তেজপুৰৰ মোবাইল টাৱাৰত অগ্নিকাণ্ড

শতাব্দ প্ৰতিনিধি তেজপুৰ, ২৭এপ্ৰিল: তেজপুৰ চহৰৰ গাৰোৱানপট্টী অঞ্চলত আজি এটা মোবাইল ফোনৰ টাৱাৰত সংঘটিত অগ্নিকাণ্ডত ঘন জনবসতি পূৰ্ণ অঞ্চলটো কথমপিহে ৰক্ষা পৰে । উল্লেখযোগ্য যে,তেজপুৰ পৌৰসভাৰ ১০নম্বৰ ৱাৰ্ডৰ এই অঞ্চলটোৰ প্ৰয়াত চেলিম আনছাৰি নামৰ লোকজনৰ অট্টালিকাত থকা এয়াৰটেলৰ টাৱাৰটোৰে সংলগ্ন কক্ষত এই অগ্নিকাণ্ডৰ সূত্ৰপাত ঘটে । বৈদ্যুতিক বিজুতিৰ বাবে সূত্ৰপাত ঘটা এই অগ্নিকাণ্ডৰ ফলত ধোঁৱাই ছনি ধৰে । দিনৰ প্ৰায় ১:২০বজাত সংঘটিত এই ঘটনাত অঞ্চলটোত হুৱাদুৱা লাগে আৰু প্ৰতিবেশী সকলে এই অগ্নি নিৰ্বাপন কৰিবলৈ চেষ্টা চলায় । ইপিনে ঘটনাস্থলীত দুখন অগ্নিনিৰ্বাপক বাহিনীৰ গাড়ী উপস্থিত হয়হি য’দিও ঠেক পথৰে অট্টালিকাটোলৈ যাবলৈ অসমৰ্থ হয় । পাছত অৱশ্যে কাষৰ অট্টালিকাৰ পৰাই অগ্নিনিৰ্বাপক বাহিনীয়ে এই অগ্নি নিৰ্বাপন কৰিবলৈ সক্ষম হয় ।