শতাব্দ ষ্টাফ ৰিপ’ৰ্টাৰ,তেজপুৰ,১২জুলাইঃ অসম-অৰুণাচল সীমান্তৰ তথা শোণিতপুৰৰ নামেৰী ৰাষ্ট্ৰীয় উদ্যানত চোৰাংচিকাৰীয়ে ঢেকীয়াপতীয়া বাঘ এটা নিধন কৰা ঘটনাই প্ৰকৃতি প্ৰেমী সংগঠনৰ মাজত ব্যাপক চাঞ্চল্যৰ সৃষ্টি হৈছে।এই সন্দৰ্ভত সম্প্ৰতি মুখ খুলিছে নামেৰী ৰাষ্ট্ৰীয় উদ্যান কৰ্তৃপক্ষই৷ উল্লেখযোগ্য যে, যোৱা আঠ জুলাইত কেন্দ্ৰীয় শুল্ক বিভাগে এক অভিযান চলাই ইটাখোলাৰ পৰা জব্দ কৰিছিল এটা ঢেঁকীয়পতীয়া বাঘৰ ছালসহ কংকালৰ বিভিন্ন অৱশিষ্ট৷ ইয়াৰ পাছতে এই গোচৰ নামেৰী ৰাষ্ট্ৰীয় উদ্যান কৰ্তৃপক্ষই চমজি লয় আৰু যোৱা চাৰিদিন ধৰি তদন্ত অব্যাহত ৰাখে৷ আনহাতে ঘটনা সন্দৰ্ভত তিনিজনক আটক কৰাৰ লগতে এখন বলেৰ গাড়ীও জব্দ কৰা হৈছে৷ বাঘ হত্যাৰ ঘটনাটোৰে জড়িত মূল অভিযুক্ত বৰ্তমান পলাতক হৈ থকাৰ বিপৰীতে অভিযুক্তক কৰায়ত্ত কৰাৰ বাবে ক্ষীপ্ৰ তদন্ত অব্যাহত আছে৷ এই অভিযুক্তক শীঘ্ৰেই কৰায়ত্ত কৰিবলৈ সক্ষম হ’ব বুলি প্ৰকাশ কৰিছে ৰাষ্ট্ৰীয় উদ্যান কৰ্তৃপক্ষই৷ উল্লেখযোগ্য যে, মূল অভিযুক্তৰ ঘৰৰ পৰা এটা হস্ত নিৰ্মিত বন্দুকো উদ্ধাৰ কৰিছে বন বিভাগে৷ নামেৰী ৰাষ্ট্ৰীয় উদ্যানৰ বাফাৰ এলেকাত বিগত পাঁচ ছমাহ পূৰ্ৱে ঢেকীয়পতীয়াটোক গুলীয়াই হত্যা কৰা বুলি প্ৰকাশ কৰিছে বন বিভাগে৷ উল্লেখ্য যে হত্যা কৰা এই ঢেকীয়াপতীয়া বাঘটো যোৱা বৰ্ষত উমানন্দত আতংকৰ সৃষ্টি কৰা বাঘটো বুলি বন বিভাগৰ তথ্যত প্ৰকাশ পাইছে৷ যোৱা ডিচেম্বৰত এই বাঘটো উমানন্দত বন বিভাগে বন্দী কৰাৰ পাছত ইয়াৰ পৰা আনি নামেৰী ৰাষ্ট্ৰীয় উদ্যানত মুকলি কৰি দিয়া হৈছিল।