শতাব্দ ষ্টাফ ৰিপ’ৰ্টাৰ, ২৪ নৱেম্বৰ : আজিৰ ব্যস্ত যুগত প্ৰায় সকলোৱেই দূৰৈৰ গন্তব্যস্থানলৈ যাত্ৰা কৰিবলৈ বিমান যাত্ৰাৰ ওপৰত নিৰ্ভৰ কৰে। ইয়াৰ জৰিয়তে কম সময়ৰ ভিতৰতে কেইবাশ কিলোমিটাৰ দূৰত্ব অতিক্ৰম কৰিব পৰা যায়। মাত্ৰ কেইঘণ্টামানৰ ভিতৰতে বিমান যাত্ৰাৰ বাবেই পৃথিৱীৰ যিকোনো প্ৰান্তত উপস্থিত হ’ব পাৰে। অৱশ্যে বৰ্তমানৰ প্ৰতিবেদনত আমি আপোনালোকৰ আগত দাঙি ধৰিম এক বিমান যাত্ৰাৰ প্ৰসংগ; যিটো সম্পূৰ্ণ হ’বলৈ মাত্ৰ ৮০ ছেকেণ্ড সময় লাগে! হয়, প্ৰথমতে বিশ্বাস কৰিব নোৱাৰা যেন লাগিলেও একেবাৰে সঁচা। ইয়াৰ উপৰি এই বিমানযাত্ৰাই ইতিমধ্যে বিশ্বৰ আটাইতকৈ চুটি বিমানযাত্ৰাৰ খিতাপ লাভ কৰিছে (Shortest Flight In The World)। মূলতঃ এই বিমানযাত্ৰা ৱেষ্ট্ৰে আৰু পাপা ৱেষ্ট্ৰেৰ মাজত কৰা হয়। এই যাত্ৰাত বিমানখনে উৰণৰ পৰা অৱতৰণলৈকে মাত্ৰ ৮০ ছেকেণ্ড সময় লয়। এই ঠাই দুখন মূলতঃ দ্বীপ৷ দুয়োটা দ্বীপৰ মাজত কোনো দলং নাই। ফলত বাছ বা ৰে’ল সেৱা নাই। এই কাৰণেই যাত্ৰীসকলে বিমানেৰে এটা দ্বীপৰ পৰা আন এটা দ্বীপলৈ যায়।
গাড়ীৰ দৰে সৰু সৰু বিমান আছে
এই ঠাইখন স্কটলেণ্ডত। ইয়াক অৰ্কনি দ্বীপ বুলিও কোৱা হয়। ইয়াত লগান এয়াৰে বিমান চলায়। প্ৰায় ৫০ বছৰ ধৰি তেওঁলোকে তাত সেৱা আগবঢ়াই আহিছে। জনা যায় যে বতৰ পৰিষ্কাৰ হ’লে মাত্ৰ ৪৭ ছেকেণ্ডতে ৱেষ্ট্ৰেৰ পৰা পাপা ৱেষ্ট্ৰে পাব পাৰি। কিন্তু এই দুটা দ্বীপৰ মাজত চলাচল কৰা বিমানবোৰৰ আকাৰ অতি সৰু আৰু ৮ জন যাত্ৰী কঢ়িয়াই নিব পাৰে। এনে পৰিস্থিতিত অধিকাংশ পৰ্যটক আৰু স্থানীয় লোকে এই বিমান সেৱাৰ সুবিধা লয়।
ভাড়াত ৰেহাই উপলব্ধ
আমি সকলোৱে জানো যে বিমান যাত্ৰাৰ বাবে বহু খৰচ হয়। এনে ক্ষেত্ৰত স্থানীয় চৰকাৰে এই ভাড়াৰ ক্ষেত্ৰত ৰাইজক ৰেহাই দিয়ে। এই ৰেহাইক ‘ৰাজসাহায্য’ বুলি ক’ব পাৰি। বৰ্তমান এটা দ্বীপৰ পৰা আন এটা দ্বীপলৈ যাবলৈ ১৭ৰ পৰা ১৮ পাউণ্ড খৰচ হয়।
দ্বীপ দুটাৰ মাজৰ দূৰত্ব মাত্ৰ ২.৭ কিলোমিটাৰ
ৱেষ্ট্ৰে আৰু পাপা ৱেষ্ট্ৰেৰ মাজৰ দূৰত্ব ২.৭ কিলোমিটাৰ। এনে ক্ষেত্ৰত এই দুটা দ্বীপৰ মাজত এখন দলং নিৰ্মাণ কৰাটো অতি ব্যয়বহুল। মন কৰিবলগীয়া যে ৱেষ্ট্ৰেত মুঠ ৬০০ আৰু পাপা ৱেষ্ট্ৰেত ৯০ জন লোক বাস কৰে। এই ক্ষেত্ৰত সেই দুটা দ্বীপত আমাৰ দেশত বাছ চলোৱাৰ দৰেই বিমানৰ উৰণ সম্পূৰ্ণ হয়।
