ৰাজস্থানত পথ দুৰ্ঘটনাত নিহত লখিমপুৰৰ একে পৰিয়ালৰ ৩ জন

শতাব্দ ষ্টাফ ৰিপ’ৰ্টাৰ, লখিমপুৰ, ৯ এপ্ৰিলঃ ৰাজস্থানৰ জয়পুৰৰ আলোৱাৰাত এক্সপ্ৰেছ হাইৱেত সংঘটিত পথ দুৰ্ঘটনাত কৰুণ মৃত্যুক সাবতি লোৱা লখিমপুৰ চৌখামৰ যোগেন্দ্ৰ নাথ বৰাৰ পৰিয়ালত এতিয়া এক শোকাকূল পৰিবেশৰ সৃষ্টি হৈছে৷ একেটা পৰিয়ালৰ তিনিজনকৈ লোকে অকাল মৃত্যুক সাৱতি লোৱা ঘটনাই লখিমপুৰত গভীৰ শোকৰ ছা পেলাইছে৷ ইতিমধ্যে নিহত আটাইকেইজনৰ শেষকৃত্য দিল্লীতে সম্পন্ন কৰা হৈছে৷ উল্লেখ্য যে শনিবাৰে বিয়লি ৩ মান বজাত ৰাজস্থানৰ আলোৱাৰাত পথ দুৰ্ঘটনাত থিতাতে নিহত হয় লখিমপুৰ চৌখামৰ যোগেন্দ্ৰ নাথ বৰাৰ পুত্ৰ অৰ্ণব বৰা, অৰ্ণব বৰাৰ পত্নী মনামী চৌধুৰী বৰা আৰু মনামীৰ মাতৃ তথা নুমলীগড়ৰ শিক্ষয়িত্ৰী জ্যোতিমালা চৌধুৰী৷ অৰ্ণব বৰাৰ ৫ বছৰীয়া কণমানি পুত্ৰ আৰব বৰাই সম্প্ৰতি দিল্লীৰ চিকিৎসালয়ত মৃত্যুৰে যুঁজি আছে৷ উল্লেখ্য পথ দুৰ্ঘটনাত কৰুণ মূত্যুক সাবতি লোৱা অৰ্ণব বৰা, মুনমী চৌধুৰী বৰা চাকৰি সূত্ৰে কণমানিটোৰ লগত দিল্লীত বাস কৰিছিল৷ দিল্লীত বাস কৰা জী-জোঁৱাইৰ সৈতে নুমলীগড়ৰ জ্যোতিমালা চৌধুৰীয়ে ৰাজস্থানৰ জয়পুৰলৈ ফুৰিবলৈ গৈছিল৷ জয়পুৰৰ পৰা দিল্লীলৈ বুলি ঘূৰি আহি থকাৰ সময়তে ৰাজস্থানৰ এক্সপ্ৰেছ হাইৱেত এখন ট্ৰেইলাৰত অৰ্ণব বৰাৰ এম জি গাড়ীখনে তীব্ৰ গতিত খুন্দা মৰাৰ ফলতে বৰ্হিৰাজ্যত নিঃশেষ হয় লখিমপুৰৰ এই পৰিয়ালটো৷ অৰ্ণব বৰাই দিল্লীৰ গুৰগাঁৱত কম্পিউটাৰ ইঞ্জিনিয়াৰ হিচাপে কৰ্মৰত হৈ থকাৰ লগতে তেওঁৰ পত্নী মনামীয়ে দিল্লীতে এটা ব্যক্তিগত বেংকত কৰ্মৰত হৈ আছিল৷