তেজপুৰতো এনপিএছ বাতিলৰ দাবীত কৰ্ম বিৰতি কাৰ্যসূচী ৰূপায়ণ কৰ্মচাৰীৰ

শতাব্দ প্ৰতনিধি‍, তেজপুৰ, ১০ ফেব্ৰুৱাৰীঃ ৰাষ্ট্ৰীয় পেঞ্চন আঁচনি চমুকৈ এনপিএছ বাতিলৰ দাবীত আজি তেজপুৰতো কৰ্মচাৰী সকলে কৰ্ম বিৰতি কাৰ্যসূচী ৰূপায়েণেৰে তীব্ৰ প্ৰতিবাদ সাব্যস্ত কৰে ৷  উল্লেখ্য যে প্ৰতিবাদী কৰ্মচাৰীসকলৰ এই এদিনীয়া কৰ্ম-বিৰতিৰ ফলত আজি তেজপুৰ ন্যায়িক  আদালতৰ লগতে  শোণিতপুৰ জিলা উপায়ুক্ত কাৰ্যালয়ৰো কামকাজ স্তব্ধ হৈ পৰে ৷ কাৰ্যালয় এৰি ৰাজপথত  প্ৰতিবাদ সাব্যস্ত কৰা কৰ্মচাৰী সকলে নতুনকৈ প্ৰৱৰ্তিত ৰাষ্ট্ৰীয় পেঞ্চন আঁচনি বাতিল কৰি পুৰনি পেন্সন ব্যৱস্থা প্ৰৱৰ্তনৰ দাবী উত্থাপন কৰে ৷ এইয়া নিজৰ প্ৰাপ্য অধিকাৰ বুলি দাবী জনাই প্ৰতিবাদী কৰ্মচাৰীসকলে কয় যে,দেশৰ কেবাখনো ৰাজ্যত ইতিমধ্যে পুৰণি পেন্সন ব্যৱস্থা অৰ্থাৎ অ’পিএছ প্ৰৱৰ্তন কৰা হৈছে৷ অসমৰ ক্ষেত্ৰত অদ্যাপি এইয়া হৈ উঠা নাই ৷ বিষয়টো আদালতৰ মজিয়াত আছে যদিও অসম চৰকাৰে ইতিমধ্যে এনপিএছ বাতিলৰ আশ্বাস প্ৰদান কৰিছে৷ তৎসত্বেও ই কাৰ্যতঃ হৈ নুঠাত পুণৰাই সমগ্ৰ  ৰাজ্যজুৰি আজি সকলো এনপিএছ কৰ্মচাৰীসকলে  কৰ্ম বিৰতি পালনেৰে এইদৰে  ওলাই ৰাজপথলৈ ওলাই আহি প্ৰতিবাদ  সাব্যস্ত কৰিবলৈ বাধ্য হোৱা সদৰী কৰে ৷