শতাব্দ ষ্টাফ ৰিপ’ৰ্টাৰ, লখিমপুৰ, ৩০ জানুৱাৰীঃ
ৰাজ্যৰ সৰ্ববৃহৎ জাতীয় অনুষ্ঠান অসম সাহিত্য সভাৰ ষষ্ঠ সপ্ততিতম পূৰ্ণাংগ নাৰায়ণপুৰ অধিৱেশনখন এইবাৰ লখিমপুৰ জিলাৰ বৰখামটি পথাৰত কাইলৈ মঙ্গলবাৰৰ পৰা অনুষ্ঠিত হ’ব৷ কাইলৈ পুৱা ৯ বজাত বৰখামটি পথাৰৰ মণিকাঞ্চন ক্ষেত্ৰত নামঘৰ উদ্বোধনেৰে এইবাৰৰ অধিৱেশনৰ কাৰ্যসূচী আৰম্ভ হ’ব৷ অধিৱেশনস্থলীত পুৱা ৫০০ স্থানীয় শিল্পীয়ে একেলগে পৰিৱেশন কৰিব এই চিৰ চেনেহী মোৰ ভাষা জননী সমবেত সংগীত৷ ইয়াৰ বাবে দীৰ্ঘদিনৰ পৰা সমবেত সংগীত উপসমিতিয়ে ১০০০ শিল্পীক লৈ অনুশীলন আৰম্ভ কৰি আছে৷ ৫০০ জ্যেষ্ঠ মহিলা, ২০০ শিশু আৰু ৩০০ যুৱক-যুৱতীয়ে একেলগে এই সমবেত সংগীতৰ অনুশীলন অব্যাহত ৰাখিছে৷ কাইলৈ পুৱা ৯ বজাত মাজুলীৰ শ্ৰীশ্ৰী উত্তৰ কমলাবাৰী সত্ৰৰ সত্ৰাধিকাৰ শ্ৰীশ্ৰী জনাৰ্দন দেৱগোস্বামীয়ে মণিকাঞ্চন ক্ষেত্ৰৰ নামঘৰ উদ্বোধন কৰিব৷ বন্তি প্ৰজ্বলন কৰিব বেলগুৰি সত্ৰৰ সত্ৰাধিকাৰ মুনীন্দ্ৰ নাৰায়ণ দেৱগোস্বামীয়ে৷ ৯.৩০ বজাত মে-ডাম মে ফি অনুষ্ঠানৰ পিছতে মণিকাঞ্চন ক্ষেত্ৰত মুখ্য আদৰণী দ্বাৰ উদঘাটন কৰিব বিশিষ্ট শিক্ষাবিদ গিৰিশ চন্দ্ৰ ভূঞাই৷ একেদৰে পুৱা ১০.৩০ বজাত অসম সাহিত্য সভাৰ কেন্দ্ৰীয় অস্থায়ী কাৰ্যালয় মুকলি কৰিব মাধৱদেৱ মহাবিদ্যালয়ৰ অৱসৰপ্ৰাপ্ত অধ্যাপক ভূধৰ ফুকনে৷ পুৱা ১১ বজাত গ্ৰন্থমেলা উন্মোচন কৰিব ৰাজ্যৰ শিক্ষামন্ত্ৰী ডাঃ ৰণোজ পেগুৱে৷ ১১.১৫ বজাত বাণিজ্য মেলাৰ দ্বাৰ উদ্বোধন কৰিব উত্তৰ লখিমপুৰ মহাবিদ্যালয়ৰ অধ্যক্ষ ড॰ বিমান চন্দ্ৰ চেতিয়াই৷ ১১.৩০বজাত প্ৰদৰ্শনীৰ দ্বাৰ মুকলি কৰিব যুৱ সমাজসেৱী ৰঞ্জিৎ ভট্টাচাৰ্যই৷ ১২.১৫ বজাত বিজ্ঞান মেলা উদ্বোধন কৰিব ধেমাজি মহাবিদ্যালয়ৰ অধ্যক্ষ ড॰ দীপক নেওগে৷ একেদৰে দিনৰ ১২.৩০ বজাত শিল্পকলা আৰু প্ৰদৰ্শনী মুকলি কৰিব কলাবাৰী মহাবিদ্যালয়ৰ অধ্যক্ষ ড॰ প্ৰদীপ শৰ্মাই৷ ১২.৪৫ বজাত প্ৰতিনিধিসকলৰ নাম পঞ্জীয়নৰ পিছতে মাধৱদেৱ বিশ্ববিদ্যালয়ৰ প্ৰেক্ষাগৃহত ১ বজাত অসম সাহিত্য সভাৰ অষ্টম পূৰ্ণাংগ কাৰ্যনিৰ্বাহক সভা অনুষ্ঠিত হ’ব৷ এই কাৰ্যনিৰ্বাহক সভা উদ্বোধন কৰিব আদৰণী সমিতিৰ সভাপতি তথা বিহপুৰীয়াৰ বিধায়ক ড॰ অমিয় কুমাৰ ভূঞাই৷ ১.৩০ বজাত শ্ৰীশ্ৰী বদলা সত্ৰৰ সন্মুখত তোৰণ মুকলি কৰিব মাধৱদেৱ মহাবিদ্যালয়ৰ অৱসৰপ্ৰাপ্ত অধ্যক্ষ নৰেন্দ্ৰ নাথ শৰ্মাই৷ দিনৰ ২ বজাত প্ৰতিনিধি শিবিৰ মুকলি কৰিব লখিমপুৰৰ উপায়ুক্ত সুমিত সত্তাৱনে৷ বিয়লি ৩ বজাত সাহিত্য সভাৰ এক আকষৰ্ণীয় ‘আকাশ অনুষ্ঠান’ অনুষ্ঠিত হ’ব সাহিত্য সভাৰ মূল মঞ্চত৷ এই আকাশ অনুষ্ঠান উদ্বোধন কৰিব অসম সাহিত্য সভাৰ উপ-সভাপতি মৃণালিনী দেৱীয়ে৷ ইয়াত সঞ্চালক হিচাপে অংশগ্ৰহণ কৰিব সদৌ অসম লেখিকা সমাৰোহ সমিতিৰ উপদেষ্টা ড॰ চাৰু চহৰীয়া নাথে৷ বিশিষ্ট অতিথি হিচাপে অংশ ল’ব সদৌ অসম লেখিকা সমাৰোহ সমিতিৰ সভানেত্ৰী সুৱৰ্ণ শইকীয়া বৰদলৈয়ে৷ বিয়লি ৩ বজাত গ্ৰন্থমেলা মঞ্চত ‘কথা সাহিত্য সন্মিলন’ উদ্বোধন কৰিব অসম সাহিত্য সভাৰ প্ৰাক্তন ভাৰপ্ৰাপ্ত সভাপতি বিশ্ব বৰুৱাই৷ এই সন্মিলনত সঞ্চালক হিচাপে থাকিব মাধৱদেৱ বিশ্ববিদ্যালয়ৰ অধ্যাপক তানচেং খাংকেউ৷ সন্ধিয়া ৫ বজাত মণিকাঞ্চন ক্ষেত্ৰত সুধাকণ্ঠ ড॰ ভূপেন হাজৰিকা সোঁৱৰণী সাংস্কৃতিক অনুষ্ঠান উদ্বোধন কৰিব ৰাজ্য চৰকাৰৰ সাংস্কৃতিক পৰিক্ৰমা আৰু ক্ৰীড়া মন্ত্ৰী বিমল বৰাই৷ ইফালে নাৰায়ণপুৰত অসম সাহিত্য সভাৰ ষষ্ঠ সপ্ততিতম অধিৱেশন উপলক্ষে এক উখল মাখল পৰিৱেশৰ সৃষ্টি হৈছে৷ ইতিমধ্যে ৰাজ্যৰ ভিন্ন প্ৰান্তৰ লগতে চুবুৰীয়া ৰাজ্যৰ পৰাও প্ৰতিনিধিসকল নাৰায়ণপুৰৰ অধিৱেশনস্থলীত সমবেত হ’ব ধৰিছে৷ আদৰণী সমিতিয়ে তিনি হাজাৰ প্ৰতিনিধিক আদৰিবলৈ সাজু হৈ উঠাৰ লগতে অধিৱেশনস্থলীত গ্ৰন্থমেলা বিপণি, প্ৰদৰ্শনী, বাণিজ্য মেলা, তোৰণ, সাংস্কৃতিক মঞ্চ আদি সকলো সম্পূৰ্ণ হৈ উঠিছে৷ অধিৱেশনৰ আদৰণী সমিতিৰ সাধাৰণ সম্পাদক মাখন তামুলীয়ে আজি জানিবলৈ দিয়া অনুসৰি ভৱামতে অধিৱেশনলৈ পুঁজি আৱণ্টন হোৱা নাই যদিও আদৰণী সমিতিয়ে বিভিন্ন পন্থাৰে জোৰা মৰাৰ ব্যৱস্থা কৰিছে৷ আজি সন্ধিয়া অধিৱেশনৰ মূল তোৰণ প্ৰায় সম্পূৰ্ণ হৈ উঠাৰ লগতে অধিৱেশনস্থলীত সাংসদ পল্লৱ লোচন দাস উপস্থিত হৈ অধিৱেশনৰ অগ্ৰগতিৰ বুজ লয়৷
