জি.এ.ই.এফ.ৰ ৱেবিনাৰত দুগৰাকী সফল মহিলাৰ কাহিনী

শতাব্দ ষ্টাফ ৰিপৰ্টাৰ, ২ ডিচেম্বৰঃ গোলকীয় অসমীয়া উদ্যমিতা মঞ্চ (GAEF, www.gaefnortheast.org)ৰ উদ্যোগত ২৭ নৱেম্বৰ তাৰিখে মাহেকীয়া ৱেবিনাৰখন অনুষ্ঠিত হয়। তন্ময় ভাগৱতীয়ে আঁত ধৰা ৱেবিনাৰখনত সমল ব্যক্তি হিচাপে অপৰাজিতা দাস বৰুৱা আৰু অৰ্চনা বৰদলৈ উপস্থিত আছিল।অৰ্চনা বৰদলৈয়ে হস্ততাঁত আৰু সৌন্দৰ্য্য যত্নৰ খণ্ড আৰু অপৰাজিতা দাস বৰুৱাই অসমীয়া গহনা আৰু কৃষি খণ্ডৰ গুৰুত্ব আৰোপ কৰি ষ্টাৰ্ট-আপ ঔদ্যোগীকৰণৰ ওপৰত আলোচনা আগবঢ়ায়। এই দুয়োগৰাকী সফল উদ্যোগীয়ে নিজৰ লাভজনক কেৰিয়াৰৰ বাহিৰলৈ গৈ সকলো বিপদৰ বিপৰীতে নিজাকৈ ব্যৱসায় আৰম্ভ কৰিছে। নিজৰ যাত্ৰাৰ উদাহৰণ দি তেওঁলোকে ষ্টাৰ্ট-আপে সন্মুখীন হোৱা প্ৰত্যাহ্বানৰ বিষয়ে কয় । যেনে- বিনিয়োগ বিচাৰি উলিওৱা, ব্ৰেণ্ডিং, মেণ্টৰশ্বিপ আৰু আটাইতকৈ গুৰুত্বপূৰ্ণ কথাটো হ’ল- অসমীয়া সমাজত মানসিকতাৰ প্ৰত্যাহ্বান য’ত সাধাৰণ মতামত হ’ল চৰকাৰী চাকৰি এটাই কেৰিয়াৰ হিচাপে আটাইতকৈ নিৰাপদ বিকল্প। কৰ্মৰত মাতৃ আৰু পত্নী হিচাপে কৰ্ম-জীৱনৰ ভাৰসাম্যৰ কথাও কয়। প্ৰয়োগমূলক ব্যৱসায়িক জ্ঞান আৰু উত্তৰাধিকাৰ পৰিকল্পনাৰ ভূমিকা আৰু প্ৰয়োজনীয়তাৰ লগতে ক্ষুদ্ৰ আৰু মজলীয়া ব্যৱসায়ৰ বাবে আৰ্থিক সহায়ৰ প্ৰয়োজনীয়তাৰ বিষয়ে উল্লেখ কৰে। অসমৰ যুৱক-যুৱতীসকলক সৱলীকৰণ কৰাৰ সমান্তৰালকৈ অসমৰ বাবে ৰাজহ আহৰণকাৰী হ’ব পৰা এই উদ্যোগবোৰৰ বৰ্ধিত আৰু সবলীকৰণৰ বাবে জিএইএফে মেণ্টৰিং আৰু প্ৰয়োজনীয় সম্পদৰ ব্যৱস্থা কৰিব। ড° সমীৰ বৰুৱা, ড° ভাস্কৰ বৰা, ৰাজবী হুছেইন, অৰ্চনা বৰদলৈ, পাৰ্থ গগৈ, অৰ্পিতা গগৈ আৰু ড° বুলজিৎ বুঢ়াগোহাঁয়েও ৱেবিনাৰখনত নিজৰ মতামত আগবঢ়ায়।