তিনিচুকীয়াৰ জিলা পুথিভঁৰালৰ গ্ৰন্থগাৰিকৰ ঘৰৰ পৰা শিশু শ্ৰমিক উদ্ধাৰ

শতাব্দ প্ৰতিনিধি, তিনিচুকীয়া, ১৭ নৱেম্বৰ : তিনিচুকীয়া জিলা পুথিভঁৰালৰ গ্ৰন্থগাৰিক লাভলী দলেৰ ঘৰৰ পৰা আজি জিলা প্ৰশাসন, চাইল্ড লাইন, আৰক্ষী আৰু শ্ৰম বিভাগৰ অভিযানকাৰী দলে এটি শিশু শ্ৰমিক উদ্ধাৰ কৰিবলৈ সক্ষম হয় ৷ জানিব পৰা মতে কণ্যা শিশুটি দীৰ্ঘদিনৰ পৰা গ্ৰন্থগাৰিক দলেৰ ঘৰত বনকৰা শ্ৰমিকৰূপে নিয়োজিত হৈ আছিল ৷ উদ্ধাৰ হোৱা শিশু শ্ৰমিকটিয়ে গ্ৰন্থগাৰিক দলেৰ স্বামী হৰেন পেগুৰ বিৰুদ্ধে গুৰুতৰ অভিযোগ উত্থাপন কৰে ৷ ঘটনা সন্দৰ্ভত তিনিচুকীয়াৰ অতিৰিক্ত উপায়ুক্ত চৰফৰাজ হকে সংবাদ মাধ্যমৰ আগত কয় যে আজি দিনৰ প্ৰায় ১ মান বজাত অসম ৰাজ্যিক শিশু সুৰক্ষা আয়োগৰ পৰা লাভ কৰা তথ্যৰ ভিত্তিত অভিযান চলাই শিশু শ্ৰমিকটিক উদ্ধাৰ কৰা হয় ৷ প্ৰায় ১৫ বছৰীয়া শিশু শ্ৰমিক গৰাকীয়ে সংবাদ মাধ্যমৰ আগত গ্ৰন্থগাৰিক দলেৰ অনুপস্থিতিত তেওঁৰ স্বামী হৰেন পেগুৱে তাইৰ সৈতে অনৈতিক ব্যৱহাৰ কৰা বুলিও অভিযোগ কৰাৰ লগতে ভয়তে তাই কথাটো কাকো জনোৱা নাছিল বুলি কয় ৷ অৱশ্যে লাভলী দলে আৰু তেওঁৰ স্বামী হৰেন পেগুৱে এনে অভিযোগ অস্বীকাৰ কৰি নাবালিকা গৰাকীক নিজৰ ছোৱালীৰ দৰেই ৰাখিছিল বুলি কয় ৷ ইতিমধ্যে যোৰহাটৰ পৰা তাইৰ পৰিয়ালক তিনিচুকীয়ালৈ আহিবৰ বাবে খবৰ দিয়া হৈছে বুলি প্ৰকাশ ৷