা কৰা হৈছে। বিধানসভা চৌহদৰ ভিতৰত মেডিকেলৰ ব্যৱস্থা হৈছে। অধিবেশনৰ সময়ত বিধায়কসকলক অনা-নিয়া কৰাৰ বাবে ৬ খন গল্ফ কাৰ্টৰ ব্যৱস্থা কৰা হৈছে বুলি উল্লেখ কৰি তেওঁ কয় যে নতুনকৈ আৰু ৬ খন গল্ফ কাৰ্ট অনা হ’ব। অসম বিধান সভা সাধাৰণ লোকৰ দৰ্শনৰ বাবে মুকলি কৰাৰ ব্যৱস্থা কৰা হৈছে আৰু গল্ফ কাৰ্টৰ যোগেদি ৰাইজে বিধানসভা চৌহদ দৰ্শন কৰিব পাৰিব। অসম বিধান সভাৰ নতুন ভৱন অতি সোনকালে মুকলি কৰিবৰ বাবে ব্যৱস্থা গ্ৰহণ কৰা হৈছে বুলি সদৰি কৰি তেওঁ কয় যে নতুন ভৱন ৬ মাহৰ ভিতৰত সম্পূৰ্ণ কৰাৰ লক্ষ্য নিৰ্ধাৰণ কৰা হৈছে। সেইদৰে বিধায়ক আবাসৰ বাবে তিনিটা অট্টালিকা তিনিবছৰৰ ভিতৰত সম্পূৰ্ণ কৰাৰ লক্ষ্য নিৰ্ধাৰণ কৰা হৈছে। এতিয়াও ৪০ শতাংশ বিধায়ক আৱাসৰ প্ৰয়োজন আছে। পুৰণি বিধায়ক আৱাস ভাঙি তাত নতুন কৰি আৱাস নিৰ্মাণ কৰা হ’ব। বিধায়ক আবাস সমূহ পুৰণি হৈ যোৱাৰ বাবে বহু আৱাস খালি কৰিব দিয়া হৈছে। ২০ জুলাইৰ ভিতৰত পুৰণি আৱাস সমূহ খালী কৰিবলৈ নিৰ্দেশ জাৰি কৰা হৈছে। যদি কোনো বিধায়কৰ নিৰাপত্তাৰ কথা থাকে তেন্তে সেইক্ষেত্রত তেওঁলোকৰ নিৰাপত্তাৰ দিশটো চোৱা হ’ব বুলি তেওঁ কয়। তেওঁ লগতে কয় যে শীঘ্ৰেই অসম বিধান সভাৰ বাবে সুকীয়াকৈ এটা টেলিভিছন চেনেল আৰম্ভ হ’ব। বৰ্ত্তমান পৰ্টেলত চলি আছে। আনহাতে অতিথি আপ্যায়নৰ প্ৰসংগ উল্লেখ কৰি তেওঁ অসম বিধানসভাক বিবাহ ভৱনৰ লগত তুলনা কৰে। সংবাদমেলত তেওঁ সফলতাৰে অসম বিধানসভাত প্ৰথমবাৰৰ বাবে অনুষ্ঠিত কমনৱেল্থ সংসদীয় সংঘৰ মধ্য বৰ্ষীয় আন্তৰাষ্ট্ৰীয় কাৰ্যনিৰ্বাহক সমিতিৰ বৈঠক আৰু কমনৱেল্থ সংসদীয় সংঘৰ ভাৰত ক্ষেত্রীয় সন্মিলনৰ প্ৰসংগ উল্লেখ কৰে। আনহাতে সংবাদমেলত অসম বিধান সভাৰ উপাধ্যক্ষ ডাঃ নোমল মমিনে নিজৰ এবছৰীয়া অনুভৱ ব্যক্ত কৰে।