মঙলবাৰৰ পৰা আৰম্ভ হৈছে দেশত ৫জি স্পেকট্ৰমৰ নীলাম প্ৰক্ৰিয়া। এতিয়ালৈকে হোৱা আটাইতকৈ ডাঙৰ স্পেকট্ৰম নীলামৰ সৈতে ইয়াক নতুন যুগৰ দিশত এক ডাঙৰ পদক্ষেপ হিচাপে গণ্য কৰা হৈছে। এই নীলাম প্ৰক্ৰিয়াত তিনিটা প্ৰধান মোবাইল সেৱা প্ৰদানকাৰী প্ৰতিষ্ঠানৰ উপৰি আদানি গ্ৰুপৰ আদানি ডাটা নেটৱৰ্কেও অংশগ্ৰহণ কৰিছে। আদানী গ্ৰুপৰ উপৰি ৰিলায়েন্স জিঅ’, ভাৰতী এয়াৰটেল, ভোডাফোন আইডিয়ায়ো এই স্পেকট্ৰমৰ বাবে নিবিদা দিব। এই নীলামত মুঠ ৭২ গিগাহাৰ্টজ এয়াৰৱেভ নীলাম কৰা হ’ব।
* কোনটো স্পেকট্ৰম নীলাম কৰা হৈছে?
২০ বছৰৰ বাবে নীলাম কৰা হ’ব ৭২,০৯৭.৮৫ মেগাহাৰ্টজৰ স্পেকট্ৰম। নীলাম কৰা স্পেকট্ৰম ফ্ৰিকুৱেন্সিসমূহৰ ভিতৰত আছে ৬০০ মেগাহাৰ্টজ, ৭০০ মেগাহাৰ্টজ, ৮০০ মেগাহাৰ্টজ, ৯০০ মেগাহাৰ্টজ, ১৮০০ মেগাহাৰ্টজ, ২১০০ মেগাহাৰ্টজ, ২৩০০ মেগাহাৰ্টজ, ৩৩০০ মেগাহাৰ্টজ আৰু ২৬ গিগাহাৰ্টজ বেণ্ড। খবৰ অনুসৰি, দেশত ৪জিতকৈ প্ৰায় ১০ গুণ বেছি গতি আৰু ক্ষমতাৰ সেৱা আনিবলৈ বেছিভাগ টেলিকম সেৱা প্ৰদানকাৰীয়ে মিড আৰু হাই-বেণ্ড স্পেকট্ৰমৰ বাবে নিবিদা কৰিব। ইএমডিৰ পৰিমাণে নিৰ্ধাৰণ কৰে কোনটো কোম্পানীয়ে অধিক স্পেকট্ৰম কিনিব পাৰে। ইয়াৰ লগতে এই পৰিমাণে কোম্পানীটোৰ কৌশল আৰু স্পেকট্ৰম ক্ৰয় কৰাৰ ক্ষমতাকো প্ৰতিফলিত কৰে। ইএমডিৰ ভিত্তিত আবেদনকাৰীক মেৰিট মাৰ্ক প্ৰদান কৰা হয়। কোম্পানীসমূহে নিবিদাৰ বাবে দূৰসংযোগ বিভাগত আৰ্নেষ্ট মানি ডিপ’জিট (ইএমডি) দাখিল কৰিছে। ৰিলায়েন্স জিঅ’ই ১৪০০০ কোটি, এয়াৰটেলে ৫৫০০ কোটি, ভোডাফোন-আইডিয়া ২২০০ কোটি আৰু আদানী গ্ৰুপে ১০০ কোটি ইএমডি জমা কৰিছে। ইয়াৰ ওপৰত ভিত্তি কৰি নিৰ্বাচিত বৰ্ণালী বেণ্ডত নিৰ্দিষ্ট পৰিমাণৰ বায়ুতৰংগ কিনিবলৈ চেষ্টা কৰিব পাৰে। ইএমডিৰ পৰিমাণৰ ভিত্তিত বিশেষজ্ঞসকলে অনুমান কৰিছে যে আদানী গ্ৰুপে প্ৰায় ৭০০ কোটি টকাৰ স্পেকট্ৰম ক্ৰয় কৰিব পাৰিব।
* বিভিন্ন কোম্পানীৰ ই এম ডিত পাৰ্থক্য কিয়?
তিনিওটা টেলিকম কোম্পানীৰ ইএমডিত ব্যাপক পাৰ্থক্য দেখা গৈছে। জিঅ’ৰ ইএমডিৰ পৰিমাণ আনতকৈ বহু বেছি। আদানি গ্ৰুপৰ ইএমডিৰ পৰিমাণ আটাইতকৈ কম। অৱশ্যে আদানী গ্ৰুপে ব্যক্তিগত ৫জি নেটৱৰ্ক গঢ়ি তোলাৰ বাবে নিলামত অংশগ্ৰহণ কৰা বুলি জানিবলৈ দিছে। বিশেষজ্ঞসকলৰ মতে, জিঅ’ই ১.৩ লাখ কোটি টকাৰ স্পেকট্ৰম ক্ৰয় কৰিব পাৰিব। বিশেষজ্ঞসকলে কয় যে এয়াৰটেলে ৩.৫ গিগাহাৰ্টজ আৰু ২৫ গিগাহাৰ্টজ বেণ্ডত স্পেকট্ৰমৰ বাবে নিবিদা দিব পাৰে। কোৱা হৈছে যে এয়াৰটেলে দিল্লী, মুম্বাই, কলকাতা, গুজৰাট, তামিলনাডু আদি চক্ৰৰ পৰা ৫জি সেৱা আগবঢ়োৱাৰ কথা চিন্তা কৰিছে। একে সময়তে ভোডাফোন আইডিয়াই কেৱল প্ৰয়োজনীয় ন্যূনতম মূল্যৰ বাবেহে স্পেকট্ৰমৰ বাবে দৰ দিব পাৰিব।
* 5G বজাৰলৈ আহিলে কি পাৰ্থক্য থাকিব?
4Gৰ তুলনাত 5Gত ব্যৱহাৰকাৰীয়ে অধিক প্ৰযুক্তিগত সুবিধা লাভ কৰিব। ৪জিত ইণ্টাৰনেট ডাউনলোডৰ গতি প্ৰতি ছেকেণ্ডত ১৫০ মেগাবাইটত সীমাবদ্ধ। 5Gত ই প্ৰতি ছেকেণ্ডত 10 GBলৈকে যাব পাৰে। ব্যৱহাৰকাৰীয়ে মাত্ৰ কেইছেকেণ্ডমানৰ ভিতৰতে গধুৰ ফাইলবোৰো ডাউনলোড কৰিব পাৰিব। 5Gত আপলোডৰ গতিও প্ৰতি ছেকেণ্ডত 1GBপৰ্যন্ত হ’ব, 4G নেটৱৰ্কত মাত্ৰ 50 Mbps ৰ তুলনাত। আনহাতে, 4Gৰ তুলনাত 5G নেটৱৰ্কৰ ৰেঞ্জ বেছি হোৱাৰ বাবে ই লেহেমীয়া নকৰাকৈ আৰু বহুতো ডিভাইচৰ সৈতে সংযোগ কৰিবলৈ সক্ষম হ’ব।
* ডাটা প্লেন আহিলেই অধিক ব্যয়বহুল হ’বনে?
ব্যৱহাৰকাৰীসকলৰ বাবে আটাইতকৈ ডাঙৰ প্ৰশ্নটো হ’ল 5G ইণ্টাৰনেটৰ খৰচ। যিহেতু ভাৰতত এতিয়াও স্পেকট্ৰম নিলাম হোৱা নাই সেয়ে টেলিকম কোম্পানীয়ে বিষয়টো সন্দৰ্ভত কোনো বিবৃতি দিয়া নাই। অৱশ্যে নতুন প্ৰযুক্তি অনাৰ বাবে 5G সেৱাৰ খৰচ 4Gতকৈ অধিক হ’ব বুলি আশা কৰা হৈছে। 5G সেৱা আৰম্ভ কৰা সকলো দেশতে যদি 4G আৰু 5Gৰ মূল্যৰ পাৰ্থক্য চোৱা যায়, তেন্তে দেখা যায় যে আমেৰিকাত, য’ত 4G আনলিমিটেড সেৱাৰ মূল্য ৬৮ ডলাৰপৰ্যন্ত বা প্ৰায় পাঁচ হাজাৰ টকা। ৫জি কৰিলে এই পাৰ্থক্য ৮৯ ডলাৰ বা প্ৰায় ৬৫০০ টকালৈ বৃদ্ধি পায়। 5G প্লেন 4Gতকৈ 10-30 শতাংশ বেছি ব্যয়বহুল। কিন্তু ভাৰতত এই পাৰ্থক্য বহু কম হ’ব বুলি আশা কৰা হৈছে, কিয়নো ভাৰতত বছৰ বছৰ ধৰি তথ্যৰ ব্যৱহাৰ বিশ্বৰ ভিতৰতে আটাইতকৈ কম। চলিত বৰ্ষৰ মাৰ্চ মাহত এয়াৰটেলৰ মুখ্য প্ৰযুক্তি বিষয়া (চিটিঅ’) ৰণদীপ ছেখোনে কৈছিল যে ৫জিৰ পৰিকল্পনা ৪জিৰ ওচৰত ৰখা হ’ব। মোবাইল কোম্পানী ন’কিয়া ইণ্ডিয়াৰ চিটিঅ’ ৰণদীপ ৰাইনায়ো এক সাক্ষাৎকাৰত কয় যে ভাৰতত ৫জিৰ প্ৰাৰম্ভিক ৰোলআউটৰ ফলত মূল্য কম হৈ থাকিব।
* সাধাৰণ গ্ৰাহকে কেতিয়া ৫জি সেৱা লাভ কৰিব?
চলিত বৰ্ষৰ শেষৰফালে অথবা অহা বছৰৰ আৰম্ভণিতে কেন্দ্রীয় চৰকাৰে 5G সেৱা আৰম্ভ কৰিব পাৰে। খবৰ অনুসৰি ছেপ্টেম্বৰৰ পৰা পৰীক্ষাৰ বাবে ১২খন চহৰত আৰম্ভ হ’ব ৫জি সেৱা। কিন্তু ২০২৩ চনৰ প্ৰথম ত্ৰৈমাসিক পৰ্যন্ত সময় লাগিব পাৰে সমগ্ৰ ভাৰতত।
* 5G স্পীডৰ উপৰি আৰু কি কি সুফল পোৱা যায়?
5G প্ৰৱৰ্তনৰ লগে লগে ই আমাৰ জীৱন, ব্যৱসায় আৰু আমি কাম কৰাৰ ধৰণ সলনি কৰিব বুলি অনুমান কৰা হৈছে। সঁচাকৈয়ে ৫জিৰ উন্নত প্ৰযুক্তি আৰু উচ্চ ক্ষমতাই সকলোকে সংযোগ কৰিব– ঘৰ, চালকবিহীন গাড়ী, স্মাৰ্ট অফিচ, স্মাৰ্ট চিটি আৰু উন্নত কৃত্ৰিম বুদ্ধিমত্তা।
( শতাব্দ সম্পাদনা গোট)