ডায়েট লখিমপুৰৰ শিক্ষক-প্ৰশিক্ষাৰ্থীৰ সৌজন্যত শিশুমেলা

উত্তৰ লখিমপুৰ, ৩০ এপ্ৰিলঃ  যোৱা ২৬ এপ্ৰিল তাৰিখৰ পৰা উত্তৰ লখিমপুৰস্থিত সোৱণশিৰি সেৱাশ্ৰম এম. ই. স্কুলত আৰম্ভ হোৱা আজাদস্থিত ডায়েট লখিমপুৰৰ ডিএলএড পাঠ্যক্ৰমৰ তৃতীয় ষান্মাসিক শিক্ষক- প্ৰশিক্ষাৰ্থীসকলৰ ‘”স্কুল ইন্টাৰ্ণশ্বিপ প্ৰগ্ৰেম ২০২২” ৰ অন্তৰ্গত ৫ দিনীয়া “প্ৰেকটিছ- টিছিং” কাৰ্যসূচীৰ আজি ৩০এপ্ৰিল তাৰিখে সফল সমাপ্তি ঘটে। উক্ত ৫ দিনীয়া কাৰ্যসূচীৰ প্ৰথম ৪ দিন দৈনিক পুৱা ৮.৩০ বজাত সামুহিক চাফাই অভিযানৰ অন্ত:ত পুৱা ৮.৪৫ বজাত ছাত্ৰ-ছাত্ৰী সকলৰ প্ৰাত:সভা তথা শৰীৰ চৰ্চাৰ বিভিন্ন ক্ৰিয়া ও যোগাভ্যাস ৰূপায়ণ কৰাৰ পিছত শিক্ষক-প্ৰশিক্ষাৰ্থী সকলৰ দ্বাৰা বিভিন্ন শ্ৰেণীত পাঠদান কাৰ্যসূচী ৰূপায়ণ কৰা হয়। কাৰ্যসূচীৰ পঞ্চম দিনা গতানুগতিক পাঠদানৰ পৰিৱৰ্তে কণ কণ ছাত্ৰ-ছাত্ৰীসকলৰ মাজত ” শিশু মেলা” অনুষ্ঠিত কৰা হয়। মেলাৰ প্ৰথম কাৰ্যসূচীত সামুহিক চাফাই অভিযানৰ অন্তত ৮.৪৫ বজাত ছাত্ৰ- ছাত্ৰীসকলৰ দ্বাৰা প্ৰাত:সভা তথা যোগাভ্যাসৰ বিভিন্ন ক্ৰিয়া কলাপ সমাপন কৰা হয়। ইয়াৰ পিছত বিদ্যালয়খনিৰ সমূহ ছাত্র-ছাত্ৰী, শিক্ষক-শিক্ষয়িত্ৰী তথা শিক্ষক-প্ৰশিক্ষাৰ্থীসকলৰ সহযোগত গছপুলি ৰোপণ কৰা হয়। ইয়াৰ পিছতে শিক্ষক-প্ৰশিক্ষাৰ্থীসকলৰ দ্বাৰা সমৱেত সংগীত, দেশপ্ৰেমমূলক গীত আৰু বিহু গীত পৰিৱেশন কৰা হয়। এই শিশু মেলাত ছাত্ৰ-ছাত্ৰীসকলে কবিতা আবৃত্তি, কুইজ, নাট্যভিনয়, একক আৰু দলীয় আধুনিক গীত ও নৃত্য, বিহু নৃত্য, বিভিন্ন লঘু ক্ৰিয়া আদিত সক্রিয় ভাৱে অংশগ্ৰহণ কৰে। এই ” স্কুল ইন্টাৰ্ণশ্বিপ প্ৰগ্ৰেম” ৰ নিৰীক্ষক হিচাপে দায়িত্ব পালন কৰে ডায়েটৰ প্ৰৱক্তা ইলিমণি চলিহা, ইন্দ্রজিত গাম আৰু চিন্ময়ী দাসে।