ভাল কামৰ বাবে ৯৯ কৰ্মচাৰীক বাচনি চৰকাৰৰ

শতাব্দ ষ্টাফ ৰিপ’ৰ্টাৰ, ২ আগষ্ট : অসম চৰকাৰে ৰাজ্যিক পর্যায়ত ১০ জন নন-গেজেটেদ আৰু জিলা পর্যায়ত ৮৯ জন কৰ্মচাৰীক পুৰস্কৃত কৰি তেওঁলোকৰ কৰ্মক্ষমতাক স্বীকৃতি দিয়াৰ সিদ্ধান্ত গ্ৰহণ কৰিছে। এক আনুষ্ঠানিক বিবৃতিত কোৱা হৈছে যে যিসকল কৰ্মচাৰীয়ে ভাল প্ৰদৰ্শন কৰে তেওঁলোকক এবছৰৰ বাবে সেৱা বৃদ্ধি কৰা হ’ব। লগতে ২৫ হাজাৰ টকাৰ নগদ ধন আৰু এখন প্ৰশস্তি পত্ৰ প্ৰদান কৰা হ’ব। অসমৰ প্ৰথমগৰাকী মুখ্যমন্ত্ৰী গোপীনাথ বৰদলৈৰ মৃত্যু বাৰ্ষিকীৰ লগত সংগতি ৰাখি অহা ৫ আগষ্টত লোক কল্যাণ দিৱসত প্ৰদান কৰা হ’ব এই বঁটাসমূহ। বঁটাপ্ৰাপ্তসকলৰ মূল্যায়ন আৰু নিৰ্বাচনৰ বাবে দুটা পেনেল– এখন পৰীক্ষা সমিতি আৰু এখন ৰাজ্যিক পৰ্যায়ৰ সমিতি গঠন কৰা হৈছিল। নিৰ্বাচনৰ মূল মাপকাঠীসমূহৰ ভিতৰত আছিল কৰ্মনীতি, সময়মতে দায়িত্ব পালন, সততা আদি। ৩৫ খন জিলাৰ পৰা লাভ কৰা ২৫৯ খন মনোনয়নৰ ভিতৰত জিলা পৰ্যায়ৰ বঁটাৰ বাবে নিৰ্বাচিত ৮৯ জন লোকক বাছনি কৰা হয়। আনহাতে বিভিন্ন বিভাগ আৰু সঞ্চালকালয়ে দাখিল কৰা ৯৯ টা প্ৰস্তাৱৰ ভিতৰত ৰাজ্যিক পৰ্যায়ৰ বঁটাৰ বাবে ১০ জন কৰ্মচাৰীক নিৰ্বাচিত কৰা হৈছে।