শতাব্দ প্ৰতিনিধি, ধেমাজি, ২০ মে’ :
ধেমাজিত দিনকদিনে বৃদ্ধি পাবলৈ ধৰিছে চোৰৰ উপদ্ৰৱ । ৰাতিৰ কথা বাদেই দিন দুপৰতে চোৰে অভিযান চলাই লুটি নিছে নগদ ধন আৰু মূল্যবান সম্পদ । এনে চোৰ বিচাৰি আৰক্ষী সন্দিহান হৈ থকাৰ সময়তে যোৱানিশা ধেমাজি নগৰৰ এঘৰ মানুহৰ শোৱনি কোঠাৰ পৰাই লৈ গ’ল নগদ ধন আৰু সোণৰ আ-অলংকাৰ । ধেমাজি সদৰ আৰক্ষী থানাৰ পৰা প্ৰায় এক কিল’মিটাৰ নিলগৰ ৩নং ৱাৰ্ডৰ কলেজ তিনিআলিৰ নিবাসী উমেশ খাণ্ডেলীয়াৰ ঘৰত যোৱা নিশা চোৰে লুটপাত চলায় । ঘৰৰ পিছফালৰ গ্ৰীল খুলি সোমোৱা চোৰে নগদ দুই লাখ পঞ্চাশ হাজাৰ টকাসহ প্ৰায় চাৰি লাখ টকাৰ সোণৰ আ-অলংকাৰ লৈ যায় । গৃহস্থ শুই থকা বিছনাৰ নিচেই কাষতে থকা লৌহ আলমিৰা খুলি সন্তপৰ্ণে চুৰি কৰি নিয়ে সোণৰ গহনা-গাঁঠৰি । পুৱতি নিশা গৃহস্থই আলমিৰা খোলা অৱস্থাত দেখা পায় হতবাক হয় । উল্লেখ্য যে ধেমাজি নগৰত শেহতীয়াকৈ সঘনাই এনেধৰণৰ ঘটনা সংঘটিত হৈ আহিছে যদিও ধেমাজি সদৰ আৰক্ষীয়ে চোৰক কৰায়ত্ত কৰিবলৈ সক্ষম হোৱা নাই । দোকানৰ টিনপাত কাটি চিলিং ভাঙি লুটপাত কৰা চোৰৰ চুৰি কাৰ্য চিচিটিভিত বন্দী হোৱাৰ পাছতো চোৰ ধৰাত বিফল হৈছে ধেমাজিৰ আৰক্ষী । চোৰ বা এনেধৰণৰ অপৰাধীক কৰায়ত্ত কৰাৰ ক্ষেত্ৰত যিধৰণে তৎপৰতা অৱলম্বন কৰিব লাগিছিল তেনেধৰণৰ নোহোৱাত সৰ্বসাধাৰণ জনতাই উদ্বিগ্ন হৈ পৰিছে । ঘটনা সন্দৰ্ভত ইতিমধ্যে ভুক্তভোগী পৰিয়ালে আৰক্ষীৰ ওচৰত এজাহাৰ দাখিল কৰিছে ।
