তেজপুৰত যাত্ৰীবাহী বাছ দুৰ্ঘটনাগ্ৰস্ত

শতাব্দ ষ্টাফ ৰিপ’ৰ্টাৰ,তেজপুৰ,২৬জুলাইঃ তেজপুৰ চহৰৰ নিকটৱৰ্তী টুমুকী অঞ্চলত আজি বিয়লি প্ৰায় চাৰি বজাত দুখন আলট্ৰা বাছৰ মাজত হোৱা এক দুৰ্ঘটনাত দুৰ্ঘটনাগ্ৰস্ত বাছৰ যাত্ৰী সকল কথমপি ৰক্ষা পৰে৷উল্লেখযোগ্য যে,বিধ্বস্ত পথটোত আলট্ৰা বাছ সমূহৰ অতপালি অব্যাহত আছে আৰু ইয়াৰ বাবেই এই দুৰ্ঘটনাটো সংঘটিত হয়৷আজি গুৱাহাটীৰ পৰা তেজপুৰ দিশে গৈ থকা এখন বাছ পথৰ দাঁতিত ৰখাবলৈ লোৱাৰ সময়তে একে দিশৰে যোৱা আনখন বাছে খুন্দা মাৰে৷ বাছ দুখনত থকা যাত্ৰী সকল এই দুৰ্ঘটনাত সামান্য পৰিমানে আহত হ’লেও কথমপি ৰক্ষা পৰে৷উল্লেখযোগ্য যে দুৰ্ঘটনাগ্ৰস্ত এএছ০১এলচি৫৯২১ আৰু এএছ১২এচি৯৯৬৪নম্বৰৰ বাছদুখনৰ চালক আৰু হেণ্ডিমেনে লগে লগে ঘটনাস্হলীৰ পৰা পলায়ন কৰে৷ স্হানীয় একাংশ লোকে প্ৰকাশ কৰা মতে ইয়াৰে এখন বাছ গৰাকীৰ ঘৰত থ’বলৈ লোৱাৰ সময়তে আনখন বাছে খুন্দা মাৰেহি৷উল্লেখ্য যে ১৫নং ৰাষ্ট্ৰীয় ঘাইপথটোৰ এনে এটা বিনষ্ট ৰূপ লৈছে যাৰ ফলত উক্ত পথটোত সঘনাই দূৰ্ঘটনা সংঘটিত হৈ আহিছে যদিও বিভাগীয় কতৃপক্ষই নিৰব ভূমিকা গ্ৰহণ কৰাৰ গুৰুত্বৰ অভিযোগ উত্থাপন হৈছে ।