শতাব্দ বিশেষ প্ৰতিনিধি, ২৪ এপ্ৰিলঃ পেট্ৰোলিয়াম জাত সামগ্ৰীৰ ব্যৱহাৰ আৰু আমদানিৰ ক্ষেত্ৰত বিশ্বৰ তৃতীয় বৃহৎ দেশ ভাৰতবৰ্ষই যোৱাটো বিত্তীয় বৰ্ষ( এপ্ৰিল, ২০২১ – মাৰ্চ, ২০২২)ত খাৰুৱা তেল আমদানিৰ বাবে ১১৯.২ বিলিয়ন আমেৰিকান ডলাৰ ব্যয় কৰিছে। কেৱল যোৱা মাৰ্চ মাহতেই খাৰুৱা তেল ক্ৰয়ৰ নামত ১৩.৭ বিলিয়ন ডলাৰ দেশখনে খৰছ কৰিবলগীয়া হৈছে। কেন্দ্ৰীয় তেল-গেছ মন্ত্ৰালয়ৰ অধীনস্থ পেট্ৰোলিয়াম পৰিকল্পনা আৰু বিশ্লেষণ কোষে অলপতে সদৰী কৰা মতে ইয়াৰ আগৰ বছৰটোত এই পৰিমাণ আছিল ৬২.২ বিলিয়ন ডলাৰ আৰু আমদানিৰ পৰিমাণ আছিল ১৯৬.৫ নিযুত মেট্ৰিক টন। ২০২১-২২ বৰ্ষত খাৰুৱা তেলৰ আমদানি কৰা হৈছিল ২১২.২ নিযুত মেট্ৰিক টন। অৱশ্যে ৰাছিয়া-ইউক্ৰেইনৰ যুদ্ধৰ বাবে খাৰুৱা তেলৰ আন্তৰ্জাতিক মূল্য অভাৱনীয় হাৰত বৃদ্ধি পোৱাত আমদানিৰ বাবদ আনুপাতিক হাৰত অধিক ধন ব্যয় কৰিবলগীয়া হয়। উল্লেখযোগ্য যে, ২০২১-২২ বৰ্ষত দেশখনত বিভিন্ন পেট্ৰ’ল জাত সামগ্ৰীৰ ব্যৱহাৰ হৈছিল ২০২.৭ নিযুত মেট্ৰিক টন আৰু পূৰ্বৱৰ্তী বছৰটোত কৈ ইয়াৰ পৰিমাণ প্ৰায় ৮ নিযুত মেট্ৰিক টন অধিক।
