শতাব্দ ষ্টাফ ৰিপ’ৰ্টাৰ, ১২ জুলাই : ইতিমধ্যে জনা গৈছে যে কোটিপতি উদ্যোগপতি গৌতম আদানী এইবাৰ টেলিকম ব্যৱসায়ত প্ৰৱেশ কৰিছে। জানিব পৰা মতে আদানি গ্ৰুপে ৫জি টেলিকম ব্যৱসায়ত প্ৰৱেশ কৰিবলৈ ওলাইছে। ইতিমধ্যে কোম্পানীটোৱে এই ব্যৱসায়ত প্ৰৱেশৰ বাবে প্ৰাৰম্ভিক অনুজ্ঞাপত্ৰও লাভ কৰিছে। এতিয়া প্ৰশ্ন হয়, মুকেশ আম্বানীৰ জিঅ’ৰ সৈতে আদানী গোটৰ সংঘৰ্ষ হ’ব নেকি? আদানি গ্ৰুপৰ টেলিকম খণ্ডত প্ৰৱেশৰ খবৰে ইতিমধ্যে শ্বেয়াৰ বজাৰত প্ৰভাৱ পেলাইছেই। ভাৰতী এয়াৰটেলৰ শ্বেয়াৰৰ মূল্য তীব্ৰভাৱে হ্ৰাস পাবলৈ আৰম্ভ কৰিছে। নেচনেল ষ্টক এক্সচেঞ্জৰ তথ্য অনুসৰি ১১ জুলাই সোমবাৰে পুৱা ভাৰতী এয়াৰটেলৰ শ্বেয়াৰৰ মূল্যই ৬৬১.৭৫ টকা স্পৰ্শ কৰে। যোৱা সপ্তাহত কোম্পানীটোৰ শ্বেয়াৰৰ মূল্যৰ বজাৰ মূল্য আছিল ৬৯৫.১৯। অৰ্থাৎ শ্বেয়াৰৰ মূল্য প্ৰায় ৩৫ টকা তললৈ নামিল। আদানী গ্ৰুপে টেলিকম ব্যৱসায়ত প্ৰৱেশ কৰাৰ লগে লগে ভাৰতী এয়াৰটেল আৰু ভোডাফোন আইডিয়াৰ দৰে কোম্পানীবোৰ দুৰ্বল হৈ পৰাৰ ফলত ব্যৱসায়ৰ ক্ষতি হ’ব বুলি বজাৰ বিশেষজ্ঞসকলে আশংকা প্ৰকাশ কৰিছে। সেই আশংকাৰ বাবেই ভাঙি পৰিছে শ্বেয়াৰ বজাৰ। কিন্তু নাম প্ৰকাশ নকৰা আদানী গ্ৰুপৰ এগৰাকী মুখপাত্ৰই কয় যে, কোম্পানীটোৱে হয়তো পোনপটীয়াকৈ চিম কাৰ্ড বিক্ৰী নকৰিব। কোম্পানীটোৱে ব্যক্তিগত নেটৱৰ্কৰ পৰিৱৰ্তে এণ্টাৰপ্ৰাইজ নেটৱৰ্কৰ ক্ষেত্ৰত কাম কৰিব। বিমানবন্দৰ, জাহাজ বন্দৰ, চাইবাৰ নিৰাপত্তা নেটৱৰ্ক আৰু অধিক শক্তিশালী কৰা হ’ব। অৱশ্যে আদানি গ্ৰুপৰ বিষয়াগৰাকীয়ে ৫জি এয়াৰৱেভ নিলামত অংশ লোৱাৰ কথা স্বীকাৰ কৰিছে। ইফালে বিশেষজ্ঞসকলে কয় যে, যদিহে আদানি গ্ৰুপে টেলিকম ব্যৱসায়ত প্ৰৱেশ কৰে তেন্তে জিঅ’ৰ আক্ৰমণত দুৰ্বল হৈ পৰা এয়াৰটেল আৰু সংকটত পৰা ভোডাফোনৰ সংকট আৰু গভীৰ হ’ব। এনে অৱস্থাত কেৱল আদানী আৰু আম্বানীৰ মাজতে যুঁজখন সীমাবদ্ধ থাকিব। আদানি গ্ৰুপে এতিয়ালৈকে কয়লা, বিদ্যুৎ আৰু বিমান পৰিবহণৰ ওপৰত গুৰুত্ব আৰোপ কৰিছে। কিন্তু টেলিকমৰ ক্ষেত্ৰত আম্বানী-আদানীৰ যুদ্ধই গ্ৰাহকক উপকৃত কৰিব পাৰে বুলি বিশেষজ্ঞসকলে ভাবে। নতুন কোম্পানী অহাৰ লগে লগে সস্তীয়া আৰু ভাল সেৱাৰ প্ৰস্তাৱ বৃদ্ধি হ’ব পাৰে।
