তেজপুৰ চহৰত নিশা বন্যহস্তীৰ চফৰ

শতাব্দ প্ৰতিনিধি তেজপুৰ ,২৭আগষ্ট: তেজপুৰ চহৰত আজি নিশা এটা বনৰীয়া হাতীয়ে উপদ্ৰৱ চলায় ৷তেজপুৰস্হিত বন কাৰ্যালয়ৰ সমীপৰ ফৰেষ্ট ঘাটৰে আহি হাতীটোৱে বন বিভাগৰ এখন বলেৰ’ বাহন ধ্বংস কৰে৷ ইয়াৰ পাছতে হাতীটোৱে ৰাজ্যিক পৰিবহণ নিগমৰ বাছ আস্হানৰ সমীপৰে আহি পদুমপুখু্ৰী আৰু ত্ৰিমূৰ্তি উদ্যানৰ সমীপৰে কটন ৰ’ড হৈ জাহাজঘাটৰ দিশে গতি কৰে৷ এই সময়ত আন এখন বাহনৰো ক্ষতি সাধন কৰে হাতীটোৱে ৷ নিশা প্ৰায় ৮-৩০বজাত বনৰীয়া হাতীটোকলৈ চহৰখনত হুৱাদুৱা লাগে ৷ ইতিমধ্যে বনকৰ্মীয়ে হাতীটো খেদি নিয়ে যদিও বৰ্তমান প্ৰকাণ্ড হাতীটোৱে জাহাজঘাটৰ পুৰণা ৰে’ল ষ্টেচনৰ সমীপৰ এটা চৌহদত আশ্ৰয় লৈ আছে৷ হাতীটো লাওখোৱা অভয়াৰণ্যৰ পৰা ব্ৰহ্মপুত্ৰৰে উটি আহি তেজপুৰত প্ৰৱেশ কৰা বুলি আশংকা প্ৰকাশ কৰিছে বন বিভাগে।