উত্তৰ লখিমপুৰ নগৰৰ পশ্চিমাঞ্চলত শংকৰ জন্মোৎসৱ পালন

শতাব্দ ষ্টাফ ৰিপ’ৰ্টাৰ, লখিমপুৰ, ২৭ ছেপ্টেম্বৰঃ উত্তৰ লখিমপুৰ নগৰৰ পশ্চিমাঞ্চলৰ ৬টা নামঘৰৰ ভকত বৈষ্ণৱসকল একত্ৰিত হৈ এইবাৰ শ্ৰীশ্ৰী শংকৰদেৱৰ ৫৭৫ সংখ্যক জন্মোৎসৱ পালন কৰে৷ শংকৰ জন্মোৎসৱ লগত সংগতি ৰাখি ধৰ্মালোচনী সভা, সম্বৰ্ধনা সভা আদিও অনুষ্ঠিত কৰা হয়৷ শ্ৰীশ্ৰী শংকৰদেৱৰ ৫৭৫ সংখ্যক জন্মোৎসৱ উপলক্ষে বিজয় নগৰ নামঘৰত খেলমাটি, চান্দমাৰি, বিজয় নগৰ, চিনাতলীয়া, সনাতন নামঘৰ, বোৱালগুৰি আৰু শংকৰ মাধৱ নামঘৰৰ উদ্যোগত একত্ৰিত ভাৱে যোৱা ২৪-২৫ ছেপ্টেম্বৰত এই জন্মোৎসৱ পালন কৰা হয়৷ প্ৰথম দিনা ধৰ্মধবজা উত্তোলনেৰে আৰম্ভ হোৱা শংকৰ উৎসৱত স্মৃতি তৰ্পণ, নামপ্ৰসঙ্গ, গুৰু চৰিত পাঠ, ভাগৱত শোভাযাত্ৰা আদি আয়োজন কৰা হয়৷ সেইদিনাই লখিমপুৰ বিধান সভা সমষ্টি ভিত্তিত দিহানাম প্ৰতিযোগিতাও অনুষ্ঠিত হয়৷ দ্বিতীয় দিনা উদযাপন সমিতিৰ সভাপতি গোলাপ হাজৰিকাৰ সভাপতিত্বত অনুষ্ঠিত ধৰ্মালোচনা আৰু বটা বিতৰণী সভাত ৭৫ বছৰ উৰ্ধৰ ১২ গৰাকী বিশিষ্ট লোকক অংগবস্ত্ৰ আৰু সম্বৰ্ধনা পত্ৰৰে সম্ভাষণ জনোৱা হয়৷ সেইদিনাই বিভিন্ন কৃষ্টি প্ৰতিযোগিতা অনুষ্ঠিত হয়৷ নিশালৈ দ্ৰোণ পৰ্ব অভিমন্যু বধ নাটকেৰে শংকৰ জন্মোৎসৱৰ সামৰণি পৰে বুলি উদযাপন সমিতিৰ সভাপতি গোলাপ হাজৰিকা, সম্পাদক নৰেণ দত্তৰ লগতে প্ৰচাৰ উপ সমিতিৰ সম্পাদক অনুপ হাজৰিকাই জানিবলৈ দিছে৷