‘ব্ৰাজিল বধ’ কৰিয়ো কেমেৰুণৰ বিদায়, নক্ আউটলৈ চুইজাৰলেণ্ড

শতাব্দ ষ্টাফ ৰিপ’ৰ্টাৰ, ৩ ডিচেম্বৰ : এই নিশাটো কেমেৰুণে ঠিক কেনেকৈ মনত পেলাব! ব্ৰাজিলক পৰাস্ত কৰাৰ গৌৰৱ, নে বিশ্বকাপৰ পৰা বিদায়ৰ বিষাদ? বিশ্বকাপৰ মঞ্চত ব্ৰাজিলক পৰাস্ত কৰা আফ্ৰিকাৰ প্ৰথমখন দেশ হিচাপে পৰিগণিত হ’ল কেমেৰুণ। একে সময়তে বিদায়ো ল’লে ফুটবল মহাকুম্ভৰ পৰা। ইতিমধ্যে ব্ৰাজিলৰ স্থান নকআউটত নিশ্চিত হৈছে। লক্ষ্য আছিল পৰীক্ষা-নিৰীক্ষা কৰা আৰু অৱশ্যেই অপৰাজিত হৈ নকআউটলৈ যোৱা। কিন্তু এই পৰীক্ষাত ব্যৰ্থ হ’ল ব্ৰাজিল। এটাৰ পিছত এটাকৈ সুযোগ হেৰুৱালে। ব্ৰাজিলে ঠিক কিমান গ’ল দিব পাৰিলেহেঁতেন! সুযোগ আৰু সফলতা একে নহয়। ব্ৰাজিলে কেইবাটাও সুযোগ মূলধন হিচাপে ব্যৱহাৰ কৰিব নোৱাৰিলে। কেমেৰুণৰ হাতত আছিল মুষ্টিমেয় সুযোগ। সেয়াই হৈছে ইতিহাস। আবুবাকাৰে অতিৰিক্ত সময়ত ব্ৰাজিল বধৰ ইতিহাস লিখিলে। ইফালে ছুইজাৰলেণ্ডে গ্ৰুপ জিৰ পৰা ব্ৰাজিলৰ সৈতে নকআউটত স্থান লাভ কৰিছে।

কেমেৰুণ ১ (আবুবাকাৰ ৯০+২’)
ব্ৰাজিল ০

এখন অতি জনপ্ৰিয় ৱেব ছিৰিজ। ভাৰতত যিখন ‘মানি হ’ইষ্ট’ নামেৰে জনাজাত। এই ধাৰাবাহিকখনৰ এটা দৃশ্যত নেইমাৰকো দেখা গৈছে। যিয়েই নহওক, কথাটো সেইটো নহয়। কিন্তু এই ধাৰাবাহিকখনৰ এটা দৃশ্য পাহৰিব নোৱাৰি। ইয়াৰ মূল চৰিত্ৰ ‘এল প্ৰফেচাৰ’-এ তেওঁৰ সতীৰ্থসকলক উদাহৰণ হিচাপে এটা কথা বুজাবলৈ সুধিছিল— বিশ্বকাপত ব্ৰাজিল আৰু কেমেৰুণৰ মাজত মেচ হ’লে তেওঁলোকে কাক সমৰ্থন কৰিব! ব্ৰাজিলৰ অনুৰাগীয়ে নিশ্চয় কেমেৰুনক সমৰ্থন নকৰিব। কিন্তু যিসকল ব্ৰাজিলৰ সমৰ্থক নহয়! এজনে অৱজ্ঞাৰ সুৰত মন্তব্য কৰিছে— ব্ৰাজিলৰ বাহিৰে এই মেচখনত কোনে জয়ী হ’ব! কিন্তু অঘটন হওক, কিবা এটা নতুন হওক— এনে মন্তব্যও আহিল। বাকীসকলেও কয় যে তেওঁলোকে তথাকথিত দুৰ্বল দল, আণ্ডাৰডগ কেমেৰুণক সমৰ্থন কৰিব। ভুল নহয়। নিৰপেক্ষ ফুটবল অনুৰাগীয়ে দুৰ্বল দলক সমৰ্থন কৰাৰ প্ৰৱণতা থাকে যেতিয়া মেচখন শক্তিশালী দলৰ বিৰুদ্ধে হয়। লুচাইলত ব্ৰাজিল বনাম কেমেৰুণ খেলখনত তেনেকুৱাই হৈছিল নেকি? বিশ্বকাপৰ মেচ এখন ৱেব ছিৰিজৰ দৰে উপস্থাপন কৰা কাহিনী নহয়। কিন্তু সেয়া বাস্তৱ বুলি ওলাই পৰিল। বিশ্বকাপৰ মঞ্চত ব্ৰাজিলক পৰাস্ত কৰা আফ্ৰিকাৰ প্ৰথমখন দেশ হিচাপে পৰিগণিত হয় কেমেৰুণ। ইয়াৰ বাবে কেমেৰুণৰ যিমান কৃতিত্ব ৰৈছে, সিমানেই দায় ৰৈছে ব্ৰাজিলৰ। মুঠ ২১টা শ্বট, ইয়াৰে ৭টা লক্ষ্যত। ব্ৰাজিলে যেতিয়া এই সুযোগৰ সুবিধা ল’ব নোৱাৰিলে আৰু কাক দোষ দিব পাৰি! আনহাতে কেমেৰুনে লক্ষ্যলৈ ঠেলিছিল ৩টা শ্বট, ইয়াৰে এটা গ’ল আৰু ঐতিহাসিক বিজয়।

খেলখনৰ পূৰ্বে ভিনচেণ্ট আবুবাকাৰ এবাৰ হালধীয়া কাৰ্ডৰ সন্মুখীন হৈছিল। পিছে অতিৰিক্ত সময়ত ঐতিহাসিক গ’লটোৰ পিছত তেওঁ জাৰ্চি খুলি উল্লাস কৰে। ফলত দ্বিতীয়খন হালধীয়া কাৰ্ড আৰু ৰঙা কাৰ্ড দেখাৰ পিছত খেলপথাৰ এৰিব লগা হয়। কিন্তু তেওঁৰ কোনো আক্ষেপ নাই। মুখত গৌৰৱৰ হাঁহি এটা লৈ খেলপথাৰৰ পৰা ওলাই গ’ল। পাঁচবাৰৰ বিশ্ব চেম্পিয়নক পৰাস্ত কৰি আৰু কি ইয়াতকৈ বিচাৰে! কিন্তু কেমেৰুণ জয়ী হ’লেও তেওঁলোকে আন মেচৰ ফলাফলৰ ওপৰত নিৰ্ভৰ কৰিবলগীয়া হৈছিল। ছাৰ্বিয়া বনাম ছুইজাৰলেণ্ডৰ মেচখন ড্ৰ’ হ’লে বা ছুইজাৰলেণ্ড পৰাস্ত হ’লেহে কেমেৰুণে সুযোগ পাব। পিছে ষ্টেডিয়াম ৯৭৪ত ছুইজাৰলেণ্ডৰ নাটকীয় জয়।

চুইজাৰলেণ্ড ৩ (শ্বাকিৰী ২০’, ম্বোলো ৪৪’, ফ্ৰ’লাৰ ৪৮’)
ছাৰ্বিয়া ২ (মিট্ৰভিচ ২৬’, লাওভিচ ৩৫’)

খেলখনৰ ২০ মিনিটত জৰ্ডান শ্বাকিৰীয়ে ছুইজাৰলেণ্ডক অগ্ৰগতি প্ৰদান কৰে। কিন্তু ৬ মিনিটৰ ভিতৰতে ছাৰ্বিয়াৰ মিট্ৰভিচে সমতা স্থাপন কৰে। ৩৫ মিনিটত ডুছান লাওভিচৰ গ’লেৰে ছাৰ্বিয়াই অগ্ৰগতি লাভ কৰে। প্ৰথমাৰ্ধৰ শেষ মিনিটত ছুইজাৰলেণ্ডৰ হৈ কেমেৰুনত জন্মগ্ৰহণ কৰা ব্ৰেল ম্বোলোৱে সমতা স্থাপন কৰে। এয়া যেন জন্মভূমি কেমেৰুণৰ বিৰুদ্ধেই দিয়া গ’ল! সেয়ে তেওঁ উদযাপন কৰা নাছিল। কাৰণ এই সমতাই ছুইজাৰলেণ্ডতকৈ হৈ কেমেৰুণ শিবিৰতহে আশাৰ সঞ্চাৰ কৰিছিল। অৱশ্যে দ্বিতীয়াৰ্ধৰ আৰম্ভণিতে ছুইজাৰলেণ্ড ৰেমো ফ্ৰ’লাৰৰ গ’লটোৰে আগবাঢ়ি যায়। শেষত ৩-২ গ’লত জয়লাভ। যদিও পইণ্ট ব্ৰাজিলৰ সৈতে সমান, তথাপি গ’লৰ ব্যৱধানত দ্বিতীয় স্থানেৰে ছুইজাৰলেণ্ড নক্ আউটত।