নামনি সোৱণশিৰি জলবিদ্যুৎ প্ৰকল্পৰ নামনিত পৰিব পৰা প্ৰভাৱ লাঘৱ কৰিবলৈ আবণ্টিত ৪৭০ কোটি টকা

শতাব্দ ষ্টাফ ৰিপ’ৰ্টাৰ, ২৬ নৱেম্বৰ : ২০০০ মেগাৱাট শক্তিৰ নামনি সোৱণশিৰি জলবিদ্যুৎ প্ৰকল্পৰ নামনিৰ ফালে পৰিবপৰা প্ৰভাৱ লাঘৱ কৰিবলৈ যুটীয়া পৰিচালনা সমিতিৰ পৰামৰ্শ অনুসৰি কেন্দ্ৰই ৪৭০ কোটি টকাৰ উন্নয়নৰ পেকেজত অনুমোদন জনাইছে। এন এইচ পি চিৰ এক বিবৃতিত কোৱা হৈছে যে, মুঠ অনুমোদিত ধনৰ ভিতৰত ১৪৫ কোটি টকা নামনিৰ ফালে সোৱণশিৰি নদীৰ পাৰ সুৰক্ষা আৰু খহনীয়া নিয়ন্ত্ৰণৰ ব্যৱস্থাৰ বাবে ৩০ কিলোমিটাৰ তললৈ, ৩২০ কোটি টকা নামনিৰ অঞ্চলৰ উন্নয়নমূলক কামৰ বাবে আৰু ৫ কোটি টকা সামাজিক সজাগতা আৰু গণ জাগৰণ কাৰ্যসূচীৰ বাবে আবণ্টিত হৈছে। বিবৃতিটোত আৰু কোৱা হৈছে যে ধেমাজি আৰু লখিমপুৰ জিলাত বহনক্ষম জীৱিকাৰ হস্তক্ষেপৰ ডিজাইন আৰু কৌশলগত ৰূপায়ণৰ বাবে এন এইচ পি চি লিমিটেডে পৰামৰ্শদাতা হিচাপে নিয়োজিত কৰা ইনষ্টিটিউট অৱ ৰুৰেল মেনেজমেণ্ট, আনন্দ (আই আৰ এম এ), গুজৰাটৰ ভিত্তি ৰেখাৰ জৰীপৰ ভিত্তিত প্ৰথম অৱস্থাত চিনাক্ত কৰা খণ্ডসমূহ হ’ল ছেৰিকালচাৰ , গাহৰি আৰু হস্ততাঁতৰ লগতে দুগ্ধ, হাঁহ-কুকুৰা, হস্তশিল্প, কৃষি আৰু উদ্যান শস্য। এন এইচ পি চি লিমিটেডে ২০১৮ চনৰ জুন মাহৰ পৰা ধেমাজি আৰু লখিমপুৰ জিলাৰ সকলো মহিলা হিতাধিকাৰীৰ সৈতে ছেৰিকালচাৰ, গাহৰি আৰু হস্ততাঁতৰ আঁচনি ৰূপায়ণ কৰি আহিছে বুলিও বিবৃতিটোত কোৱা হৈছে। বিবৃতিটোত আৰু কোৱা হৈছে— “এন এইচ পি চিয়ে ২০২২ চনৰ ২৫ নৱেম্বৰত সোৱণশিৰি নিম্ন উচ্চতম প্ৰজেক্টত ডাউনষ্ট্ৰিম ডেভেলপমেণ্টেল ৱৰ্কছৰ অংশ হিচাপে জীৱিকাৰ হস্তক্ষেপক প্ৰসাৰিত কৰাৰ দিশত এক বৃহৎ পদক্ষেপ গ্ৰহণ কৰিছে। আজি ২৬ নৱেম্বৰত মিচিং স্বায়ত্ব শাসিত পৰিষদৰ মুখ্য কাৰ্যবাহী পৰমানন্দ চায়েংগীয়াৰ উপস্থিতিত ছাৰ পিগ প্ৰডাক্টৰ কোম্পানীটোৰ বাবে কমন ফেচিলিটি চেণ্টাৰ (চিএফচি) নিৰ্মাণৰ আধাৰশিলা স্থাপন কৰে কাৰ্যবাহী সঞ্চালক বিপিন গুপ্তাই। বিবৃতিটোত আৰু কোৱা হৈছে— “SAAR Pig Producers Company Ltd হৈছে এন এইচ পি চি লিমিটেডৰ ডাউনষ্ট্ৰিম ডেভেলপমেণ্টেল ইনিচিয়েটিভৰ অধীনত ২৫০০ মহিলা সদস্যৰ কোম্পানী। এবাৰ সম্পূৰ্ণ হ’লে এই সুবিধাত বৈজ্ঞানিক বধশালা, নাৰ্চাৰী ইউনিট, ফাৰ’ইং চেড, ফিড মিল আৰু ষ্ট’ৰেজ ইউনিটৰ উপৰি ৪০০টা উচ্চমানৰ গাহৰিৰে ভাৰতৰ সৰ্ববৃহৎ গাহৰি প্ৰজনন পামৰ লগতে কোম্পানীটোৰ ভৱিষ্যতৰ হস্তক্ষেপৰ বাবে প্ৰশিক্ষণ কেন্দ্ৰ থাকিব।” এই উপলক্ষে ভাষণ দি নামনি সোৱণশিৰি জলবিদ্যুৎ প্ৰকল্পৰ কাৰ্যবাহী সঞ্চালক বিপিন গুপ্তাই প্ৰকল্প এলেকা আৰু ইয়াৰ আশে-পাশে থকা জনসাধাৰণৰ সৰ্বাংগীন উন্নয়নৰ প্ৰতি এন এইচ পি চিৰ দায়বদ্ধতাক পুনৰবাৰ উল্লেখ কৰে। সভাত ভাষণ দি মিচিং স্বায়ত্তশাসিত পৰিষদৰ মুখ্য কাৰ্যবাহী পৰমানন্দ চায়েংগীয়াই এন এইচ পি চিৰ এই পদক্ষেপৰ শলাগ লয় আৰু এই কেন্দ্ৰটোৰ উন্নয়নত সকলো সহায়ৰ আশ্বাস দিয়ে। অনুষ্ঠানত স্থানীয় অংশীদাৰ, মহিলা কৃষক আৰু এন এইচ পি চি আৰু মিচিং স্বায়ত্তশাসিত পৰিষদৰ বিষয়াসকলো উপস্থিত থাকে।