শিক্ষক দিৱসত প্ৰবীণ শিক্ষাবিদ মীৰা শৰ্মালৈ সম্ভাষণ

শতাব্দ ষ্টাফ ৰিপ’টাৰ তেজপুৰ ৬ ছেপ্টেম্বৰ: “আবেলি কিৰণে/জীৱন জগালে /সোণসেৰীয়া গানে,/জ্ঞানে ধ্যানে সংগে/অনুপম ৰংগে/নব বাৰতা আনে —–/’’শীৰ্ষক প্ৰতীকী গীতৰ সমূহীয়া পৰিবেশনৰ এক জীপাল পৰিৱেশত বৃহত্তৰ তেজপুৰ অৱসৰপ্ৰাপ্ত শিক্ষক ঐক্যমঞ্চৰ শিক্ষক দিৱসৰ কাৰ্যসূচী আৰম্ভ হয় ৷ অসমীয়া ক্লাব,তেজপুৰত অনুষ্ঠিত সভাখনত পণ্ডিত মনীষা ড° সৰ্বেপল্লী ৰাধাকৃষ্ণণৰ ছবিত পুষ্পাৰ্পণ আৰু সদ্য প্ৰয়াত বিশিষ্ট শিক্ষাবিদ, সাহিত্যিক তথা সমাজ সচেতন ব্যক্তি দেবেন দত্ত, অনন্ত কলিতা,জয়ন্ত মহাপাত্ৰ,নিৰু শৰ্মা পৰাজুলী ,পৰজ বকুল বৰুৱা ,ড° সুখ বৰুৱা ৰূপনাথ উপাধ্যায় আদিসকলৰ স্মৃতিত এক মিনিট সময় মৌনতা অবলম্বন কৰা হয় ৷ সভাপতি লাৱণ্য দেৱীয়ে পৌৰোহিত্য কৰা আৰু সম্পাদক ৰাজু বৰুৱাই উদ্দেশ্য ব্যাখ্যা কৰা সভাখনিত উপস্থিতসকলে শিক্ষকসকলৰ ত্যাগ, বদান্যতা আৰু দায়বদ্ধতাৰ বিষয়ে আলোচনা কৰে৷ এই অনুষ্ঠানতে ঐক্যমঞ্চৰ প্ৰয়াত তিনিগৰাকী শিক্ষয়িত্ৰী নিৰ্মালী ভূঞা ,দেবযানী হাজৰিকা, মৃণালী চেতিয়াৰ ওপৰত এক সোঁৱৰণী বক্তৃতা অনুষ্ঠিত হয় ৷শিক্ষাবিদকেইগৰাকীৰ ওপৰত বক্তৃতা প্ৰদান কৰে ক্ৰমে প্ৰভা বৰা ,প্ৰেমলতা দাস আৰু ৰাজু বৰুৱাই ৷ দিৱসৰ কাৰ্যসূচীৰ অংশ হিচাপে লোকনায়ক অমিয় কুমাৰ দাস উচ্চ মাধ্যমিক কন্যা বিদ্যালয় (তেজপুৰ) ৰ প্ৰতিষ্ঠাপক প্ৰধান শিক্ষয়িত্ৰী শিক্ষাবিদ ,সাংস্কৃতিক কৰ্মী, অভিনেত্ৰী মীৰা শৰ্মাক তেখেতৰ অসুস্থতা হেতু বাসভৱনত গৈ সম্ভাষণ জ্ঞাপন কৰা হয় ৷ ঐক্যমঞ্চৰ তৰফৰ পৰা মীৰা শৰ্মাক গামোছা , ফুলৰ থোপা ,কলম আৰু আৰ্থিক সাহায্য আগবঢ়োৱা হয় ৷ঐক্যমঞ্চৰ সদস্যসকলে তেখেতৰ দ্ৰুত আৰোগ্য কামনা কৰে ৷ ইয়াৰ পূৰ্বে সভাত মীৰা শৰ্মা বাইদেউৰ শিক্ষক জীৱনৰ ওপৰত আলোকপাত কৰি কৰুণা বৰা ভূঞা,ৰীণা বৰদলৈ আৰু মণি দেৱীয়ে বক্তব্য ৰাখে ৷ বৃহত্তৰ তেজপুৰ অৱসৰপ্ৰাপ্ত শিক্ষক ঐক্যমঞ্চৰ শিক্ষক দিৱসৰ সভাত গিৰিবালা ভূঞা ,বেণী তাঁতি চুণ্ডী ,ভাৰতী দাসকে‌ ধৰি বহু বিশিষ্ট ব্যক্তি উপস্থিত থাকে