বীৰ লাচিতৰ ৪০০ সংখ্যক জন্ম-জয়ন্তী উপলক্ষে লেখা আহ্বান তিনিচুকীয়া জিলা প্ৰশাসনৰ : ২০ আগষ্ট অন্তিম দিন

শতাব্দ প্ৰতিনিধি, তিনিচুকীয়া, ৩ আগষ্ট : বীৰ লাচিত বৰফুকনৰ ৪০০ সংখ্যক জয়ন্তী উপলক্ষে অসম চৰকাৰৰ সাধাৰণ প্ৰশাসন বিভাগৰ নিৰ্দেশনা অনুসৰি তিনিচুকীয়া জিলা প্ৰশাসনে বীৰগৰাকীৰ জীৱন আৰু বীৰত্বৰ সৈতে জড়িত বিষয়ৰ ওপৰত এটি লেখা নাগৰিক আৰু ছাত্ৰ-ছাত্ৰীসকলৰ পৰা আহ্বান কৰিছে । এই লেখাসমূহ ১০০ ৰ পৰা ১০০০ শব্দৰ ভিতৰত হ’ব লাগিব । স্পষ্ট হাতৰ আখৰেৰে অথবা টাইপ কৰি লেখা জমা দিব লাগিব । এশটা উন্নত মানৰ লেখা নিৰ্বাচিত কৰি জিলা প্ৰশাসনৰ চৰকাৰী ৱেবচাইট আৰু ফেচবুক পেজত আপলোড কৰা হ’ব। তদুপৰি জিলা প্ৰশাসনৰ তৰফৰ পৰা উৎকৃষ্ট ৫ টা লেখা বাচনি কৰি সাধাৰণ প্ৰশাসন বিভাগলৈ প্ৰেৰণ কৰা হ’ব । সদৌ অসম ভিত্তিত উৎকৃষ্ট মানৰ লেখাৰ বাবে লেখকগৰাকীক বীৰ লাচিত বৰফুকনৰ ৪০০ সংখ্যক জন্ম-জয়ন্তীৰ অনুষ্ঠানত পুৰস্কৃত কৰা হ’ব । লেখাসমূহ ২০ আগষ্টৰ বিয়লি ৫ বজাৰ ভিতৰত জমা দিব লাগিব । ইয়াৰ পাছত কোনোধৰণৰ লেখা গ্ৰহণ কৰা নহ’ব। চৰকাৰী-বেচৰকাৰী বিদ্যালয় তথা মহাবিদ্যালয়ৰ ছাত্ৰ-ছাত্ৰীসকলে লেখাসমূহ নিজ নিজ বিদ্যালয়, মহাবিদ্যালয়ৰ প্ৰধান শিক্ষক তথা অধ্যক্ষৰ হাতত জমা দিব লাগিব । অন্যান্য নাগৰিকে উপায়ুক্তৰ কাৰ্য্যালয়ত নিৰ্ধাৰিত সময়ৰ ভিতৰত নিৰ্দিষ্ট কৰি দিয়া স্থানত জমা দিব লাগিব । লেখা জমা দিয়া খামৰ ওপৰত নিজৰ নাম, ঠিকনা, যোগাযোগৰ নম্বৰ আৰু বীৰ লাচিত বৰফুকনৰ ৪০০ তম জন্ম-জয়ন্তীৰ লগত সংগতি ৰাখি “লেখা” বুলি স্পষ্টকৈ উল্লেখ কৰি জমা দিব লাগিব । আনহাতে নাগৰিকসকলে নিজৰ লেখাসমূহ ই-মেইল আই. ডি [email protected] ত অথবা তিনিচুকীয়াৰ উপায়ুক্ত কাৰ্য্যালয়ৰ ঠিকনাত ডাকযোগেও নিৰ্ধাৰিত সময়ৰ ভিতৰত পোৱাকৈ প্ৰেৰণ কৰিব পাৰিব । কোনোধৰণৰ অস্পষ্ট লেখা গ্ৰহণ কৰা নহব।