পুৰণা পেঞ্চন নীতিৰ বাহাল ৰখাৰ দাবীত তেজপুৰত কৰ্মচাৰীৰ প্ৰতিবাদ

শতাব্দ প্ৰতিনিধি‍, তেজপুৰ, ২২ আগষ্টঃ সমগ্ৰ ৰাজ্যৰ লগতে তেজপুৰতো চৰকাৰী কৰ্মচাৰী সকলে আজি পুৰণা পেঞ্চন নীতি বাহাল ৰখাৰ দাবীত অসহযোগ কাৰ্যসূচী পালন কৰে৷ উল্লেখযোগ্য যে, ৰাজ্যৰ প্ৰায় ৩০টা সংস্থা-সংগঠনৰ ঐক্যমঞ্চ সিদ্ধান্ত মৰ্মে আজি আৰু ২৩ আগষ্টত সদৌ অসম চৰকাৰী এন পি এছ কৰ্মচাৰী সংস্থাই এইদৰে দুদিনীয়া কাৰ্যসূচীৰে কৰ্ম বিৰতি পালন কৰিছে৷ সেই মৰ্মে সংস্থাৰ শোণিতপুৰ জিলা সমিতিৰ উদ্যোগত আজি দিনৰ ১১ বজাত শোণিতপুৰ জিলাৰ বিভিন্ন সংস্থা- সংগঠনৰ সহযোগত তেজপুৰ আদালত চাৰিআলিৰ পৰা এক সমদল বাহিৰ কৰে৷ কাইলৈ প্ৰতিবাদকাৰী সকলে শোণিতপুৰৰ আয়ুক্তৰ জৰিয়তে এখন স্মাৰক পত্ৰও ৰাজ্যৰ মুখ্যমন্ত্ৰীলৈ প্ৰেৰণ কৰিব বুলিও সদৰী কৰে৷ উল্লেখযোগ্য যে, ৰাজ্য চৰকাৰৰ নতুন পেঞ্চন নীতিৰ বিৰোধিতা কৰি আজি তেজপুৰৰ মহাবিদ্যালয়, আদালত, জিলা আয়ুক্ত কাৰ্যালয়ৰ সকলো কৰ্মচাৰীয়ে এই প্ৰতিবাদী কাৰ্যসূচীত অংশ গ্ৰহণ কৰে৷ পুৰণা পেঞ্চন নীতিৰ বাহাল ৰখাৰ দাবীৰে তেজপুৰ আদালত চাৰীয়ালিত বৃহৎ সংখ্যক কৰ্মচাৰীয়ে এই প্ৰতিবাদী কাৰ্যসূচী ৰূপায়ণ কৰে৷ প্ৰতিবাদী কৰ্মচাৰী সকল নিজা কৰ্মস্থলীত পুৱাৰ পৰা উপস্থিত থাকে যদিও কোনো ধৰণৰ কামকৰাৰ পৰা বিৰত থাকে৷ প্ৰতিকূল বতৰ মাজতে কৰ্মচাৰী সকলে এই প্ৰতিবাদ সাব্যস্ত কৰে৷ তেওঁলোকে “এক দেশ এক নীতিৰ আধাৰত পুৰণা পেঞ্চন নীতি বাহাল ৰাখক, চৰকাৰী কৰ্মচাৰীৰ ভৱিষ্যত সুৰক্ষা কৰক আদি শ্লোগানৰে প্ৰতিবাদ সাব্যস্ত কৰে৷