লখিমপুৰত ৰাষ্ট্ৰীয় ঘাইপথত প্ৰকাণ্ড শিমলু গছ বাগৰিলঃ নিহত এজন

তদুপৰি আন কেবাজনো গুৰুতৰ ভাৱে আহত হয়৷ এই ঘটনাই সমগ্ৰ নগৰখনত আজি তীব্ৰ চাঞ্চল্যৰ সৃষ্টি কৰে৷ ঘটনাৰ বিৱৰণীত প্ৰকাশ যে আজি পুৱা ১১ মান বজাত লখিমপুৰ নগৰৰ লগতে ইয়াৰ আশে পাশে এক প্ৰচণ্ড ধুমুহাৰ সৃষ্টি হয়৷ বৰষুণ নোহোৱাকৈ অহা ধুমুহা জাকে উত্তৰ লখিমপুৰ নগৰৰ খেলমাটিৰ এ এছ টি চি ৱৰ্কশ্বপৰ সন্মুখত থকা এজোপা প্ৰকাণ্ড শিমলুগছ উভালি পেলায়৷ গছডালে ১৫ নম্বৰ ৰাষ্ট্ৰীয় ঘাইপথটোৰ ইটো পাৰে চাহ তামোলৰ দোকান দিয়া খেলমাটি নিবাসী জামালউদ্দিন [৫০] নামৰ লোকজনৰ প্ৰাণ কাঢ়ি নিয়াৰ লগতে এগৰাকী যুৱতী সহ তিনিজন লোক গুৰুতৰ ভাৱে আহত হয়৷ নিহত জামালউদ্দিনে চাহ-তামোল বিক্ৰী কৰি পৰিয়াল পোহপাল দি আহিছিল৷ আনদিনাৰ দৰে আজিও তেওঁ গছ জোপাৰ কাষৰ পথটোৰ বিপৰীত ফালে পথৰ কাষতে চাহ বিক্ৰী কৰি থকাৰ সময়তে হঠাতে অহা প্ৰচণ্ড বতাহজাকত গছজোপা উভালি পৰাত জামালউদ্দিনৰ মৃত্যু ঘটে৷ আহত আটাইকেইজনকে ততাতৈয়াকৈ লখিমপুৰ চিকিৎসা মহাবিদ্যালয়লৈ লৈ যোৱা হয়৷ এই ঘটনাত এখন ই-ৰিক্সাকে ধৰি প্ৰায়৭-৮ খন বাইক-স্কুটি তথা যানবাহনৰ ক্ষতিসাধন হয়৷ ভাৰতীয় জীৱন বীমা নিগমৰ মুখ্য প্ৰৱেশদ্বাৰৰ কাষতে থকা প্ৰায় ডেৰশ বছৰীয়া শিমলু গছজোপা ৰাষ্ট্ৰীয় ঘাইপথটোত বাগৰি পৰাৰ ফলত আজি এই পথেৰে যাতায়াত কৰা যানবাহন সমূহ আৱদ্ধ হৈ পৰাৰ লগতে উক্ত পথেৰে কেবাঘণ্টা ধৰি যাতায়াত ব্যাহত হৈ পৰে৷ প্ৰশাসনে গছজোপা কাটি আঁতৰোৱাৰ ব্যৱস্থা কৰে যদিও দীৰ্ঘসময় পথটোৰে যাতায়াত ব্যাহত হৈ পৰে৷ ইফালে প্ৰকাণ্ড গছজোপা পথত বাগৰি পৰাৰ ফলত আজি লখিমপুৰ নগৰত প্ৰায় ৬-৭ ঘণ্টা বিদ্যুৎ সেৱা ব্যাহত হৈ পৰে৷ লক্ষণীয় কথা যে লখিমপুৰ নগৰত প্ৰকাণ্ড প্ৰকাণ্ড গছে দুৰ্ঘটনাৰ আশংকা কঢ়িয়াই অনাৰ বাতৰি যোৱা ৬ জুলাইত ‘শতাব্দ’ত সবিস্তাৰে প্ৰকাশ পাইছিল৷ সেই বাতৰি আজি আখৰে আখৰে ফলিয়ালে৷ উল্লেখনীয় কথা যে উত্তৰ লখিমপুৰ নগৰৰ প্ৰায়বোৰ পথৰ লগতে ৰাষ্ট্ৰীয় ঘাইপথৰ দাঁতিত এতিয়াও বহু পুৰণি প্ৰকাণ্ড প্ৰকাণ্ড গছ পথৰ দিশে হাউলি আছে৷ এই গছ সমূহৰ পৰা যিকোনো মুহূৰ্তত পুনৰ দুৰ্ঘটনা সংঘটিত হোৱাৰ আশংকা নিশ্চিত হৈ পৰিছে৷