দুৰ্গম আনিনীত সন্ধানহীন হোৱা তিনিচুকীয়াৰ শিশু উদ্ধাৰ

শতাব্দ প্ৰতিনিধি, তিনিচুকীয়া, ২৩ জুন : অৱশেষত উদ্ধাৰ হ’ল অৰুণাচল প্ৰদেশৰ দিবাং ভেলী জিলাৰ আনিনীত ১৮ জুনত সন্ধানহীন হোৱা এটি শিশু । উল্লেখ্য যে উক্ত দিনা আনিনীত তিনিচুকীয়া জিলাৰ এটি শিশু নিজ পৰিয়ালৰ পৰা বিছিন্ন হোৱাৰ সম্ভেদ পোৱাৰ পাছতেই তিনিচুকীয়া জিলা প্ৰশাসনে অৰুণাচল প্ৰদেশৰ দিবাং ভেলী জিলা প্ৰশাসনৰ সৈতে এই সন্দৰ্ভত তাৎক্ষণিকভাৱে যোগাযোগ কৰে। ইয়াৰ ফলশ্ৰুতিত দিবাং ভেলী জিলা প্ৰশাসন আৰু জিলা শিশু সুৰক্ষা বিষয়াৰ তৎপৰতাত ২০ জুনৰ দিনা শিশুটি সুকলমে উদ্ধাৰ কৰা হয়। উদ্ধাৰ কৰা শিশুটি দিবাং ভেলী জিলা শিশু সুৰক্ষা বিষয়াই বুধবাৰে তিনিচুকীয়া জিলাৰ শদিয়া চাইল্ড লাইনৰ হাতত হস্তান্তৰ কৰে । আনহাতে শিশুটিক আজি সম্পূর্ণ সুৰক্ষিতভাৱে নিজ পৰিয়ালৰ হাতত চমজাই দিয়া হয় । শিশুটিৰ উদ্ধাৰ কাৰ্য্যৰ বাবে অৰুণাচল প্ৰদেশৰ দিবাং ভেলী জিলা প্ৰশাসন আৰু জিলা শিশু সুৰক্ষা বিষয়াই যি তৎপৰতা আৰু সহযোগিতা আগবঢ়ালে তাৰ বাবে তিনিচুকীয়া জিলা প্ৰশাসনে ধন্যবাদ জ্ঞাপন কৰিছে ।