পাঁচ ভাৰতীয় জলাশয়ক ৰামছাৰ ছাইটৰূপে স্বীকৃতি

শতাব্দ ষ্টাফ ৰিপ’ৰ্টাৰ, ২৬ জুলাই : ৰামছাৰ সন্মিলনৰ অধীনত আৰু পাঁচটা ভাৰতীয় স্থানক আন্তঃৰাষ্ট্ৰীয় গুৰুত্বপূৰ্ণ জলাশয় হিচাপে স্বীকৃতি দিয়া হৈছে। ইয়াৰে তিনিটা জলাশয় তামিলনাডুত আৰু এটাকৈ মিজোৰাম আৰু মধ্যপ্ৰদেশত আছে, যাৰ ফলত দেশখনত মুঠ ৰামছাৰ ছাইট হলগৈউ ৫৪টা। নতুনকৈ স্বীকৃতি দিয়া এই পাঁচটা স্থানসমূহৰ ভিতৰত আছে কাৰিকিলি পক্ষী অভয়াৰণ্য, তামিলনাডুৰ পল্লিকৰণাই মাৰ্চ ৰিজাৰ্ভ ফৰেষ্ট আৰু পিচাৱৰাম মেংগ্ৰোভ, মিজোৰামৰ পালা জলাশয় আৰু মধ্যপ্ৰদেশৰ সাক্ষাসাগৰ।

ৰামছাৰ স্বীকৃতিৰ লক্ষ্য হৈছে বিশ্বৰ জৈৱ বৈচিত্ৰ্য সংৰক্ষণৰ বাবে আৰু ইয়াৰ পৰিৱেশ তন্ত্ৰৰ উপাদান, প্ৰক্ৰিয়া, আৰু সুবিধাসমূহ ৰক্ষণাবেক্ষণৰ জৰিয়তে মানৱ জীৱন বজাই ৰখাৰ বাবে গুৰুত্বপূৰ্ণ জলাশয়ৰ আন্তঃৰাষ্ট্ৰীয় নেটৱৰ্ক গঢ়ি তোলা আৰু ৰক্ষণাবেক্ষণ কৰা। এই স্বীকৃতি জলাশয় সংৰক্ষণ আৰু বহনক্ষম ব্যৱহাৰৰ বাবে আন্তঃৰাষ্ট্ৰীয় চুক্তি ৰামছাৰ সন্ধিৰ অংশ। ১৯৭১ চনৰ ২ ফেব্ৰুৱাৰীত এই চুক্তি স্বাক্ষৰিত হোৱা কেছপিয়ান সাগৰৰ সমীপত অৱস্থিত ইৰাণৰ ৰামছাৰ চহৰৰ নামেৰে ইয়াৰ নামকৰণ কৰা হৈছে। তলত ৰামছাৰ ছাইট হিচাপে স্বীকৃত ভাৰতৰ নতুন স্থানকেইটাৰ চমু পৰিচয় আগবঢ়োৱা হ’ল।

চেন্নাইৰ পৰা প্ৰায় ৮৬ কিলোমিটাৰ দূৰত কাঞ্চিপুৰম জিলাত অৱস্থিত এই পক্ষী অভয়াৰণ্যখন পাঁচ কিলোমিটাৰ বহল এলেকাত বিস্তৃত আৰু ইয়াত পানীকাউৰী, বগলী, ধূসৰ বগলী, শামুকভঙা, মণিয়ৰী, খন্তিয়া বগলী, নাইট হেৰন আদিৰ বাসস্থা। বনৰীয়া হাঁহৰ বিভিন্ন প্ৰজাতি আৰু ধূসৰ পেলিকানৰ বাবেও কাৰিকিলি বিখ্যাত।

চেন্নাই চহৰৰ অৱশিষ্ট প্ৰাকৃতিক জলাশয়সমূহৰ ভিতৰত অন্যতম এই জলাশয়টোৱে ৬৫টা জলাশয় সামৰি ২৫০ বৰ্গ কিলোমিটাৰ এলেকাত নিষ্কাশন কৰে। তামিলনাডু ৰাজ্যিক জলাশয় কৰ্তৃপক্ষৰ মতে, ভাৰতত জলাশয় হিচাপে যোগ্যতা অৰ্জন কৰা কেইটামান প্ৰাকৃতিক উপকূলীয় জলজ বাসস্থানৰ ভিতৰত পল্লীকৰনাই অন্যতম।

দেশৰ মেংগ্ৰোভ বনাঞ্চলসমূহৰ ভিতৰত অন্যতম পিচাভাৰম তামিলনাডুৰ কুড্ডালোৰ জিলাৰ চিদাম্বৰমৰ ওচৰত অৱস্থিত। ইয়াত মেংগ্ৰোভ অৰণ্যৰে আবৃত বিশাল বিস্তৃত পানীৰ এটা দ্বীপ আছে।

১৯১৮ চনত মানিয়েৰ নদীৰ পৰা সৃষ্টি হোৱা সাক্ষাসাগৰ মধ্যপ্ৰদেশৰ শিৱপুৰী জিলাৰ মাধৱ ৰাষ্ট্ৰীয় উদ্যানৰ সমীপত অৱস্থিত।

মিজোৰামৰ ছাইহা জিলাৰ ফুৰা গাঁৱৰ ওচৰত অৱস্থিত এই পালা বা পালাক জলাশয় বহু জীৱ-জন্তু, চৰাই, সৰীসৃপৰ বাসস্থান। মিজোৰাম চৰকাৰৰ মতে ইয়াৰ ভৌগোলিক অৱস্থান ভাৰত-বাৰ্মা জৈৱ বৈচিত্ৰ্যৰ হটস্পটৰ অন্তৰ্গত আৰু সেয়েহে ই প্ৰাণী আৰু উদ্ভিদ প্ৰজাতিৰে সমৃদ্ধ। এই হ্ৰদটো পালক বন্যপ্ৰাণী অভয়াৰণ্যৰ এটা প্ৰধান অংশ আৰু ই অভয়াৰণ্যখনৰ প্ৰধান জৈৱ বৈচিত্ৰ্যক চহকী কৰি আহিছে।