লখিমপুৰৰ বিশিষ্ট সমাজকৰ্মী ৰাজেশ মালপানীক গুৱাহাটীত ‘জনসেৱা’ বঁটা প্ৰদান

শতাব্দ ষ্টাফ ৰিপ’ৰ্টাৰ, লখিমপুৰ, ২৭ মাৰ্চঃ লখিমপুৰৰ বিশিষ্ট সমাজকৰ্মী, ব্যৱসায়ী ৰাজেশ মালপানীক ২৫ মাৰ্চত জনসেৱা বঁটা প্ৰদান কৰা হয়৷ উত্তৰ পূৰ্বাঞ্চল ভিত্তিত তেওঁ পূৰ্বোত্তৰ প্ৰদেশীয় মাৰোৱাৰী সন্মিলনৰ পৰা এই বঁটা লাভ কৰে৷ উল্লেখ্য যে সমাজৰ বিভিন্ন ক্ষেত্ৰত বিশেষকৈ ৰাজনীতি, শিক্ষা, কলা-সংস্কৃতি আৰু জনসেৱাৰ ক্ষেত্ৰত আগবঢ়োৱা সেৱাৰ বাবে পূৰ্বোত্তৰ প্ৰদেশীয় মাৰোৱাৰী সন্মিলনে প্ৰতিবছৰে এনেদৰে প্ৰান্তীয় পুৰস্কাৰ আগবঢ়াই আহিছে৷ চলিত বৰ্ষত তথা প্ৰথম বাৰৰ বাবে আগবঢ়োৱা এই জনসেৱা বঁটা লখিমপুৰৰ ৰাজেশ মালপানীয়ে লাভ কৰাত সকলোৱে গৌৰৱবোধ কৰিছে৷ যোৱা ২৫ মাৰ্চত গুৱাহাটীৰ তেৰপন্থা ভৱনত অনুষ্ঠিত পূৰ্বোত্তৰ প্ৰদেশীয় মাৰোৱাৰী সন্মিলনে তেওঁক এই বঁটা প্ৰদান কৰে৷ সন্মিলনৰ সভাপতি ওম প্ৰকাশ খান্দেৱাল, প্ৰান্তীয় মহামন্ত্ৰী অশোক কুমাৰ আগৰৱালা আদিৰ উপস্থিতিত অনুষ্ঠিত সভাত প্ৰাক্তন সাংবাদিক ৰাজেশ মালপানীক আনুষ্ঠানিক ভাৱে এই বঁটা প্ৰদান কৰা হয়৷ উল্লেখনীয় কথা যে লখিমপুৰৰ বিশিষ্ট ব্যৱসায়ী ৰাজেশ মালপানীয়ে শংকৰদেৱ শিশু নিকেতন লখিমপুৰৰ প্ৰতিষ্ঠাপক সদস্য, পতঞ্জলি যোগ সমিতি উত্তৰ লখিমপুৰৰ প্ৰতিষ্ঠাপক সদস্য, শ্ৰীকৃষ্ণ গোপাল গো-শালা উত্তৰ লখিমপুৰৰ প্ৰতিষ্ঠাপক সদস্য, জনসেৱা উত্তৰ লখিমপুৰৰ সভাপতি, মাৰোৱাৰী জনসেৱা ট্ৰাষ্ট উত্তৰ লখিমপুৰৰ প্ৰাক্তন সম্পাদক, নৰ্থ লখিমপুৰ প্ৰেছ ক্লাবৰ প্ৰাক্তন কোষাধ্যক্ষৰ লগতে বহু অনুষ্ঠান প্ৰতিষ্ঠানৰ লগত জড়িত হৈ সেৱা আগবঢ়াই আহিছে৷ ফলস্বৰূপে তেওঁ এই বঁটা লাভ কৰাত সকলোৱে আনন্দ প্ৰকাশ কৰিছে৷