টাৱাঙত সেনাৰ হেলিকপ্টাৰ দুৰ্ঘটনাগ্ৰস্ত

শতাব্দ প্ৰতিনিধি, তেজপুৰ, ৬অক্টোবৰঃ ভাৰত-চীন সীমান্তৰ তথা অৰুণাচল প্ৰদেশৰ টাৱাঙৰ সমীপত আকাশত আজি পুৱা দেশৰ সেনাৰ এখন হেলিকপ্টাৰ দুৰ্ঘটনাত পতিত হয়৷ এই দুৰ্ঘটনাত হেলিকপ্তাৰখনৰ এজন পাইলত লেফটেনেণ্ট কৰ্ণেল সৌৰভ যাদৱ গুৰুতৰ ভাবে আহত হয় আৰু তেওঁৰ চিকিৎসাধীন অৱস্থাত মৃত্যু হোৱাৰ বিপৰীতে আনজন সম্প্ৰতি চিকিৎসাধীন আৱস্হাত আছে৷ শোকাৱহ দুৰ্ঘটনাটোৰ বিষয়ে তেজপুৰত প্ৰতিৰক্ষা মন্ত্ৰালয়ৰ তথ্য আৰু জনসংযোগ বিষয়াই এক বিবৃতিত প্ৰকাশ কৰা অনুসৰি সেনাৰ চিতা হেলিকপ্তাৰখনৰ নিয়মীয়া উৰণৰ সময়তে টাৱাঙৰ সমীপতে দুৰ্ঘটনাটো সংঘটিত হয়৷ টাৱাঙৰ আগৰ অঞ্চলত হেলিকপ্তাৰখন দুৰ্ঘটনাগ্ৰস্ত হোৱাৰ পাছতে পাইলট দুজনক উদ্ধাৰ কৰা হয় আৰু দুয়োকে সমীপৱৰ্তী সেনা চিকিৎসালয়লৈ নিয়া হয় যদিও এজনৰ মৃত্যু ঘটে৷ আনহাতে এই দুৰ্ঘটনাৰ কাৰণ নিৰ্ণয় কৰিব পৰা হোৱা নাই৷