শতাব্দ ষ্টাফ ৰিপ’ৰ্টাৰ, ১০ জুলাই : মুদ্ৰাস্ফীতিৰ বাবে সমগ্ৰ বিশ্ব সাম্প্ৰতিক সময়ত অতি সংকটত পৰিছে। মুদ্ৰাস্ফীতিয়ে এখন দেশৰ অৰ্থনৈতিক আন্তঃগাঁথনিত ব্যাঘাত জন্মাব পাৰে তাৰ এক উদাহৰণ শ্ৰীলংকা আৰু পাকিস্তানৰ শেহতীয়া পৰিস্থিতি। ভাৰতত মূল্যবৃদ্ধিৰ ফলত ইন্ধনৰ পৰা আৰম্ভ কৰি বিভিন্ন প্ৰয়োজনীয় সামগ্ৰীৰ দাম ক্ৰমাগতভাৱে বৃদ্ধি পাই আহিছে, যাৰ ফলত সাধাৰণ মানুহৰ মূৰত আকাশ ভাগি পৰিছে। এই পৰিস্থিতিৰ পৰা কিবা সকাহ পোৱা যাবনে? অৱশেষত ভাৰতীয় ৰিজাৰ্ভ বেংকৰ ৰাজ্যপাল শক্তিকান্ত দাসে আশা প্ৰকাশ কৰে যে, এই বিত্তীয় বৰ্ষৰ দ্বিতীয়াৰ্ধৰ পৰা মুদ্ৰাস্ফীতি নিয়ন্ত্ৰণলৈ অনাটো সম্ভৱ হ’ব পাৰে। শক্তিকান্ত দাসে কয়— ‘‘সামগ্ৰিকভাৱে দেশৰ পৰিস্থিতি যদি আমি চাওঁ, আমি দেখিবলৈ পাওঁ যে এই বিত্তীয় বৰ্ষৰ প্ৰথমাৰ্ধত সমগ্ৰ দেশৰ যোগানৰ অৱস্থা যথেষ্ট ভাল। ফলত আশা কৰিব পাৰি যে দ্বিতীয়াৰ্ধত মুদ্ৰাস্ফীতি নিয়ন্ত্ৰণলৈ আহিব। সকলো ধৰণৰ পদক্ষেপ ল’বলৈ সাজু হৈছে ৰিজাৰ্ভ বেংক।” তেওঁ আৰু দাবী কৰে— “বৰ্তমান কেইবাটাও কাৰকে মুদ্ৰাস্ফীতি বৃদ্ধি বা হ্ৰাস কৰিব পাৰে। কিন্তু বেছি দিন নাথাকিব। মোৰ আশা যে, অতি সোনকালে মুদ্ৰাস্ফীতি নিয়ন্ত্ৰণলৈ আহিব। প্ৰয়োজনত আমি ব্যৱস্থাও গ্ৰহণ কৰিম।” শক্তিকান্ত দাসে আৰু কয়— “বৰ্তমান ৰাছিয়া আৰু ইউক্ৰেইনৰ মাজত হোৱা যুদ্ধৰ দৰে বিভিন্ন কাৰক আৰু সমস্যাই সমগ্ৰ বিশ্বতে মুদ্ৰাস্ফীতিৰ সৃষ্টি কৰিছে। অৱশ্যে পূৰ্বতে যিদৰে আছিল, এতিয়া তাক নিয়ন্ত্ৰণলৈ অনা সম্ভৱ হৈছে।” আৰ বি আইৰ গবৰ্নৰজনৰ মতে, চলিত বিত্তীয় বৰ্ষৰ দ্বিতীয়াৰ্ধৰ পৰা ই অধিক নিয়ন্ত্ৰণলৈ আহিব।
