বায়খো উৎসৱত জুইৰ সৈতে নাচিছে বায়ব্ৰাই

গোৱালপাৰা, ১৭ এপ্ৰিল:-গোৱালপাৰা জিলাৰ এক নং বৰঝৰা নদীয়াপাৰা গাঁৱৰ নলঙ্গা পাহাৰত থকা বায়খো মন্দিৰৰ প্ৰাঙ্গণত আজি সন্ধিয়াৰ পৰা আৰম্ভ হৈছে ৰাভা জাতীয় উৎসৱ বায়খো পূজা । কৃষি ভিত্তিক এই উৎসৱত ৰাভাসকলে জুইৰ সৈতে খেলা-নৃত্য কৰে। বায়খো দেৱীক আৰাধনা কৰি ৰাভা সকলে পৰম্পৰাগতভাৱে পৱিত্ৰতাৰ পৰিচয় দিয়ে । বায়খো এগৰাকী শক্তিশালী দেৱী। ৰাভাসকলে সাহসেৰে লিপ্ত হয় । যাক কিল্লা দিবিকায় বুলিও কয় ।বায়খো পূজাত অগ্নি পৰীক্ষাত অংশগ্ৰহণ কৰাসকলক বায়ব্ৰা বুলি কয় । এই বায়ব্ৰাসকলে সাত দিন সাত ৰাতি বায়খো থানত পৰম্পৰা নীতিৰে নিজকে শুদ্ধি কৰি দেৱীক আৰাধনা কৰি থাকিব লাগে । বায়খো পূজাৰ জৰিয়তে ৰাভাসকলে ৰোগ,ব্যাধি,অপায়,অমংগল আদি দূৰ কৰাৰ কামনা কৰাৰ লগতে শস্যৰ নদন বদন হোৱাটো বিচাৰে । এক নং বৰঝৰা নদীয়াপাৰাত আজিৰ পৰা তিনিদিন ধৰি চলিব বায়খো পূজা । আজি সন্ধিয়া ধুমুহা-বৰষুণক আওকান কৰি বায়ব্ৰাসকলে অগ্নি পৰীক্ষা সমাপ্ত কৰে।প্ৰবাদ আছে বায়খো পূজা দিনা ধুমুহা বৰষুণ আহিবই ।এয়া ৰাভাসকলৰ বিশ্বাস । আনহাতে ৰাভা যুৱক-যুৱতীয়ে বায়খো উৎসৱতে প্ৰণয় গীতেৰে নিজৰ মনৰ আপোন মানুহক প্ৰেম ভালপোৱা নিবেদন কৰাৰো পৰম্পৰা আছে।