জামুগুৰিহাট : ৬ আগষ্টঃ এগৰাকী ১৩ বছৰীয়া মুখা শিল্পী । শিল্পীগৰাকীৰ নাম নিশান্ত বৰুৱা । শিল্পীগৰাকীৰ হাতৰ পৰশত প্ৰাণ পাই উঠিছে ভগৱান নৰসিংহ, বিষ্ণুৰ লগতে বিভিন্ন ভাওনাত ব্যৱহৃত মুখা । অতি কম বয়সতে শিল্পী নিশান্তৰ এনে প্ৰতিভাই এতিয়া সকলোৰে মাজত বিশেষ চৰ্চা লাভ কৰিছে । শোণিতপুৰ জিলাৰ জামুগুৰিহাটৰ মূঢ়াদল নিবাসী নাৰায়ণ বৰুৱা আৰু দুলুমনি বৰুৱাৰ পুত্ৰ তথা কণমানি মুখা শিল্পী হিচাপে পৰিচিত নিশান্ত বৰুৱা৷ বিগত তিনি বছৰে ডাঠ কাগজ কাটি কাটি ভাওনাত ব্যৱহৃত বিভিন্ন মুখা নিৰ্মাণ কৰি ৰাইজৰ প্ৰশংসা বুটলিবলৈ সক্ষম হৈছে নিশান্তই ৷ নিশান্ত হৈছে নদুৱাৰ জাতীয় বিদ্যালয়ৰ অষ্টম মানৰ ছাত্ৰ ৷ ৰাস, ভাওনাত ব্যৱহৃত হোৱা বিভিন্ন মুখা নিৰ্মাণ কৰে এইগৰাকী কণমানি শিল্পীয়ে । ইয়াৰোপৰি জামুগুৰিহাটৰ বিভিন্ন প্ৰান্তত অনুষ্ঠিত প্ৰতিযোগিতাসমূহত ভাওনাৰ অভিনয়ৰে নিশান্তই যথেষ্ট সমাদৰ লাভ কৰিবলৈ সক্ষম হৈছে।