জামুগুৰিহাটৰ পৰা চন্দন শৰ্মাৰ প্ৰতিবেদন : ১২ এপ্ৰিলঃ থাৰ্ড ইমান ইন্টাৰনেচনেল অপেন টাইকোৱাণ্ডো চেম্পিয়নচিপত ৰূপৰ পদকৰে গৌৰৱ কঢ়িয়াই আনিছে জামুগুৰিহাটৰ শিশু খেলুৱৈ বাৰ্বী বৰুৱাই । নেপালৰ কাঠমাণ্ডোত ৮ আৰু ৯ এপ্ৰিলত অনুষ্ঠিত এই আন্তঃৰাষ্ট্ৰীয় টাইকোৱাণ্ডো প্ৰতিযোগিতাত ভাৰতবৰ্ষৰ হৈ প্ৰতিনিধিত্ব কৰা বাৰ্বী বৰুৱাই ৩০ কেজিৰ শাখাত অৱৰ্তীৰ্ণ হৈ কেইবাখনো দেশৰ খেলুৱৈক ধাৰাশায়ী কৰে যদিও দ্বিতীয় স্থানৰে দেশৰ গৌৰৱ কঢ়িয়াবলৈ সক্ষম হয় । আন্তৰাষ্ট্ৰীয় খেলত ৰূপৰ পদকৰে দেশৰ লগতে জামুগুৰিহাটলৈ গৌৰৱ কঢ়িয়াই অনা বাবে বাৰ্বী বৰুৱাক জামুগুৰিহাটৰ বিভিন্ন অনুষ্ঠান প্ৰতিষ্ঠান, ব্যক্তি বিশেষে আন্তৰিক শুভেচ্ছা জ্ঞাপন কৰে। হলি চাইলড ইংলিছ স্কুলৰ পঞ্চম মানত অধ্যয়নৰত বাৰ্বী বৰুৱা জামুগুৰিহাট নিবাসী হোমিও চিকিৎসক দাদুল বৰুৱা আৰু জুৰি শৰ্মা বৰুৱাৰ কনিষ্ঠ কন্যা । ইতিমধ্যে বাৰ্বী বৰুৱাই ৰাজ্যিক ভিত্তিত অনুষ্ঠিত কেইবাখনো প্ৰতিযোগীতাত গল্ড মেডেল লাভ কৰিবলৈ সক্ষম হৈছিল ।
